JOSHUA 1 - BAIBEL KANGTHIR (BSI)

Joshua, Kanaan Ketengkhengji Aphan Arnam Ahukum

¹ Hemphu alam Moses, la Hemphu aban thidet aphi, Moses arapbang, Nun asopo Joshua aphan pulo,

² “Neban Moses thitang-lo. Nang lapen Israel arat atum kedo-an, non chesiknon, lapen Jordan Aroi hatpet ra Ne halatum aphan kepi alongle arlo damnon.

³ Ne Moses aphan kepu asonthotsi, Ne, nang lapen Nerat aso kedo-an aphan nangtum kehatput alongle an nangpitang-lo.

⁴ Nangtum ahoi-heihei ke keleji sangtimili ajo nitur pen ha Lebanon anglong Nirep anat an; Langpi Euphratis anihang pen Hitti arongsoding, ha Mediterran atalo anichi anat an.

⁵ Joshua, nang chethe dotik ke baduta nangphan nangparem un-elo. Ne Moses along kedo dun asonthotsi Ne nanglong nangdodunpo. Ne Nangphan kaita o-elo.

⁶ Mathathipnon lapen ning-chethethipnon, pima latum aphusar atum aphan Ne kechak alongle latum kecherai ahut nang labangso arat ajalinbang plangpo.

⁷ Muthe mathathipnon, ning-chethethipnon; lapen Neban Moses nangkepi aron an nang kroipetpo pu pachinidaknon. La epharvet klem pa-oiri lapen nang kedam aling nang unji.

⁸ Aron aloh kaita nangtum karcho ahut porhevek nangji. Ajo nerlo la ingchapnon, lapen la along ketok an kroipet po pu pachinidaknon. Anke nang plangpo lapen un pamepo.

⁹ Chemathathutha, Ne nangphan mathathip nangji lapen ning chethethip nangji pusi hukum nangpilo kalima? Phereri mate ning biri, pima Ne Hemphu nang Arnam, nang kedam aling nangdodunpo.”

Joshua Rat Aphan Hukum-heihei Kepi

¹⁰ Ansi Joshua jalin atum aphan hukum pilo,

¹¹ mukam damsi rat aphan papudamtoilo, “Ajehak anbor siknon, pima nithom ansi nangtum Hemphu nang Arnam nang kepi alongle kecheraijisi Jordan Aroi nangtum hat nangpo.”

¹² Reuben lapen Gad lapen Manasseh achitim akhei atum Joshua aphan pulo,

¹³ “Chematha-thutha, Moses Hemphu aban kosonsi nangtum aphan nangkepu Hemphu nangtum a-Arnam Jordan parai nihang anat alongle nangtum ahem ason nangpidetpo pu kepu.

¹⁴ Nangtum apiso, nangsomar, lapen pi an ladak pasang-lonang, bonta nangtum aron-aso ron aphan risim ke-ot atum ari asangho Israel atum aphrang hat paphrangpo la halatum aphan kerapji aphan,

¹⁵ lapen halatum Hemphu nang Arnam Jordan parai nichi anat alongle halatum cherairetik anlo. Kadokave Israel akhei aphan pajok-van aphi nangtum nangchirui tame lapen Jordan anihang anat la Moses, Hemphu aban nangkepi alongle nangmethang ladak donon.”

¹⁶ Halatum Joshua aphan thak-lo, “Nangkepu ason an netum klempo lapen nangketoi aling netum dampo.

¹⁷ Netum nangphan kroipo Moses aphan kekroi asonthot lapen Hemphu nang Arnam nanglong padonang Moses along kedo ason thakthak!

¹⁸ Badutame nang jakong mate nang hukum aputhak kekroikre aling abang aphan pathilotpo. Mathathipnon lapen ning chethethipnon!”