JEREMIAH 2 - BAIBEL KANGTHIR (BSI)

Israel Aphan Arnam Ke-ora

¹ Hemphu neliphan pulo,

² Jerusalem along abangphutin aphan bangso abirta kepachethangjisi pulo. “Nang riso ahut nang ko-an kekroithekthe loma, nangtum keche-encheng ahut nang ko-an nephan chinghonloma, ne chemathaloma; Kejejangtang ajo anta nang nephiphi nangdunlo, Ketiki ke pin ajota nang dunlo.

³ Israel, nang Nemarchot; nangke Nemar kangthir akhilo. Nangphan kephangno abangphan Kesung lapen kevir Ne toilo. Ne, Hemphu si pulo”.

Israel Aphusar Atum Apap

⁴ Hemphu abirta arjuhurtha, nang Jakob asomar, Israel akhei atum!

⁵ Hemphu pulo: “Nebe thursi nangphusar atum kopilo Nephan kedin? Latum aphan kopi athesi latum Ne pen kesuilo? Latum amokevangve akumlin-heihei archosi amethang amovangvedet-lo.

⁶ Ne halatum aphan Ijip pen pajok seta latum Nephan mathathepin, Lasi kejejangtang ajo japonlo: Isi kejejangtang alongle ajo lapen sangtimili ajo, kekrengkrai lapen kepherememe alongle hadak baduta dode lapen baduta kedamde ajo.

⁷ Aho-or kedo alongle alongsi Ne latum aphan vanlo, latum athe-heihei lapen akaprek akeme ason kepacho longji aphan. Bonta kalilesi Nelongle latum phangnolo, latum aphan kepi adet latum pasa-urlo.”

⁸ “Kurusar atum arjudun long-lo, ‘Hemphu konat-lo?’ pu. Nemethang akurusar amat ta nephan nechininedet-lo. Kepangri atum nebe thurtang-lo; kemontri atum Baal amen pensi ningjerong-lo, lapen ale kavepin akumlin-heihei aphansi archolo.”

Arat Abethursi Hemphu Lam Kechedan

⁹ “Lasi Ne, Hemphu, Nerat abe thursi lam vanlo. Halatum aso-asu aphuthak lam vanlo.

¹⁰ Saipras alanglom nichi anat damra, lapen nihang kedar anat inutbak aphan toinon. Nangtum thek-longpo lapuson aphrang plangple-pinlang.

¹¹ Badu akheita a-arnam-heihei chelarle, halahei ahok kalidet seta. Halatum aphan aman kevanpi Arnam pen halatum aphan thangta keklempi thekthe a-arnam penpen Bonta Nerat atum Nelar det-lo.

¹² Lasi sining inghun kepherememe pen kepaklemhurjisi Ne hukum pilo, kepamong-loi lapen kepamanghuji aphan,

¹³ pima Nerat atum sonni apap klemtang-lo: Latum Ne pen suitang-lo, kereng-i alang amek Ne pen suitang-lo, latum langtuk hut-lo, kehang alangtuk, lang kedode alangtuk.”

Israel Akekroithekthe Athe

¹⁴ “Israel ke banbi aso kali, la banbi keplangjile mahang kethek kali. Tangte kopi athesi ahotur atum laphan kerivung-lo?

¹⁵ Laphan hingho asonsi latum ingnorlo, la alongle halatum parongman det-lo, la arong-heihei parusi pa-o-et-lo.

¹⁶ Kalang, Memphis lapen Tahpanhas amonit atumsi la aphu panghang-lo.

¹⁷ Israel, la nangmethangsi chorilo! Nang Nephan ne-olo, nang Arnam Hemphu aphan, Nangphan tovar nangjaponbom ahut.

¹⁸ Nang kopisi mathalo, Ijip kedam pen kopilo kelongpo? Nil aroi pen lang kejunjima? Assiria anat kedam pen nang kopi longji pu mathalo, Euphratis pen lang kejunjima?

¹⁹ Nangmethang kehingnosi nangphan aduk inghoipo, lapen Ne pen nang kesui ke nangmethangsi chekhindepo. Nang Arnam, Hemphu, nephan neke-o lapen ne kekroithekthe ko-an ma keho lapen la kechokche nang chechinipo. Ne Jakongkethe Hemphu si keningjelo”.

