JEMS 3 - BAIBEL KANGTHIR (BSI)

De Kechekhang Nangji Alam

¹ Korte marli atum, nanglitum kethan atum cheplangpetri. Pima anut kaprek atum aphan apar ilitum aphan, atheke kethan atum aphan kangsai aron pasomuchotji, lake nanglitum chinilo.

² Pima ilitum kadokaveta penang akelet do. Bonta komane abang jongsi lam keningje letlepinlo tangte alangli ke kechok-lim abang-lo, lapen alangli ke amethang abang a-ok athan anta anem che-en unlo.

³ Ilitum aning kehang aling nang-kepakroidunji aphansi ilitum losei angho ingchin ani pang-omlo, lapen lasonsi ili ning kehang aling losei aphan padamlo.

⁴ Telongpi alamle mathatha, lake thepik lapen tomonle jappon setta asapso alongpi pen la aphan pakek pakang unlo, lapen lasonsi kevekpon abang aning kehang aling la aphan pon unlo.

⁵ De-ta lasonthak thak-lo, lake bihek setta kam kethe klem pu chepindakthek. Asapso ame adeta nampi chodet un, lale mathatha!

⁶ De ta me asonthak thak-lo. Lake ebang arpum along kedo akehingno apirthelo. Lake ilitum aphan pahing-nothek. Labangso ade ke chom ame pen ilitum akai pasek-lunthek.

⁷ Marat api an, vo ajat do an, apok pen keklim api an lapen talo arlo kedo api an aphan monit atum anem en un, lapen anem enta enbomlo.

⁸ Bonta badu amonitta de aphan ke anem en un-e. Lake kekhang un-epin akehingno amar lapen abikarlo.

⁹ Ilitum labangso ade pensi e-Hemphu lapen e-Po aphan ro archolo lapen Arnam a-arje asonthot kepinchongtang amonit atum aphan hirjunota pilo.

¹⁰ Isipet angho pensi hirjume lapen hirjuno alamta nangpabarlo. Korte marli atum, lason ke chokche!

¹¹ Isipet alang amek penke kejun mesen lapen kejunnodak alang nang ingbopthekthe, kalima?

¹² Korte marli atum, thebo arong ke Jit athe pathe thekthe, kalite drakha arikang ke thebo athe pathe thekthe; lapen ke kedok-lui alang amek ke kejun mesen alang nang pangbop thekthe, kalima?

Angsong Pen Kevang Agian

¹³ Nanglitum angbong giani lapen kethek kere abang doma? Alangli amethang a-ot adur keme pen lapen amethang agian pen ajok keplang asotdut a-ot pen keklem akam penle aporman pacheklang nang.

¹⁴ Bonta nanglitum jongsi bang aphan kelang selet, kelang un-e lapen nanglitum methang kechemathalokchot aning do tangte nanglitum methang agian pen apot chepindak-ra ahok alam paturi.

¹⁵ Lason agian ke sining penle kevang kali, lake pirthe agianlo. Lake ok aning kehang lapen hi-i pen kevang agianlo.

¹⁶ Kechelang un-e lapen amethang kechemathalok dolote hadak ke dosojo, lapen kehingno akam an do.

¹⁷ Bonta sining pen kevang agian ke ingthir-et, ning kangsam do, asotdut, chingkimesen, kangjinso do lapen kam keme athe pathe. Lake kelangret kelang-ai lapen ning ke-ik ave.

¹⁸ Ning kepangsamthek atum ning kangsam pen kerik achili pensi ot keme athe pangrumlong.