2 SAMUEL 9 - BAIBEL KANGTHIR (BSI)

David Lapen Mephibosheth

¹ Arnisi David arjulo, “Sol ahemtun pen inutbak dolangma? Jongsi dolang pulote, Jonathon ajok ne la aphan kangjinso paklang ingtung.”

² Sol ahemtun aban Ziba pu inut amen do, lapen la aphan David along pavangtoilo. “Nangli Ziba ma?” Recho arjulo. “Nangli kepu akam aling aphansi chesik-lo akehai,” la thak-lo.

³ Recho la aphan arjulo, “Sol ahemtun aphan kanghon lapen kangjinso kepaklangji amonit mane doma, athe ne Arnam aphan chechakdet-lo.” Ziba thak-lo, “Jonathon asopo inut dolang, seta la akeng tekokjok-lo.”

⁴ La konat-lo? Recho arjulo. Lodebar along Ammiel asopo Makir ahemsi do, Ziba thak-lo.

⁵ Lasi David recho la aphan toijuilo.

⁶ Jonathon asopo, lapen Sol asupo Mephibosheth, vang-lo lapen David angno man kepijisi angphun patongkilo. David pulo, “Mephibosheth,” lapen la thak-lo, “Pu iknon, akehai.”

⁷ David pulo, “Nangli phereri! Nanglipo Jonathon ajok ne nangli-phan inghonji. Nangliphu Sol kechepahemphu alongle kedo-an neli nangvoithu-etji, lapen neli tebul athak an kechorapji aphan nangliphan kaiketa inghap ingpudang-lo.”

⁸ Mephibosheth, angphun patongkisi puthulo, “Kethitang amethan pen apar neli ningjoino mulo, akehai! Nangli kopi neliphan lapu-an inghon nangpoma?”

⁹ Ansi Rechoke Ziba, Sol aban aphan hang-lo lapen pulo, “Nanghemphu asupo, Mephibosheth aphan Sol lapen la ahemtun kechepahemphu ason an ne pitang-lo.

¹⁰ Nang, nangsomar atum lapen nangban atum nanghemphu Sol ahemtun aphan longle sai-tiki nangpo, lapen sok vanpisi halatum aphan an sikpi nangpo. Bonta Mephibosheth ke an kecho atebul along kaiketa inut alohi asonsi dopo.” (Ziba bang 15 asomar lapen bang 20 aban dolo.)

¹¹ Zeba thak-lo, “Nangli kepu atengsi neli klem-etpo, Recho.” Lasi Recho asomar atum asonsi Mephibosheth ke Recho an kecho atebul along chodunlo.

¹² Mephibosheth aso akebi inut do, amen Mika. Ziba ahemtun abangphu atum an Mephibosheth aban plang-lo.

¹³ Lasi Mephibosheth, akeng hongnita ketekok abang, Jerusalemsi dolo lapen la recho atebul alongsi an chodunverlo.