2 SAMUEL 7 - BAIBEL KANGTHIR (BSI)

David Aphan Nathan Abirta

¹ David rechoke amethang rechohemsi dolo, lapen la aphan Hemphu kedo-an ahotur pen pajok-lo.

² Anke Nathan montri aphan David pulo, “Langtha! Ladak ne ke kedar pen kekim ahemsi dolo, bonta Arnam kechejok Asinduk ke Pehem arlosi bibomlang!”

³ Nathan recho aphan thak-lo, “Nanglining kehang alingle klemnon, pima Hemphu nanglilong dolo.”

⁴ Bonta halaso aningve Nathan aphan Hemphu pulo,

⁵ “Damra Neban David aphan nesi la aphan kepulo pura than damnon, Ne kedoji aphan Kardomhem kekim nangji ke nang kali.

⁶ Israel arat aphan Ijip adet pen kepajok arni pen non an ta Kardomhem dodepinlang. Ne pehem alongsi do dunbomlo.

⁷ Israel arat pen Ne kedambom ahut jokta kedar athengpi pen kekim akardomhem kopi athesi ne kim pipedet-loma pu inutbak Ne kangvaitang ajalin atum aphan hanghe pinlang.”

⁸ Lasi Neban David aphan, Ne kangtangnei a-Hemphu-si kepulo, pura than damnon. “Ne nangphan hidi ajo biresak kevi pen nangponsi Israel arat aputhak pangribang nang paplang-lo.

⁹ Nang kedam aling Ne nanglong nangdodunlo, lapen nang paphrang bom ahut kedo-an nang hotur aphan Ne nangparempilo. Nangphan pirthe angbong akethenei ajalin atum angbong anong kethe ason nang paplangji.

¹⁰ Ne rat Israel aphan Ne isi kangvaitang adim sikpilo, lapen hadak halatum aphan padolo, lapen hadak halatum aphan baduta chenekne pin pen dolongpo.

¹¹ Laso alongle nangkelut ahut pen kehingno arat latum aphan tengkheng-olo, bonta lason plangthuthedetpo. Nang hotur kedo-an pen kepangraijisi Ne chechak-lo, lapen nangphan nangso-nangsu nangpipo.

¹² Nang kethi lapen nangphusar atum pen pen kepip ahut nangsomar angbong inut abangphan recho paplangpo, lapen laso adet pangtangrakpo.

¹³ La abangsi Ne Kardomhem kimpo, lapen la recho angthun padoverjisi ne pachinilorpo.

¹⁴ Ne ke la apo plangpo lapen la ke Nesopo plangpo. La keklem kechokche ahut, la aphan apo le asomar atum aphan aduk kepi asonthot aduk pipo.

¹⁵ Bonta Sol aphan keklem asonthot la aphan Ne akerap panonelo, pima Sol aphan neke-o-epin akanghon nang ingno kepondet ason ke la pen ke ponpelo.

¹⁶ Nang kaiketa nangso-nangsu doji, lapen nang recho arat kaiketa doverji. Nang recho anghoi kaiketa thirklongji.”

¹⁷ Nathan aphan Arnam kepaklem an ason alangli David aphan than et-lo.

David Kero Akardom

¹⁸ Ansi David recho Hemphu angno apehem arlo lutdamlo, lapen ingnilunsi ardomlo, “Nang nephan pi klemtang-loma la ne a-ot ave, keklem un a-Hemphu mate nehemtun ta a-ot ave.

¹⁹ Tebonseta nang non an sose si klemlo, ninghang alin klem un a-Hemphu; mo nonphi kevangji neso-nesu alam nang chechaktang-lo, lapen laso aphan inut amonit kepalang longjisi Nang siktang-lo; klem un a-Hemphu!

²⁰ Kopisi ne nangphan pujilang! Nangban aphan nang chini.

²¹ Lake nangning kehang-lo, la keklemji kemang nephan than pachinijisi nang lahei akethe akam klemtang-lo.

²² Nang ko-an kethe, ning kehang aling keklem un a-Hemphu! Nahokta nangson ave; nang inutpetsi Arnamlo pu netum kaita chini.

²³ Pirthe athak Israel ason adet nahokta ave, la aphan nangrat kepaplangjisi nang latum aphan ban pen pajok-lo. Latum aphan nang manghumeme lapen thedung thedung akam keklem pen ajok nang pirthe adang chethang-lo. Nangrat atum paphrang bom ahut akaprek akhei-heihei lapen halatum a-arnam-heihei aphan nang phlung-et-lo, lake nang methang arat kepaplangjisi latum aphan nang Ijip pen pajok-lo.

²⁴ Israel arat aphan nangmethang arat pu kaike aphan nang paplangtang-lo, lapen nang Hemphu halatum a-Arnam plang-lo.”

²⁵ Lapen non, Hemphu Arnam nephan kechak ason an kaiketa paplengnon lapen neso-nesu aphuthakta lapen keputang kepaplangji asonle klemnon.

²⁶ “Nang, thepik po, lapen rat atum kaiketa pupo, jakong kethenei Hemphu ke Israel aputhak Arnam lo.” Lapen nang netum aro ke kaike ahut seta neraiverpo.

²⁷ Jakong kethenei Israel a-Arnam Hemphu! Ne laso akardom nangphan kardomji ingthin chepathelo, pima nang lahei nephan paklangtang-lo, nangban aphan lapen neso-nesu atum recho cholongji pu nang nephan nethan-et-lo.

²⁸ Non lasi ning kehang aling keklem-un a-Hemphu nang Arnamlo, nangle kaita kechechak ason manghumeme ason chechak-lo.

²⁹ Ne nangphan neso-nesu aphuthak kepahirjumejisi choningrilo, anke halatum kaita nang pen akerap longverpo. Nang la ninghang aling keklem un a-Hemphu si chechak-lo, lapen nang ahirjume neso-nesu aphuthak kaiketa doverpo.