JEMS 5 - BAIBEL KANGTHIR (BSI)

Keplang-o Atum Aphan Kepacheretoi

¹ Keplang-o atum, nanglitum neli lam arjutha! Nanglitum mo kephoji akesung hei hei pen apot chiru chernapnon.

² Nanglitum akhi thuvokji, lapen nanglitum ape angki cho-etji.

³ Nanglitum aser lapen arup angru vang-etji. Labangso angru nanglitum aputhak haki piji, lapen me asonsi la nanglitum a-ok chodetji. Mo kejut arni ahut aphansi nanglitum akhi chebirtilo.

⁴ Nanglitum asok tepli kerot atum aphan nanglitum anam pipelang. Halatum nanglitum aputhak kehangjo ase arjutha! Nanglitum asok tepli kerot atum kechiru ase muluk a-Hemphu, Arnam arjulong-lo.

⁵ Nanglitum ladak pirthe athak ke thangta min nangne, lapen rengdok rengni pen dolo. Mo kethuji a-arni aphansi nanglitum abang chepaleng-lo.

⁶ Nanglitum ado kavedet atum aphan ado padothapsi pathilo, lapen halatum ke nangdodunjoilo.

Kechepaningding Lapen Arnam Kardom Alam

⁷ Lahelo korte marli atum, Hemphu vangvetik-ke nanglitum chepaning-dingnon. Sai ketiki abang amethang alongle pen sok athe keme kelongji aphan kopusonsi chepaningding-loma, lale mathatha. Alangli kejangcheng arve lapen kejang padu arve aphan inghong chepaningding-lo.

⁸ Nanglitumta chepaningding nangji. Nanglitum ning theklong pen donon, pima Hemphu kevangji arni tebok-het-lo.

⁹ Korte marli atum, Arnam nanglitum aphan adai nangkepado longledetji aphan nanglitum lahin lahin aphan chepasimuturtarri. Jo, Kangsai a-Bang inghap along an nangletang-lo.

¹⁰ Hemphu amen pen kethan atum, atheke Arnam amontri atum kechepaningding pen keduk kesung kechechakke nanglitum kechar-lidun nangji alamlo pule nanglitum mathanon, korte marli atum.

¹¹ Keduk kesung kechechakthek atum ke hirjume kelong atheng pusi ilitum pulo. Job keduk kesung kechechakthek alam nanglitum arjulong-lo, lapen aphisi Hemphu alangliphan kepithu alamta nanglitum chinilo. Pima Hemphu-ke kanghon lapen kangjinso parpik abang-lo.

¹² Bonta kadokave alam apar, korte marli atum, nanglitum seme tangri. Sining amen pen tame, longle amen pen tame, mate ajat amen pen settame, nanglitum seme tangri. Bonta nanglitum aphan adai nangkepado longledetji aphan nanglitum kali tangte kali, lapen Kalang tangte Kalang pule punon.

¹³ Nanglitum angbong kesung kepho abang doma? Alangli Arnam papardomnang. Kechehok abang doma? Alangli kero alun palun nang.

¹⁴ Nanglitum angbong keso abang doma? Alangli mondoli akesar atum aphan papangrum nang, lapen halatum alangliphan jangthu pahira Arnam pardompinang.

¹⁵ Kekroi pen akardom keso abang aphan pamepo, lapen Hemphu alangliphan pathurpo; lapen alangli jongsi pap klemdet-lo tangte alangliphan diyadetpo.

¹⁶ Tangte nanglitum akeso kemedetjile nanglitum lahin lahin angno pap chekobirra Arnam chardompi seroinon. Dhoromi amonit akardom ke ajakong the-o.

¹⁷ Elija jokta ilitum asonthak thak amonit-lo. Arve kepajangjedetjisi alangli jasemet Arnam ardomlo, lapen ningkan kethomra ebeng arve jangjedet-lo.

¹⁸ Alangli Arnam ardomthusi sining pen arve jang-lo. Ansi longleta sok hei hei pakhaisi athe pathelo.

¹⁹ Korte marli atum, nanglitum angbong komane abang jongsi ahok pen suitang-lo, lapen komane abang alangliphan ahok along nangpachi-ruithulo tangte,

²⁰ papi abang aphan pap pen aning kepachirui abang ke hala papi abang akarjong aphan kethi pen pajokpo lapen alangli ake-ongpi apapta diya palongpo.