JEREMIAH 30 - BAIBEL KANGTHIR (BSI)

Arat Aso Aphan Hemphu Kechak

¹ Israel a-Arnam Hemphu,

² neliphan pulo, “Ne nangkethan athetin epak aloh along tok-etnon,

³ pima Israel lapen Judah, nerat aso aphan kangthurjisi apor nangle tang-lo. Aphusar atum aphan Ne kepi alongle along Ne latum aphan puthot chepahemphu longthupo. Ne, Hemphu si keningjelo.”

⁴ Israel lapen Judah arat aphan Hemphu pulo:

⁵ “Kephere kehangphrak ase lapen ningkangsam akechiru kali.

⁶ Non ingtonnon lapen mathanon! Pinso amonit aso mahang pathek thekjima? Tangte Ne kopisi abangphutin apinso arlosole aso mahang kepathekji ason apok keche-otjulo? Kopisi abangphutin ta angtur krengtailo?

⁷ Isi kepherememe arni vangbomlo; lapen akaprek arni pen la pangbar un-e nerat aso aphan isi ning ke-oi arni bonta latum rengji.”

⁸ Jakongkethe Hemphu pulo: Halaso arni nangkele ahut, halatum achethok ajuali Ne ing-lokji lapen halatum arri terekji, lapen latum bidet aso aban plang nangnelo.

⁹ La alar, Ne Hemphu, halatum a-Arnam aphan ingdukpo, la-pen David aso aphan Ne recho batji.

¹⁰ “Nerat atum, phereri; Israel arat atum pherephrat nangne kehelo adet pen Ne nangtum aphan nangpajokpo, nangtum ban kedo adet pen nangpajokpo. Nangtum hem chevanglongji, lapen ningkangsam pen dolongji, nangtum jokvanji lapen baduta nangtum aphan paphererelo.

¹¹ Ne vangsi nangtum aphan pajokpo, nangtum aphan nangkehijikjam adet an Ne pavir-etji, Bonta nangtum aphan Ne nang pavirve. Ne nangtum aphan aduk pipepin pen Padamlong-le. Bonta Ne aduk nangkepi ahut Ne langpameji. Ne, Hemphu si keningjelo.”

¹² Arat aphan Hemphu pulo, “Nangtum areng amek me un-e, nangtum areng keso memelo.

¹³ Nangtum aphan baduta kelana abang avelo, nangtum kemeji aphan ningthethe.

¹⁴ Nangtum aphan ningkedok atum nangtengne-et-lo; latum nangtum aphan mathathepinlo. Hotur asonsi Ne nangtum aphan tengkheng-lo; Nangtum aduk dopik-lo pima nangtum apap ongdung apot lapen nangtum kehingno thepik.

¹⁵ Nangtum keso apot pasimuri; nangtum aphan pame un-e. Lasonsi Ne nangtum aphan aduk nangpilo Pima nangtum apap ongdung Lapen nangtum kehingno thepik.

¹⁶ Bonta, non nangtum aphan kepavir atum aphan pavirdetpo; lapen nangtum ahotur kedo-an aphan ban bengpon-etpo. Nangtum aphan kechenek atum an aphan chenekpo, lapen nangtum aphan kethipon atum an aphan thipondetji.

¹⁷ Nangtum aphan Ne puthot pamesenpo; Ne nangtum areng amek pamepo, Nangtum ahotur le ‘Zaion turchorlo; lapen lang abang avelo,’ Pu pujo seta, Ne, Hemphu si keningjelo.”

¹⁸ Hemphu pulo, “Ne rat aso aphan Ne amethang adet pachedo longthuji, adontin aphan Ne ingjinsoji; Jerusalem kimthuji, lapen la rechohem padothuji.

¹⁹ Hadak kedo arat atum kero alun lunji; latum aning arongsi hangjoji. Ne ahirjume pen ajok latum aphai pachanji; Ne ahirjume pen ajok latum aman vanpo.

²⁰ Det hako ajakong ason Ne padothuji lapen la puthot pathe-thu-o-ji latum aphan kechenek abangphan Ne aduk piji.

²¹ Halatum pangribang amethang akhi pen vangpo, halatum arechoso halatum amonit pen nangklangpo.

²² Ne kepha ahut la nelong vangji, athema komatsi phaphepin pen vang haijima? Latum Ne rat aso plangpo, lapen Ne halatum a-Arnam plangpo. Ne, Hemphu si keningjelo.”

²³ Hemphu aningkethi ke isi ato-monpilo, kehingno atum aphuthak kehevengphak atomonlo.

²⁴ La aning kehang ateng klem patangtetik la jutjelo. Mo aphi Alang rat atum laso alam chini pamepo.