DANIEL 5 - BAIBEL KANGTHIR (BSI)

Belshazzar Akecho-kejun

¹ Ningve isi Belshazzar recho, bangsuri isi arlengkethe atum aphan isi kethedung akecho-kejun amei pathik-lo, lapen halatum drakha ahor junrappet-lo.

² Halatum kejunbom un ahut, recho Belshazzar apo Nebukadnezzar, Jerusalem a-Kardomhemthepi pen kepontang ser-rup aharlung lapen harlungkethe-heihei arlo kepavanjisi hukum-heihei pilo. Recho halahei pavantoilo, athe alangli methang, arlengkethe atum. Alangli piso atum lapen alangli ke-enpangtar apiso atum lahei pen jun-ilongpo.

³ La aphijong amat ser aharlung lapen harlungkethe-heihei arlo van lo, lapen lahei pen halatum drakha ahor jun-ilo,

⁴ lapen ser rup, tam, ingchin, thengpi lapen arlong-heihei pen keselam a-arnam atum aphan chorolo.

⁵ Men men amat, monit ari ehong nangklang-lo lapen melur-heihei atur kethe-angnei adim recho ahem arpong along tok pangcheng-lo. Lapen la ketokbom ason recho ri thek-lok-lo.

⁶ Alangli mahang ik-kui lo lapen phere-ongsi alangli kengphu klemhurlo.

⁷ Mane inutbak mekbin atum, thek-kere atum lapen chiklolongso ke-lakhathek atum kepavanjisi alangli hangserlo. Halatum arlo vangpet ahut, recho halatum aphan pulo, “Mane jongsi labangso ketok porhethek lapen la athe-heihei nephan thanthek pulote, recho ape erring avamkok-heihei pen, man aser alek avaikang achethok along pa-iji, lapen det angbong kethom ajakong kedo abang plangpo.”

⁸ Recho aphan bidi kepi atum vang-lo, bonta halatum inutbakta ketok porhe thekthedet-lo, lapen la athe recho aphan than thekthe det-lo.

⁹ Ningrunhupsi Belshazzar Recho amahang ikkui muchot lo lapen alangli a-arlengkethe atumta pi klem nangjima chininedet-lo.

¹⁰ Recho lapen alangli a-arlengkethe atum kehorisai ase arjulongsi rechopi apei choran aboha arlo vang-lo. Alangli pulo, “Recho achethe ansose pading-nang! Nanglining chepasiksak-ri lapen mahang chep-ikkui nangne.

¹¹ Inut amonit nangli det arlo do, alanglilong Kangthir arnam-heihei akarjong do. Nanglipo recho kecho un ahut, labangso amonit aning mesen, gian lapen bidi arnam-heihei abidi asonthak thak. Lapen nanglipo, Nebukadnejar Recho, alangliphan kopai alam kethanthek, kemoithek, thek-kere, chiklolongso kelakhathek atum angbong akethenei bat-lo.

¹² Alang ke bang ke-un-epin ason ajakong do lapen reset lapen mang athe kethan, tomopatar kethak lapen kepatu alam-heihei paklang; la apotsi labangso amonit Daniel mate Belteshazar aphan hangnon, lapen alangli nangliphan la athe-heihei nangthanpo.”

Ketok Alam Daniel Kethan

¹³ Recho angno Daniel aphan prapjin pen pavanlo, lapen Daniel aphan recho pulo, “Nepo recho, Judah adet pen nangkevan a-Judia, Daniel pu nangli heloma?

¹⁴ Nanglilong Kangthir arnam-heihei akarjong dolo pu neli arjulong-lo lapen nangli asaikethek abang lapen kechinithek lapen bidi kedo abang.

¹⁵ Bidi kepi atum lapen ketok kepaporhejisi kemoithek atum aphan arlo vanlo lapen athe nepathan toilo bonta halatum athe riparsik thekthedet-lo.

