AMOS 3 - BAIBEL KANGTHIR (BSI)

¹ Labangso alam arjutha, O Israel arat atum Hemphu nangbe thursi ningjelo, Ne Ijip adet pen kevan akhei an aphuthak alam:

² “Pirthe adang akhei an angbong Ne nangphansi chinichot; La apotsi nangtum adai-heihei apot Ne nangtum aphan aduk pipo.”

Montri Akam

³ Aphrang pen chepathikthete banghini amonit atum kosonsi kengkam kechejorrap thekpo?

⁴ Kechonep api avedet ahut hingho nampi ajo ingrongpoma? Hingho aloso thangta chochedet ahut angthor pen ase pathepoma?

⁵ Keparhi amar avete ejon avo longle athak phamsek along kloham poma? Thangnatta dandete phamsek longle athak pen phirpoma?

⁶ Rongsopi along pong-ut but lote, rat atum phereredet poma? Hemphu la klemklete isi arongsopi akevir vangthekjima?

⁷ Chenamsi Hemphu Arnam amethang aban montri atum aphan Alangli kedip alam paklangkle ako thangta klemkledetpo.

⁸ Hingho ingrongtang-lo, matsi phereredetpo! Hemphu Arnam ningjetang-lo; matsi montritre detpo?

Samaria Akevir

⁹ Assiria apaisong-heihei anat pachethangnon, Ijip lapen Ashdod adet apaisong-heihei anatta, lapen punon, “Samaria Anglong-heihei along nangtum chingrumnon, lapen la along kethenei akehorisei lapen la angbong akechenek-heihei thek-longpo.”

¹⁰ “Latum kechokpet akam kosonsi keklem nangjima chinine” pusi Hemphu pulo, Kehingno kepangrum abang lapen latum apaisong-heihei along kethipon amar kebi atum.

¹¹ La apotsi Hemphu Arnam lasonsi pulo: “Hotur det kompetpo lapen nang kechesong nangpen pavedetpo lapen nangpaisong-heihei lapen kedo adim anta phangno-etpo.”

¹² Lasonsi Hemphu pulo: “Biresak kevi abang hingho angho pen keng hongni kalite ano echet kelongdunchot ason thak-thaksi Samaria kedo Israel aratta hongplang ano lapen abengsi rai thekchotpo.”

¹³ “Arjunon lapen Jakob abe thurra haki chonon,” pusi muluk a-Hemphu Arnamsi kepulo.

¹⁴ “Ne Israel atum la aron-heihei kangdi pen apot aduk kepiji arni Ne Bethel adovan-heihei aphanta aduk pipo lapen dovan anu an chorpetsi longle athak klopo.

¹⁵ Ne barla ahem pen ningkreng ahem parupo; lapen ingnar aso pen kekim ahemta pavirpo, lapen hem kethe-heihei jutdetpo;” pusi Hemphu pulo.