JOSHUA 18 - BAIBEL KANGTHIR (BSI)

Ahin Alongle Kethak

¹ Halatum det adang an aphan haidet aphi Israel kedo-an asong Shiloh along chingrumlo, lapen Hemphu angno Kechetong-i apehem parjap-lo.

² Israel arat khei throksi aphan halatum apharman alongle thakthelang.

³ Lasi Israel arat aphan Joshua pulo, “Nangphusar atum a-Arnam Hemphu nangkepitang alongle chepahemphu damji lapen kelutdamji aphan ko-an chonghong jilangma?

⁴ akheitin pen bangkethom amonit nelong pavangnang longri ahoi arjan kepatokjisi ne halatum aphan det adang toipo, lapen halatum aningkehang alongle aling chepahemphu longpo. Ansi halatum nelong chevangthu nangpo.

⁵ Halatum angbong longle dak throksi thakdetpo, Judah ke amethang alongri nitur anatsi chedopo, lapen Joseph jokta amethang alongri ha nirep anat chedopo.

⁶ Nangtum lahei dak throksi alamjir tok-ra la nelong vannon. Ansi etum Arnam Hemphu aphan ne nangtum apharman khadot pen arjupo.

⁷ tebonseta Levi atum ke nangtum ahin anat alongle nangchodeng dundedetpo, pima halatum apharman ke Hemphu akurusar ason kangduk helo. Seta Gad, Reuben lapen Nihang a-Manasseh akhei atum apharman alongle Jordan anihang anat cherailong-lo, la Hemphu aban Mosessi pitang-lo.”

⁸ Longri ahoi arjan ketokjisi pinso atum aphan lahei paklemtoi akam la pinkhatdet aphi halatum atovar chedamlo: Det adang damra longle adang a-arjan tok-ra nelong vanthunon. La ansi dak Shiloh along nangtum apharman Hemphu aphan khadot-heihei pen arjupo.

⁹ Lasi pinso atum longle adang an damsi kopusonsi halatum dak throksi thak nangjima rongso-heihei amen tokjirlo. Ansi halatum Shiloh along amukam kedo a-Hemphu along chevoithulo.

¹⁰ Halatum apharman Hemphu aphan karjujisi Joshua khadot-heihei pathulo; lapen Israel ahin arat akheitin apharman alongle thak-rep-lo.

Benjamin Aphan Longle Kethak

¹¹ Benjamin akhei ahem-asangho atum chepahemphu alongle ahoisi kechengsi thak nangpo. Latum alongleke Judah lapen Joseph akhei angbongsi do.

¹² Nirep anat halatum ahoi Jordan along cheng-lo, lapen arludambomsi Jeriko anirep anat sunjirlo, lapen nichi anat damsi inglong alongri krongplutsi Bethaven akejejangtang ajo an ledamlo.

¹³ Ahoi Luz (Bethel ta pu) anitur kehir anat damsi Ataroth Addar, Beth Horon anitur anglong anat sundamlo.

¹⁴ ahoi dambomsi ahin kaprek anat suilo, nitur ahin pen laso anglong anichi anat pakekphak-lo lapen Kiriath Baal(mate Kiriath Jearim) anat damlo, la Judah akheisi chepahemphulo. Lake nichi ahin ahoilo.

¹⁵ Nitur ahoike Kiriath Jearim angchun pensi cheng-lo lapen Nephtoah alangso-heihei anat damlo.

¹⁶ La ansi Hinnom Arlok anglong akeng-ri chechardak Rephaim Arlok anirep kejut along an ledamlo. Hadak pen Hinnom Arlok krongplutsi nitur anat damlo, la Jebusi anitur akung, ha Enrogel anat.

¹⁷ La Enshemesh anirep anat suisi lapen Adummim atovar athengno Geliloth anat damlo lason ahoi Bohan Arlok (la Reuben asopo) anat damlo,

¹⁸ lapen Jordan Arlok checharplot anirep akung anat parlo. La ansi Arlok arlo sundamsi

¹⁹ Beth Hoglah anirep akeng persi Jordan Aroi kechiti adim, Talo-Kethi anirep along jutdamlo. Lake Nitur ahoilo.

²⁰ Jordan ke nihang ahoilo. Benjamin akhei ahem-asangho atum kechepahemphu alongle ahoi lahei helo.

²¹ Benjamin akhei ahem-asangho atum kechepahemphu arongsopi-heihei ke Jeriko, Beth Hoglah, Emek-Keziz,

²² Beth Arabah, Zemaraim, Bethel.

²³ Avvion, Parah, Ophrah,

²⁴ Chepharammoni, Ophni, lapen Geba: Halatum adung arei arong pen pen rongsopi rong krehini,

²⁵ La apar Gibeon, Ramah, Beeroth,

²⁶ Mizpah, Chephira, Mozah,

²⁷ Rekem, Irpul, Taralah,

²⁸ Zela, Haliph, Jebus(mate Jerusalem), Gibeah lapen Kiriath Jearim: Halatum adung arei arong pen pen rongsopi rong 14 dolo. Benjamin akhei ahem-asangho atum kecherai alongle la helo.