JOEL 1 - BAIBEL KANGTHIR (BSI)

¹ Pethuel asopo Joel along kevang Hemphu alam lahelo:

Ketiki Asok-heihei Kevir Apot Rat Atum Aningkeduk

² Sarlar atum la arjutha, Judah adet kedo an atum nangno chedentha! Nangtum arni mate nangphusar atum arni lapuson plang-loma?

³ La nangsomar atum aphan thannon, lapen nangsomar atumta halatum asomar atum aphan pachethan lonang, lapen halatum asomar atum akaprek a-ove aphan pathannang.

⁴ Phelong kerot-tang ahin longvur cho-et-lo. Longvur kecho ahin longbon cho-et-lo lapen longbon kecho ahin longvur cho-et-lo.

⁵ Thurnon, nang kangri-kangkrang atum, chirunon; lapen nang drakha ahorlang kejun atum, chiru charnapnon, pima drakha-ahorlang kedok la nangho pen pavedet-lo.

⁶ Pima ne det abe thursi isi akhei vang-lo, latum ajakong thepik lapen aphai lakha un-e; la aso hingho atum aso ason reset lapen hingho api angni ason do.

⁷ Latum ne drakha rikang pavirtang-lo lapen ne thebo arong-heihei heje-et-lo; latum ahu lumsi lahei varchorlo; aro-heihei palokthorlo.

⁸ Kedoji pule kethi pilot apinso aphuthak kechiru a-okarjang ason chirutha.

⁹ Sok-sang adan lapen kedung adan Hemphu ahem pen avetang-lo; kurusar atum, Hemphu aban atum chirulo.

¹⁰ Hidi ingthaidang-lo, longle chirulo pima sok pavirtang-lo, drakharikang krenghak-lo jangthu krengtailo.

¹¹ Ningduknon, nang sai ketiki atum; drakha aberi kelang atum chirujonon pima soktipli lapen soktipliso lapen kedo an asok virtang-lo.

¹² Drakha-rikang thikhrailo, thebo arong chekedulo. Dalim, sotele lapen apel, hidi athengpi an thikhrailo; lapen monit aso atum aning arong avedet-lo.

¹³ Dovan along kangduk abang, nang kurusar atum pe-thoila che-um-ra chirunon! Kardomhemthepi arlo damra jopangthang ningduknon! Nang Arnam aphan sok-sang mate drakha-horlang kepiji avelo.

¹⁴ An kehum arni pathiknon, isi dhorom akechingrum hangnon. Keja atum pangrumnon lapen Judah arat an Hemphu nang Arnam ahemthepi arlo hangra alangliphan pahangnon.

¹⁵ Hemphu arni tebok-het-lo; Jakong theparpik abang kepavirji arni. Halaso arni ko-an pherememe akevir vanji!

¹⁶ Netum asok-asang kevir ahut netum chelang dun phrong-lo. Netum a-Arnam a Hemthepi along ning arong avedet-lo.

¹⁷ Longle kekreng pen ajok chili sek-lo. Puru kethapji asok avelo, lasonsi puru-heihei sok avedet-si ru-et-lo.

¹⁸ Pi atum dono si ingrong-lo! chainong chelong ahur manghulo pima latum kechopan adim ave; biresak ahur aduk dolo.

¹⁹ Ne nangphan nanghang-lo, Hemphu, pima kechopan adim lapen thengpi thengphang kreng-et-lo, lahei aphan me le kechodet ason.

²⁰ Marat api atum anta nangliphan hang-lo pima langjeng anta krengtailo.