JOSHUA 11 - BAIBEL KANGTHIR (BSI)

Jabin Lapen La Kecherap-asong Aphan Joshua Keparem

¹ Israel atum kehai abirta Hazor arecho Jabin arjulong-lok pen la Madon arecho Jobap aphan, Shimron lapen Akshaph arecho aphan

² lapen nirep along alongri arecho atum, la Jordan Arlok-Galili alangbi anitur anat kedo talo akung arecho atum aphan lam pathan damtoilo.

³ La Jordan parai-harai kedo a-Kanaan asor, Amor asor, Hitti asor, Perizzi asor, lapen inglong alongri Jebusi asor lapen Mizpah adet Hermon anglong akeng-ri kedo Hivi atum aphan anta la lam lolo.

⁴ Halatum aron-aso penpen vang-lo, isi atalo akung kedo asangtimili ason thakthak ron-armu amonit ongpik. Halatum ron alosei lapen ron ahemkonglongta do.

⁵ Lahei arecho atum ajakong chepangrumpetsi vang-lo, lapen Israel pen kechedanjisi Merom pu alangjeng along mukam chekim rappet-lo.

⁶ Joshua aphan Hemphu pulo, “Halatum aphan phereri, penap nonpu apor Israel apharman latum kedo-an aphan Ne pathi-etpo. Nang halatum alosei akeng palok nangpo lapen ron ahemkonglong-heihei me phrin pi-et nangpo.”

⁷ Lasi Joshua lapen alangli amonit an pamanghuhak pen ajok halatum aphan Merom alangso along tengkheng-lo.

⁸ Halatum aphuthak Hemphu si Israel aphan pahailo; Israel atum tengkhengsi halatum aphi aphi hungdunlo ha Misrephoth Maim lapen Sidon anta lapen Mizpah arlok anihang anta hotur aphan pathilong-et-etik ron chedanbomlo.

⁹ Hemphu hukum kepi ateng si halatum aphan Joshua klemlo. La halatum alosei akeng palok-lo, lapen ron ahemkonglong-heihei me phrinpi-et-lo.

¹⁰ Joshua aphi chiruisi Hazor che-railo, lapen la arecho aphan pathilot-lo. (Halaso ahut Hazor helo kedo-an adet angbong jakong ketheneilo.)

¹¹ Latum hadak kedo abangphutin aphan pathilo, lapen rongsopi me keipi-et-lo.

¹² Joshua lahei arongsopi kedo-an cherailo, lapen Hemphu aban Moses hukum kepi asonthot halatum arecho lapen abangphutin aphanta pathi-et-lo.

¹³ Tebonseta longle kangduk athak kedo kekomchen arongsopi-heihei aputhak Israel atum pavirvedet-lo. Hazor aphan Joshua me keichot-lo.

¹⁴ Israel arat atum rongsopi-heihei along kedo ador kesodak kepangreng api an ponsi amethang aphan chebilo. Bonta latum monit abangphutin aphan ke pathi-et-lo, inutbak aphanta akereng bibedet-lo.

¹⁵ Moses aphan Hemphu hukum-heihei kepitang asonthotsi Mosesta Joshua aphan hukum pilo, lapen Joshuata lahei klem-et-lo. Moses aphan Hemphu hukum kepi asontin Joshua keklemkle thangnatta avelo, alangli la klem-et-lo.

Joshua Kecherai Alongri

¹⁶ Kedo-an alongle Joshua cheraidet-lo: Inglong alongri lapen inglong akeng-ri-heihei, nirep lapen nitur ahin, Goshen alongri kedo-an lapen kekrengtai alongle la anitur anat lapen Jordan Arlok an.

¹⁷ Longri kerai Edom adung Halak anglong anitur anat pen Baalgad anirep an, Hermon anglong anitur Lebanon arlok an,

¹⁸ Ajirdingklui an lahei arecho atum pen Joshua ron chedan o-lo, bonta la kedo-an halatum aphan paremsi pathi-et-lo.

¹⁹ Ajehak a-Hivi atum Gibeon kedo arongsopisi Israel atum pen kechepamechot. Kaprek kedo-an atum aphan ke ron kechedan pensi kelong.

²⁰ Hemphu-si halatum aphan Israel pen kechedanjisi pamathathip-lo, la lote halatum aphan kepavir pameji aphan lapen jinsose pin pen kepathiji aphan honthe longpo. La helo Moses aphan Hemphu hukum kepi.

²¹ Halaso ahut Joshua damsi hi-i akhei Anakim, latum ke inglong alongrisi kedo, Hebron along, Debir along, Anab along lapen Judah anglong alongri lapen Israel anglong alongri along kedo-an aphan pavir-et-lo. Joshua halatum aphan lapen arongsopi-heihei pavirpamelo.

²² Israel alongle along inutbak Anakimta avedet-lo; seta Gaza, Gath lapen Ashdod along ajehak dolang.

²³ Kedo-an alongle Joshua cherailo, Moses aphan Hemphu hukum kepi ateng-lo. Lahei Israel aso aphan Joshua halatum amethang pacheraijisi pilo lapen la longle thaksi akheitin aphan longle thak-rep-lo. Ansi rat atum ron kechedan pen sanglong-lo.