Hemphu Aphan Israel Karchomo

²⁰ Muluk a-Hemphu pulo, “Israel, aphrang pen nang nejakong dengdelo; nang Nephan kekroiji lapen karchoji molo. Inglong kangtui alongtin lapen kelirseng athengpi arumtin nang ho-or arnam-heihei aphan archotang-lo.

²¹ Akemenei kangvaitang adrakha achili pen ke-e asonsi Ne nangphan elo. Bonta chelangtha nang kopi plang-loma! Nang ke isi kethutang alekave arikang asonlo.

²² Nang kekhornei asabon pen chingroi seta, nang dai Ne nangthek-longbom jilang.” La Hemphu Arnam si kepulo.

²³ Nangmethang chepasa-ur-e pu kopusonsi kechepu unpo? Chelangtha nang kosonsi arlok along pap klemloma; Chelangtha, nang keklemtang ason. Nang ke arni keso ahut nampi aka-ut asonlo, ehin ehin kangplong,

²⁴ sangtimili ajo lutchok. La arni aluk pholote, komatsi laphan unpo? Laphan aningkehang alo jokta amethangsi chepasungrongpo; Kar-i apor ahutsi la doverchot.

²⁵ Israel, nangkengpak angse dong-ri, mate akaprek a-arnam aphi-phi kehung-ra nang langjoi chepakrengtairi. Bonta nang pulo, “Kali! Ne chirui un-elo. Ne bidet arnam-heihei aphansi chinghonlo, lapen lahei aphi-phi dunpo.”

Israel Aduk Kephonangji A-ot

²⁶ Hemphu pulo, “kenep longchek ahut, kanghu ketheraknang asonsi nang Israel kedo-an arat theraknangpo: Nang recho atum, lapen nang chakri atum, nang kurusar atum lapen nang montri atum antalo.

²⁷ Nangtum kedo-an theraknangpo, nanghem athengpi helo nangtum apolo, lapen arlong ke nang peilo pu kechepu atum an la plangji, nang Nedung kevangji kali Ne pen suithurong-lo. Bonta nangtum kesung pholote, nangtum Nelong kevang pen ajok kelongji aphan hang-lo.”

²⁸ Nangtum nangmethang aphan keselam arnam-heihei konat-lo? Nangtum sung-lote, unte latumle nangpajok lonang! Judah, nang rongsopi kedo-o asonthotsi arnam-heihei ta do-o.

²⁹ Nang kopilo kepasimu? Kopi nang Ne be kethurlo?

³⁰ Ne nangphan aduk nangpilo, bonta la memedet-lo, nangphan Ne nangpakeng long-le. Kangrong ahingho asonsi Nemontri atum aphan nang pathilo.

³¹ Israel arat atum aphan Ne kejejangtang ajo ason paplangma, isi kangtingkuk lapen kepherememe alongle asonma? Kopi apot, tangte kopisi nangtum nang ning kehang aling keklemlo pu kepu athelo, lapen kai seta nelong vangvedetpo pu kepulo?

³² Inut a-okarjang adorson mate penan kedo abang piso kepangri ape-ari tengne unjima. Bonta, Nerat atum halatum un, la aparta ongdung arni halatum Nephan tengnedet tang-lo.

³³ Nangtum chini kosonsi aningkedok abangphan hungdun nangjima. Kehingnonei a-arloso jokta nang pen charli un.

³⁴ Nangpe-heihei keduk lapen adaikave atum avisi chebonkung-lo, kanghu atum avi kali. Bonta la aparta,

³⁵ nangtum pulo, “Ne dai ave; Hemphu Nephan aning thithepinpo,’ bonta Ne, Hemphu si aduk nangpipo, pima nang pap klemtang-lo pu chekrongkre.

³⁶ Nangtum bang adet-heihei a-arnam arat kesuidun pen ajok nangmethang aman chepavelo. Ijip nangtum aphan ning pathethelo, Assiria pen nangtum kelong asonthot.

³⁷ Nangtum Ijip pen suipo. Ne Hemphu si nangtum kechiki atum aphan dengdelo; halatum pen nang thangnat akerap longledetpo.”