JEREMIAH 47 - BAIBEL KANGTHIR (BSI)

Philistia Aphuthak Hemphu Abirta

¹ Ijip arecho Gaza ketengkhengji aphrang, Philistia aphuthak neliphan Hemphu ningjelo.

² Alang pulo: “Langtha! Nirep anat lang-heihei thurtang-lo, lapen aroi alang kethe asonsi tosaipo. Lahei alongle lapen la athak kedo asontin, rongsopi-heihei lapen hadak kedo arat an aphan inglum-etpo. Kerap kelongjisi rat atum hangjopo; Pirthe athak kedo abangphutin hangpik khangjangpo.

³ Latum losei akeng kedong arki arjulongpo ron ahemkonglong arki-heihei, kongtelong-heihei arki arjulongpo. Osomar aphan apo atum aphi chelanglelo; Latum ari thangnat ta klem thekthe detpo.

⁴ Philistia aphan kepavir apor nangletang-lo, Tair lapen Sidon pen akerap kedo-an bengpetji. Ne, Hemphu si Philistia aso pavirpo, Krit akung an pen kevang atum.

⁵ Gaza arat aphan ningduknei apor nangletang-lo, lapen Ashkelon arat atum ingsamklip, konatsi Philistia ahin atum ningripoma?

⁶ Nangtum hang-lo, ‘Hemphu anokjir! Nangli ni ko-ansi hivikpoma? Nang nok ahom anat chedoinon, hadak sangjoinon!’

⁷ Ashkelon lapen talo akung kedo arat aphan kepatengkhengji aphan Ne si hukumpilo, Ne laphan kam kepaklemtoi ahut, bonta la kopusonsi sangjoipo.”