2 SAMUEL 8 - BAIBEL KANGTHIR (BSI)

David Ron Kehai

¹ Penang an arni aphi, David Recho Philistia aphuthak tengkhengthulo, lapen halatum aphan paremdet-lo, lapen det aputhak halatum kechepahemphu ajakong pavedet-lo.

² Ansi la Moab aphan paremlo. Longle athak keneptang atum aphan la bilo, lapen halatum bangkethom angbong banghini aphan ke pathilo. Lasonsi Moab atum la aber donang-lo, lapen la aphan midu pinang-lo.

³ Lapen la Siria atum Zebath pu adet aphan paremlo. Rehab asopo Hadadezer det aputhak kelangjisi Euphratis athak tovar kedam un ahut,

⁴ bang 1700 losei kardon aron-aso aphan lapen bang suri 20 akeklim aron-aso aphan nep-lo. Ron ahemkonglong alosei hum 100 dorphlup aphan losei bisi ahin kedo anke akeng patekok-et-lo.

⁵ Hadadezer Recho aphan kerapjisi Damaskas a-Siria atum esong ron-armu toilo, seta la aphan David tengkhengsi suri 22 amonit pathilo.

⁶ Ansi halatum alongri along la ron amukam kimlo lapen alangliphan midu pinang-lo. David aphan Hemphu nahok seta pahaiverlo.

⁷ Hadadezer achakri atum kerim ser achong-heihei David cherailo lapen lahei Jerusalem anat pon-et-lo.

⁸ Betah lapen Berothai, la Hadadezer kepangri arongsopi pen tam angchin pon-olo.

⁹ Hadadezer aron-armu kedo-an aphan Davidsi paremtang-lo pu alam Hamath arecho Toi arjulong-lo.

¹⁰ Lasi la asopo Joram aphan Hadadezer aphuthak David kehai apot kardom kechepidunjisi toilo, pima la pen Toi penang an abatai ron chedan nang-lo. David aphan Ser-rup lapen tam angchin pen keselam anong-e Joram ponpilo.

¹¹ David Recho lahei ser, rup lapen alangli keparemtang kaprek adet pen kelong amar pen pen Hemphu aphan hodaidet-lo,

¹² halahei ke Edom, Moab, Amor. Philistia, Amalek atum pen lapen Hadadezer, la Rehob asopo, lake Zobah arecho, pen kevan amar anlo.

¹³ Ingti Arlok along Edom asor aphan bangsuri 18 kepathi pen kechevoi ahut David anong aphrang an sose chethang muchot-lo.

¹⁴ La Edom adet angbong ron-armu amukam seng-lo, lapen hadak kedo arat atum la aber donang-lo. Hemphu-si David aphan nahokta pahaithorlo.

¹⁵ Israel adang an David pangrilo, lapen arat aso aphan kaita mesen lapen ahokpet pen pachoklemtoilo.

¹⁶ Zeruiah asopo Joab ke ron-armu anokbelo; Ahilud asopo Jehoshaphat ke ketok-heihei kebi ahemphulo;

¹⁷ Ahitub asopo Zadok lapen Abiathar asopo Ahimelek atum ke kurusarlo; Seraiah ke kangsaihem achunbang-lo;

¹⁸ Jehoiada asopo Benaiah ke David angphun kerai atum ahemphulo. Lapen David asomar ke kurusar plang-lo.