DANIEL 6 - BAIBEL KANGTHIR (BSI)

Daniel Hingho Angthor Arlo

¹ Det adang an kam kechepahemphu ponji aphan Darias bang 120 a-Govornor kebatji aphan pathik-lo.

² La apar alangli Daniel lapen kaprek banghini a-Govornor aphuthak kelang lapen recho aningkehang akam-heihei kepalangjisi alangli ingvailo.

³ Kaprek a-Govornor atum aphan kelang atum mate akaprek a-Govornorkethe atum apar Daniel klemthek muchot pu Daniel paklang-lo. Alangli kelitdong anong pen ajok recho det adang akam alangli phuthak bat-lo.

⁴ La apotsi Daniel aphan det kechari akam kehonthe dunjisi kaprek a-Govornorkethe atum aphan kehang lapen govornor atum avarsai rilo, bonta halatum longle det-lo, pima Daniel inut chikiklong atheng lapen kechokche mate kechopap akam alangli klemkle.

⁵ Halatum angbong lahin lahin chepulo, “Dhorom pen kecherap ason kalite Daniel aphan kebokji ason longlelo.”

⁶ Lasi halatum recho along damlo lapen pulo, “Darias, recho, nangli chethe an sose padingnang!

⁷ Nelitum govornor kelang atum, govornor atum lapen adun a-Govornor atum lapen kaprek asaikhi atum nangli isi aron pachethang nangji aphan chedonsarlo, lapen la pasodak nangji pusi nangli det kechari atum lam paraitang-lo. Badutame ni thomkep angbong amethang a-arnam mate recho pen apar badu amonit pen pachohanghe nang pura hukum pi-iknon. Labangso ahukum kekroikre abangphan hingho keplengset angthor arlo varchor nangji.

⁸ La apotsi recho nangli lason aron sengnon lapen la aphuthak nangli angthek tok ikdetnon, lapen la aron ateng dampo, Medi lapen Parsi atum aron phri un-e.”

⁹ Lapen Darias recho hukum aloh tokdet-lo.

¹⁰ Hukum toktang-lo pu chinisi Daniel ahem chedamjuilo. Alangli hemthengsong angdeng hadak Jerusalem anat kepangno inghapso-heihei do. Hadak kaike alangli keklemver asonsi alangli inghapso-heihei ingpuvaksi akengphu patongruilo lapen arnisi batai kethom Arnam aphan ardomlo.

¹¹ Hotur atum Daniel Arnam kardom thek-longsi,

¹² halatum kedo-an Daniel aphan kebokjisi recho along damlo. Halatum pulo, Recho akehai, ni thomkep angbong baduta nangli pen mate amethang a-arnam pen kechoningri abangphu aphan hingho keplengset angthor arlo varchorpo. Recho thak-lo, “Kalang, isi ahukum pasodak-lo, Medi lapen Parsi atum aron phri un-edetpo.”

¹³ Ansi halatum recho aphan pulo, “Daniel, inut Judah pen kevan aban nangliphan man lapen nangli keseng-tang aron kroikre. Alangli arnisi batai kethom chardomver.”

¹⁴ Recho la arjulong-lok pen alangli-ning oilo lapen Daniel aphan kepajokjisi alangli kaprek kemenei atovar rilo. Arni ingsamse tik alangli ribomlo.

¹⁵ Ansi halatum amonit atum recho along vangthusi alangliphan pulo, “Medi lapen Parsi atum aron ateng recho kesengtang aron lar un-e-pu recho chini.”

¹⁶ Lasi recho ke Daniel aphan kepanepjisi hukum-heihei pilo lapen alangliphan hingho keplengset angthor arlo varchorlo. Alangli Daniel aphan pulo, “Nang kekroi pen kangdukbom a-Arnam nangliphan nangparailonang.”

¹⁷ Angthor angho along arlong angkleng pen ingthin-het-lo, lapen recho amethang recho angthek lapen alangli arleng kethe atum angthek arlong aputhak thengdet-lo, la apotsi baduta Daniel aphan pajok un-edetpo.

¹⁸ Ansi recho rechohem tikup chevoilo lapen amek jangjepin, an chochepin mate thangnat akerengme rirepinsi apor pathonlo.

¹⁹ Adapprang recho thursi hingho angthor anat damlo.

²⁰ Hadak lerok pen alangli-ning cheber un-esi hangserlo, “Kereng-et a-Arnam aban, Daniel! Kekroi pen kangduk a-Arnam nangliphan hingho pen nangpajok unloma?”

²¹ Daniel thak-lo, “Recho akehai, nangli chethe an sose padingnang!

²² Nephan phangno un-edetji aphan Arnam methang apherangke nangtoi si hingho atum angho pangko un-edet-lo. Alangli la klemlo pima Alangli chini neli thangnat adai ave lapen recho akehai, neli nangliphan thangnat kehingno klemkle.”

²³ Recho aning arongpik-lo lapen Daniel aphan hingho angthor pen kerungjisi hukum-heihei pilo. Lasi halatum alangliphan rungtang-lo lapen alangli Arnam aphan kechiki apot alangli thangnatta hingnonedet-lo.

²⁴ Ansi recho, Daniel aphan kebok amonit atum an aphan paneptoilo lapen hingho keplengset angthor arlo apiso-aso atum pen pen halatum aphan varchorlo. Halatum hingho angthor achitim lele ako halatum aphan hingho atum phangdetsi korlutlutsi arepi-heihei pa-oicholo.

²⁵ Ansi Daniel recho pirthe kedo-an adet akhei lapen alam-aki-heihei aphan loh tok-lo: Kardom!

²⁶ Ne hukum pilo, nedet kedo abangphutinta Daniel a-Arnam aphan pherenangji lapen man pinangji. Alangli inut kereng-et a-Arnam, lapen Alangli kaike seta pangriverpo. Alangli rat kaiketa pavir un-edetpo, lapen Alangli jakong kaiketa jutjedetpo.

²⁷ Alangli pajok lapen rai; Alangli pirthe lapen sining athak manghumeme angthek lapen manghumeme asin paklang, Alangli Daniel aphan hingho atum kepathiji pen pajok.

²⁸ Darias lapen Parsi arecho Sairas recho kecho ahut Daniel plang-olo.