JEREMIAH 16 - BAIBEL KANGTHIR (BSI)

Jeremiah Akai Aphan Hemphu Aningkehang

¹ Puthot Hemphu neliphan ningje-thulo, lapen pulo,

² “Laso adim piso enri lapen osomarta pachanri.

³ Ladak mahang kethek a-osomar lapen api-apo atum kopi plang poma Ne nangthanpo.

⁴ Latum kepherememe akeso pen thinangpo lapen baduta latum aphan chirure mate pippelo. Latum abang arpum longle athak ho-or angsom ason plangpo. Latum ron along thipo mate kangchir pensi thipo, lapen halatum abang arpum-heihei vo lapen marat api atum a-an plangpo.”

⁵ Kechiru kehangjo ahem nang lutdam nangne. Badu aphan ta ningduk-ri. Ningkangsam pen nerat aso aphan Ne pahirjumemelo mate latum aphan kanghon lapen kangjinso paklangklelo.

⁶ Laso adet keplang lapen keduk ta thinangpo, bonta latum aphan baduta pip abang avelo mate latum aphan chirupi abang avelo. Aning ke-oi chepaklangji aphan baduta areng cherotdutde mate chu chesoilorlelo.

⁷ Kechinghonnei abang kethi ahut baduta aning kepangsamji aphan cherap-relo lapen junraprelo. Baduta kangjinso paklangklelo, apo mate apei thilot abang aphan jokta.

⁸ Kechopi amei kedo ahem lutdamri. Kecho-kejunjile halatum pen ingnirap-ri.

⁹ Ne, Jakongkethe Hemphu, Israel a-Arnam kopima kepule arjunon. Ning arong arki lapen kechehok arki lapen piso kepangri arong-aje arki Ne pangsamriji. Lahei kethek-longjisi hadak kedo arat atum vangpo.

¹⁰ La kedo-an alam halatum aphan kethan ahut, halatum nangphan nang arju tahai, kopi athesi Ne lapu-an halatum aphan aduk kepiji chesik-loma. Latum nang arjuji, kopi apran karmut adai kedolo, lapen a-Arnam Hemphu aphan langphlot kopi apapsi latum keklemlo pu arjuji.

¹¹ Anke halatum aphan nang thakdunnon, Hemphu pulo, “nangphusar atum Ne pen suitang-lo lapen akaprek arnam-heihei aphan ardomlo lapen ingduk-lo. Latum nephan ne-obup-lo, lapen ne kethan alam-heihei kroikredet-lo.

¹² Bonta nangtum ke nangphusar atum apar hingnothulang. Nangtum kedo-an nangning ingtang-ong lapen kehingno saide lapen nangtum Ne lam kroikrelo.

¹³ La apotsi, nangtum lapen nangphusar atum kechininepinlang adetsi nangtum aphan nangvarchorpo. Hadak nangtum ajo-nerlo akaprek arnam-heihei aphan ingdukpo, lapen Ne nangtum aphan thangnat akangjinso ta paklangklelo.”

Ban Kedam Pen Kechevoi

¹⁴ Hemphu pulo, “Israel arat aphan Ijip adet pen kevan abang kereng-et Arnam, ne men pen rat atum seme ketangtedetji ahut nangletang-lo.

¹⁵ La alar, Israel aphan nirep adet pen lapen Ne halatum aphan kehijik adet-heihei pen kevan kereng-et Arnam, Nemen pensi semetangpo. Latum aphan Ne amethang adet vanthudetpo, Ne phusar atum aphan kepi alongle adet along. Ne, Hemphu si keningjelo.”

Kevangji Aduk-Kanghoi

¹⁶ Hemphu pulo, “Lahei arat aphan vang pen kepanepjisi ok-keri atum Ne nangtoipo. Nahok anglongpitin lapen inglongsotin lapen longku-longdang ajo keparijsi sekari nangtoipo.

¹⁷ Latum keklem asontin Ne thek-long-lo. Ne pen thangnatta patu un-e; Ne mek angden pen latum apap jok un-e.

¹⁸ Halatum apap-heihei lapen akehingno apot phanni pasoji, pima latum Ne longle achethe kave kethitang abang arpum lapen kumlin-heihei pen pasa-urlo, lapen halatum ahok-he arnam-heihei pen la paplengset-lo.”

Hemphu Aphan Ning Kechethe Jeremiah A-Kardom

¹⁹ Hemphu, Nangsi neli railo, lapen jakong nepilo; neli kesung ahut Nang nerap-lo. Det atum pirthe kejut pen vangsi pupo, “netum aphusar atum thangta kali, bonta alekave akumlin-heihei chot.

²⁰ Inut amonit amethang arnam-heihei cheselam unjima? Un-e, jongsi alang klem lote, latum ahokpet a-arnam kalilo.”

²¹ La apotsi, Hemphu pulo, “Ephong-pet Ne jakong lapen kangtang adet atum aphan pachinipo; anke latum Ne Hemphu lo pu chinipo.”