JEREMIAH 4 - BAIBEL KANGTHIR (BSI)

Ning Kecheruiji Aphan Kehang

¹ Hemphu pulo, “Israel arat atum, nangtum jongsi suiji pulote Ne nat-le nangtum suinon. Nangtum jongsi kekroithirklong-lo lapen Ne kehijim akumlin-heihei chevarlote,

² nangtum nemen pen seme tangnangpo. Anke det atum an Ne halatum aphan ahirjume kepijisi hangpo; lapen latum nephan ropo.”

³ Judah lapen Jerusalem arat aphan Hemphu pulo, “Kebaibe nanghidi-heihei hai bainon; ingsu ajo nang chili rik-ri.

⁴ Nang kechak, Ne, nang Hemphu pen chebinon, lapen nephan chehodainon, nang Judah lapen Jerusalem arat atum. Nangtum jongsi klemlote, Nening kethi me ason chopo, pima nangtum kehingno ason keklem an apot. La chopo, lapen baduta kepamepji abang avelo.”

Judah Aphan Ketengkhengji Akether

⁵ Det adang pong-ut butnon! Asekethe lapen athe pachondaknon! Paikomchen arongsopi-heihei anat kekatjile Judah lapen Jerusalem arat aphan thannon.

⁶ Zaion anat-le tovar jongpinon! Kejokvanjile katnon! Panglenri! Kephangno lapen nirep anat pen kevir Hemphu vanlo.

⁷ Kedom adim pen hingho kevang ason, det-heihei kepavir abang nangbarlo. Alang Judah kepavirjisi vang-lo. Judah arongsopi-heihei parusi opo, Lapen la-heihei along baduta dodedetpo.

⁸ Lasi pethoila che-um non lapen chiru hangcharbunon pima Judah aphan Hemphu aning kethipik hamhelang.

⁹ Hemphu pulo, “Labangso arni recho lapen achakri atum angthin chepathe haihedetji; kurusar atum thirikpo lapen montri atum mong-loipo.”

¹⁰ Anke ne pulo, “Muluk a-Hemphu, Nang Jerusalem arat aphan pachobei pamelo! Hadak ningkangsam doji pu Nang ningjelo, bonta halatum achethok along nokjir dokok-lo”.

¹¹ Jerusalem arat anat kejejangtang ajo anat pen keso-ang atomon kejapji kevang apor nangletang-lo. Lake jung-jung atomon ason kali aphe-e pangjarchot kali.

¹² Kevangji atomon Hemphu ahukum pensi vangji, halatum apar la theneiji! La Hemphu amethang amatsi arat aso atum aphuthak kangsaijisi teramlo.

Hotur Atum Judah Aphan Kekompet

¹³ Langtha, inghun-heihei asonsi hotur atum vang-lo. La aronhemkong-long mongve atomon ason, lapen alosei atum vomu apar kechat. Etum virtang-lo! Etum acham dam-etpo!

¹⁴ Jerusalem, nangning pen kehingno chechamnon, anke nang jokpo. Nang ni ko-ansi nangning kematha pap pen paplengset-verpoma?

¹⁵ Dan arongsopi lapen Ephraim anglong-heihei pen pherangke atum vangsi birta langno pachethang-lo.

¹⁶ Latum vangsi det-heihei aphan pacheretoilo, lapen heloving adim pen hotur vangbomlo pu Jerusalem aphan kethanjisi pachethang-lo. Lahei hotur atum Judah arongsopi abe thursi asekethe pen hangpo,

¹⁷ lapen monit atum hidi kehon asonsi Jerusalem kompetpo, pima bangpi arat atum Hemphu abe thurlo. La Hemphu si kepulo.

¹⁸ Judah, nang kedo lapen nang keklemtang akam pen ajok la nangme-thang aphuthaksi chevanlo. Laso akesung nang papsi paplang-lo; la nangchethok lapen nang ingthin cherot-lo.

Arat Apot Jeremiah Aning Keduk

¹⁹ Keso! Ne keso chechak un-elo! Ne ning! Nening soktokprup-lo! Ne dojoi thekthe; Ne pong-ut-heihei arki arjulong-lo Lapen ron arkita.

²⁰ Eson akevir aphan ason kaprek vangbomlo, det adang an ruthailo. Menmen netum apehem virtang-lo; Halahei kehing ape ingsek-ilo.

²¹ Ni ko-ansi ron arki lapen pong-ut arki ne arjunang poma?

²² Hemphu pulo, “Ne rat atum luvok; latum Nephan ne-chinine. Latum kelu a-osomar ason; latum akechini thangnat ta ave. Latum kehingno akam klem thekpik, Bonta akeme ason klem thekthe.”

Kevangbom Akevir Alam Jeremiah Kethek-long

²³ Ne pirthe lang-lo, la krengtai; sining inghun ta kethe-ang ave.

²⁴ Inglongpi-heihei ta klemhur, lapen inglongso-heihei arlongsi chonphrophra.

²⁵ Monit ke thek-longle det-lo, votek-voso an ingjar-et-lo.

²⁶ Aho-or kedo alongle ingthaidang-lo; la arongsopi-heihei ru-et-lo pima Hemphu aning kethi apot.

²⁷ (Hemphu pulo, pirthe adang kejejangtang ajo plangpo, bonta Alang la kadokave phangno et-e).

²⁸ Pirthe ningripo; sining-inghun-heihei ingtingbompo. Hemphu ningjetang-lo lapen Alang ning chelarlelo. Alang kematha phar pamelo lapen aphi chelanglelo.

²⁹ Arki pen amat losei kardon atum lapen thai ke-ap atum an katpo. Ajehak atum nampi lutpo, lapen halahei along baduta dodedetpo.

³⁰ Jerusalem, nang kevirlo! Kopisi nang pe ke-er chingthang-loma? Kopisi nang dorson chingthang-loma? lapen nang mekkung chehi loma? Nangmethang alon kechepi thang ale ave! Nangning kedok abang nangdundetang-lo lapen nang kepathiji aning hang-lo.

³¹ Kechiru ase ne arjulong-lo, arlosole aso amahang kepathek ahut ason, aso amahang kepathekcheng akar-em ason. La Jerusalem akechirulo, achethe kevangji aphan kechardak, ari phajongtingsi hang-lo, “Ne virtang-lo! Latum nekepathijisi vang-lo!”.