JOSHUA 2 - BAIBEL KANGTHIR (BSI)

Kelangjoi Atum Aphan Joshua Jeriko Ketoi

¹ Anke Shittim amukam pen banghini kelangjoi atum aphan dam pen Kanaan adet akenangsot ke Jeriko arongsopi longle kelangjoiji aphan hukum-heihei pisi toilo. Hala-tum rongsopi kevang ahut ajo Rahab, pu inut abeisapi ahemsi pangthang-lo.

² Jeriko arecho, ajehak Israel atum ajo vangsi det lang chonghulo pu arjulong-lo,

³ lasi Rahab aphan lam ethe pathantoilo, “Nanghem kedo amonit atum det isi langjoitang-lo! Halatum aphan ingtan vannon!”

⁴ Ajehak amonit nehem vang-lo, labangpi thak-lo. “Bonta halatum konat pen lone kevang neli chinine.

⁵ Rongsopi anghap kangkir aphrang arnikangsam ahut latum dam-et-lo. Halatum konattong kedam lone neli chinine, bonta nanglitum jongsi paprapjin pen aphi hungdun lote nepdun unji.”

⁶ (Rahab banghini kelangjoi atum aphan sarnung angsong pontang-lo lapen halatum aphan bangpi kebitang ajehak abap pen dipsi patulo.)

⁷ Recho rongsopi olo, lapen inghap ingkirtang-lo. Halatum Israel akelangjoi atum aphan Jordan kehat adim anta damsi langdamlo.

⁸ Kelangjoi atum ajo kesangji aphrang, Rahab sarnung angsong arludamlo,

⁹ lapen halatum aphan pulo, “Neli chini Hemphu laso alongle nanglitum aphan nangpitang-lo. Dak adet abangphutinta nanglitum aphan pherelo.

¹⁰ Nanglitum Ijip ke-o ahut Hemphu kosonsi nanglitum angno Ikora atalo pakrenghak loma, la nelitum arjulong-lo. Jordan anihang Amor arecho banghini Sihon lapen Og aphan nanglitum kopusonsi pathiloma lata nelitum arjulong-lo.

¹¹ Nelitum la arjulong-lok pen pherepik-lo; nanglitum ajok nelitum ning ajakong avedet-lo. Hemphu nanglitum a-Arnam ke Sining lapen pirthe a-Arnamlo.

¹² Lasi non Alangli men pen semetang iknon, neli nanglitum aphan kangjinso asonthot nanglitumta nelitum hem isi aphan ingjinsopo lapen nanglitum aphan kekroithekjile neliphan angthek nepinon.

¹³ Nelipo-nelipei lapen neli-ik nelimumar lapen halatum ahemtun-heihei raipo pura semetang iknon! Nelitum aphan nelipathi longri!”

¹⁴ Bangso amonit thak-lo, “Nelitum jongsi nelitum kechechak ateng klemkle pulote Arnam nelitum achethe papondet-lonang! Nangli jongsi badu aphanta nelitum keklem alam thanthelo pulote, Hemphu laso alongle nelitum aphan nekepi ahut nelitum semetang-lo, nanglitum aphan langpamepo.”

¹⁵ Rahab ke rongsopi arpong along kekim ahemsi kedo, lasi bangpi arri pensi pinso amonit atum aphan inghapso anat pen pasunlo.

¹⁶ Bangpi pulo, “Inglong ajo anat-le damnon! kalite recho amonit atum nangthek-long-lokpo”, Nithom an latum nang-chevoivetik an hadak-le dojoinon.

¹⁷ Pinso amonit atum bangpi amonit aphan pulo, “Nelitum aphan nangli nangkechak alam nelitum ning chebi pamepo.

¹⁸ Lasonle nangli klemnon. Nelitum nanglitum adet nangtengkheng ahut, nangli nelitum aphan nangkepasun anghapso along laso arri-ke-er kokdongnon. Nanglipo-nanglipei, lapen nangli chekle atum an aphan lapen nanglipo ahem asangho an aphan nanglihem vanpetnon.

¹⁹ Mane jongsi ingtan barra thilot-lo pulote, la amethang adai pensi kethilo, la pen apot nelitum adai ave.

²⁰ Lapen nelitum keklem alam nangli bang aphan thanser lote, nangli nelitum aphan nangkepachechaktoi alam nelitum chebibelo.”

²¹ Bangpi chedondunlo, lapen halatum aphan toijuilo. Latum damjui aphi bangpi inghapso along arri ke-er arri rak-lo.

²² Kelangjoi atum inglong anat damsi chepatulo. Recho amonit atum nithom halatum aphan rong anat rilo, bonta halatum latum aphan longledet-lo, lasi halatum Jeriko anat chedamlo.

²³ Ansi banghini kelangjoi atum inglong pen nanghirsi langroi hat-lo, lapen Joshua along chedamthulo,

²⁴ lapen pulo, “Nelitum ning chethepamelo, Hemphu ilitum aphan det epitang-lo. Hadak kedo-an arat atum etum aphan epherelo.”