DANIEL 12 - BAIBEL KANGTHIR (BSI)

Kejut Apor

¹ Pe-kanglit kechingchoi aphe-rangke pulo, “Halaso ahut nang monit atum aphan kerai apherangke kethe Maikel nangklangpo. Ansi khei-heihei keplang cheng pen ansose akesung-heihei apor nangdopo. Halaso apor nangkele ahut nangkhei amonit amen Arnam aloh along ketoktang an atum jokpo.

² Ongdung kethitang atum rengthusi: Ajehak kejut un-e chethe longpo, lapen ajehak atum kaike kangjinsolonglesi kesung phonangpo.

³ Kereset asongja atum sining akeklar kedo-an pen turbongpo, Lapen rat aphan akeme alam kethan atum chiklolongso-heihei asonsi kaike turbongpo.”

⁴ Alangli neliphan pulo, “Lapen non, Daniel, loh dipnon lapen la athak angthek pirthe jutjetik an thengthip-non. Laso angbong ongdung atum kechiniji bor-ipo lapen lahin lahin chedam unsi gian chanpo.”

⁵ Ansi neli banghini amonit langroi akung karjapding thek-long lo, parai-harai inut nut.

⁶ Halatum angbong inut abang langso kangtui along karjap apherangke aphan pulo, “Manghumeme akam komantusi kejut kavangji?”

⁷ Pherangke abang sining anat arihongni chirung-lo lapen kejut un-epin Arnam amen pen semetangsi pulo, “La ningkan kethom-ra ebeng an doji. Arnam arat atum aphan kechenek jut-lote, lahei kedo-an ason nangplangpo.”

⁸ Alangli kepu ason neli arjulong-lo, bonta la neli chininedet lo. Lasi neli arjulo, “Bonta akehai, la kedo-an kopusonsi kejutpo?”

⁹ Alangli thak-lo, “Nang non amat damnon, Daniel, pima lahei alam patujoinangji lapen kejut nangleletik an patu nangji.

¹⁰ Ongdung atum ingthirpo, kehingno atum chininelo bonta kehingno atum hingnobompo; kereset atumsi chini un chotji.”

¹¹ Arnivang athok kepave det arni pen lake kehijimmeme arni pen, 1290 arni an dampo.

¹² 1335 arni an kekroithirklong pen dosi kepar un atum an rengme!

¹³ Lapen nang Daniel, kejut anta kekroi chepathirklong-non. Ansi nang thipo, bonta apor kejut ahut nang nong-e kedengjisi thurpo.