DANIEL 9 - BAIBEL KANGTHIR (BSI)

Daniel Amethang Arat Aphan Arnam Kardompi

¹ Ahasuras asopo, Darias, la Medi asor Bebilon aputhak recho cholo.

² Alangli recho kecho kecheng aningkan, neli loh kangthir-heihei kangchap ahut, Hemphu amontri Jeremiah pen ajok keputang ateng ningkan throksi kep aphi Jerusalem kevir nangji alam neli mathalo.

³ Lapen Hemphu Arnam aphan kardom pen, an-kehum pen, thoila ape keche-um pen, lapen thek-lo athak-heihei kangni pen neli choningripik-lo.

⁴ Neli ne Arnam Hemphu aphan choningrilo, lapen nerat atum apap-heiheita chekobirlo. Neli pulo, “Hemphu Arnam, Nang thepik, lapen netum Nangphan man pi. Nang kechejok alam aputhak Nang kekroithirklong, lapen Nangphan kechinghon lapen Nanglam kekroi abangphan chelarlepin akanghon paklang.”

⁵ Netum pap klemlo, netum hingnolo, netum chokche akam klemlo. Nang kepaklemtoi akam netum molo, lapen Nang keme Nangpaklang ason pen suilo.

⁶ Netum arecho-heihei, netum kepangri atum, netum aphusar atum, lapen netum akhei aphan Nangmen pen keningjebom amontri Nangban atum alam netum arjudun long-lo.

⁷ Nang Hemphu, kaike keme si klemver, bonta netum kaita Nangphuthak Nangnong pajunover. Judia, Jerusalem along kedo lapen tebok-terei-heihei Nang kehijikcho a-Israel atum aphan la ahok-lo, pima latum Nangphan kroithipthe det-lo.

⁸ Netum arecho atum, netum kepangri atum, lapen nephusar atum ketherak akam klemsi Nangbethursi pap klemlo, Hemphu.

⁹ Netum Nangbethurlo seta Nang ke ingjinsopik lapen diyapik.

¹⁰ Nangban montri atum pen Nangkepitang aron-heihei ateng pen keklem nangji pu kepu netum ano chevarvedet-lo, O Hemphu, netum Arnam.

¹¹ Israel kedo-an Nang aron-heihei ingdilo lapen Nang kepu alam netum arjudun long-lo. Netum Nangbethursi pap klemtang-lo, lapen Nangban Moses ketoktang aron atengsi netum netum aphuthak Nang hirjuno vanlo.

¹² Nang kopisi pu tang-loma netum lapen netum kepangri atum aphan klemlo. Pirthe athak kedo-an arongsopi apar Jerusalem aphan Nang aduk pi muchot-lo.

¹³ Moses aron along kejong aduk an netum aphan pilo. Bonta nonjokta, O Hemphu netum a-Arnam, netum pap-heihei pen suisi mate Nang ahok atovar kehungdun pen ajok Nangphan ningpangsamji bor-i-edet-lo.

¹⁴ Nang, O Hemphu netum a-Arnam, Nang netum aphan aduk-kepijisi chesik-lo lapen Nang klemlo, pima kaita Nang keklem chok-lim lapen netum Nang arjudun long-lo.

¹⁵ O Hemphu netum a-Arnam, Ijip pen Nangrat atum aphan kevan pen Nangjakong non anta netum aning dolang. Netum pap klemtang-lo; netum kechokche klemtang-lo.

¹⁶ Kedamtang arni Nang netum aphan railo, la apotsi Jerusalem aphuthak Nangning thiver Nangnelo. La Nangrongsopilo, Nang inglong kangthirlo. Adung arei adet kedo-an Jerusalem lapen Nangrat atum aphan langremlo, pima netum apap lapen netum aphusar atum keklem kehingno apot-lo.

¹⁷ O Arnam ne kardom lapen kechoningri arjutha; keparutang Nang Kardomhemthepi ingthurthunon; ingthur non, la-ansi anut-tinta Nang Arnamlo pu chinipo.

¹⁸ Netum aphan arjutha O Arnam, nelangtha lapen netum akesung rongsopi akechechaknang Nangmen aphan junolo. Netum Nangphansi ardomlo, pima Nang kangjinso-thekpar, netum keklem mesen apot lapu kali.

¹⁹ Hemphu ne arjutha. Hemphu nediyatha. Hemphu ne arjura klemtha! Anut-tinta Nang helo Arnamlo pu pachiniji aphan, panglenrinon! Labangso arongsopi lapen lahei arat ke Nang-lo.

Gabriel Kemontri Alam Kethan

²⁰ Ne ardombomlo, nepap kedo-an lapen nerat Israel apap-heihei an chekobirlo, lapen amethang Kardomhem kangthir kangthurjisi Hemphu ne Arnam angno choning-riparlo.

²¹ Ne kardom un-ahut, neli aphrang kethek-longtang, Gabriel Nang-ingjarsi neli kedo adim vang-lo. La arnikangsam athok kepajir aporlo.

²² Alangli nethanlo, “Daniel, ne ladak kevangke kemontri alam nangphan kepachinijisi kevang-lo.

²³ Nang Arnam aphan kechoningri un ahut, Alangli nangphan thak-lo. Alangli nangphan chinghon, lapen ne nangkethan alam nangno chedentu.”

²⁴ Throksikep phan throksi aning-kan ajirkeding nangrat atum aphan kepajokji lapen nang kangthir arong-sopi pap lapen kehingno pen kepajokji aphan Arnam apor pathik-lo. Pap diya dopo lapen ahok akangsai kaike aphan sengdet-lo, lasi kethek-long ason lapen kemontri alam chekokpo, lapen Kardomhem kangthir puthot hodaithupo.

²⁵ La ningchebi-ra la chininon. Jerusalem kekimthuji aphan kepi ahukum, Arnam kangvaitang asongja vangvetik an ningkan throksi phan throksi apor dampo. Jerusalem ke tovarpi-heihei lapen kethir apaisong pen kimthupo, lapen ningkan throk-kep-ra hini phan throksi an thirpo, bonta la isi kesung-heihei apor plangpo.

²⁶ Lapen kejut apor ahut Arnam kangvaitang songja aphan ahok-he pen pathilotpo. Rongsopi lapen kardomhemthepi ta jakong kethenei ketengkheng amuluk kepangri abang pavirdetpo. Kejut langthepi asonsi vangpo, Arnam kethiktang aron lapen akevir vangpo.

²⁷ Ningkan throksi ongdung arat pen halabangso kepangri abang chepameji, lapen la ebeng apor damlote, la athok lapen dan-heihei pavedetpo. Kehijimpik akepherememe kardomhem kangtuinei adim batpo, lapen hadak la aphan kepajutkokjisi Arnam kethiktang Abang aphan chetongtetik la doponpo.