¹⁶ Non ne arjulong lo nangli kepatu athe-heihei paklangthek lapen chini un-epin ason-heihei than thek. Nangli jongsi labangso aketok porhe thek lapen neliphan la athe-heihei kopima nethanthek pulote, nangliphan recho ape-ri ke-erring pen nangli pangchoipo, nangli chethok along aman aser alek avaikang nangli pa-ipo lapen det angbong kethom ajakong kedo abang nang paplangpo.”

¹⁷ Daniel thak-lo, “Nangli dan-heihei nangliphanle chebinon mate halahei bang kaprek aphanle pi iknon. Neli nangliphan kopi toktang loma nang porhe pipo lapen la athe-heihei nanglithanpo.”

¹⁸ Arnam kethe nanglipo Nebukad-nezzar aphan kethenei arecho paplang-lo lapen alangliphan man lapen adak-atur pilo.

¹⁹ Alangli pu-an thelo, det-heihei arat atum, khei-heihei lapen kaprek alam keningje atum anta alangliphan pherelo lapen klemhurlo. Alangli jongsi inutbak aphan pathiji ninghang-lo pulote, la alangli klemdet lo; jongsi alangli inutbak aphan parengji aninghang pulote, la alangli klemdet-lo. Alangli aningkehang alingsi man pilo, mate pinremlo.

²⁰ Bonta alangli chepindak-o, ningkluijui, lapen ningsedeng pangho, amethang apot alangliphan Alanglisi recho anghoi pen pasuntuk-lo lapen alangli man chepangbodet-lo.

²¹ Alangliphan monit arat pen phlungjuilo, lapen alangli-ning marat api ason plangnang-lo. Alangli nampi agadha api-heihei pen donang-lo, chainong alo ason bap chonang-lo lapen ar-e pen kejok kavepin kangthaidang hidi alongsi mekjang nang-lo. Bonta kejut Arnam kethe monit arat do-an pangrilo lapen alangli ning kehang alingsi halahei alangli kangvai abang aphan pilo pu alangli chinilo.

²² Bonta nangli alanglisopo, nangli la do-an chinipame seta chepabi thekthe det-lo,

²³ Nangli sining ahemphu abe thursi klemlo, lapen Alangli a-Kardomhemthepi pen kevan aharlung-heihei lapen harlungkethe-heihei pavantoilo. Nangli, nangli arlengkethe atum, nangli piso atum, lapen nangli ke-enpangtar apiso atum lahei pen hor jun-ilo lapen kelangthekthe mate karjuthekthe mate jatta kethekthe aser arup, atam, ingchin, thengpi lapen arlong-heihei pen keselam a-arnam-heihei aphan choro-ilo. Bonta nangli kerengji mate kethiji kephar abang lapen nangli keklem ason an kelang abang Arnam aphan manpipedet-lo.

²⁴ La apotsi laso alam-heihei kepatokjisi Arnam aripak nangtoilo.

²⁵ Lahelo Mene, Mene, Tekel Upar-sin, mate ketoktang alam “Lakhanon, lakhanon, ardi, kethak-heihei.”

²⁶ Lapen la athe ke: Lakha non, Arnam nang recho kechoji arni lakhatang-lo lapen la pajutdetpo;

²⁷ Ardi nang ardi alin along lintang-lo;

²⁸ kethak-heihei nang det thaktang-lo, lapen Media lapen Parsi atum aphan pidetpo.

²⁹ Paprapjin pen Belshazzar ke Daniel aphan recho ape ari ke-er pachingthangjisi ban atum aphan hukum pilo. Lapen achethok along man aser alek esang pa-ilo. Lapen alangliphan kethom det angbong ajakong kedo abang paplang-lo.

³⁰ Halabangso aningve amat Bebilon arecho Belshazzar aphan pathilot-lo;

³¹ lapen Darias, lake Medi abang ningkan throk-kep arta ahut recho kecho ajakong endet-lo.