2 SAMUEL 6 - BAIBEL KANGTHIR (BSI)

Kechejok Asinduk Jerusalem Along Kevan

¹ Israel angbong kemenei aron-aso atum aphan David hangpet-lo, pangrumpet bang suri 30 amonit

² lapen Jakongthepik Hemphu amen kedo la arveng kedo api-heihei athaksi anghoi do, la Arnam kechejok Asinduk kevanjisi halatum aphan Judah along Baalah anat japonlo.

³ Halatum inglong angsong kedo Abinadab ahem pen la pondetsi hemkonglong kemi athak la thap-lo. Abinadab asomar Uzzah lapen Ahio si hemkonglong jalo,

⁴ lapen Ahio ke aphrangsi jalo.

⁵ David lapen Israel kedo-an atum kanlo, lapen Hemphu aphan aman kepijisi halatum ajakong kedo-an pen lun lunlo. Latum kumbeleng, kumchongdeng, cheng lapen mirdong prakso-heihei pen rolo.

⁶ Halatum asok kesi adim nanglelo. Chainong patekung-lo lapen Uzzah ari Kechejok a-Sinduk ot-lo.

⁷ Laso amat Uzzah aphan Hemphu aningthisi kephere thekthe apot la aphan pathilot-lo. Kechejok Asinduk arep along amat Uzzah thilot-lo,

⁸ lasi laso adim Perez Uzzah pusi halaso arni pen nonputa pubomlo. Uzzah aphan Hemphu aningkethi pen aduk kepi apot David aning thihak-lo.

⁹ Anke Hemphu aphan David pherelo, lapen pulo, “Ne kopusonsi nelong kechejok Asinduk keponthekpoma?”

¹⁰ Lasi Jerusalem anat la keponpejisi chesik-lo; lapen tovar kaprek anat suilo, lapen Gath arongsopi asor Obed-Edom ahem along la pondet-lo.

¹¹ La hadak chiklo jonthom salo, lapen Obed-Edom lapen la ahem ahemtun aphan Hemphu pahirjumelo.

¹² Kechejok Asinduk pen ajok Obed Edom ahemtun lapen la kedo-an aphuthak Hemphu pahirjumelo pu David arjulong-lo, lasi la Obed Edom ahem pen Kechejok Asinduk endamdetsi la Jerusalem anat arong-aje pen ponlo.

¹³ Kechejok Asinduk kepon amonit atum kengkam throk chejordet aphi, David halatum aphan pasang si chainong alo ejon athu kedo chainong aloso Hemphu aphan thok-lo.

¹⁴ David ape kanglit la avam ansi chingthang chot-lo, Hemphu aphan man kepiji alangli jakong kedo-an pen kanlo.

¹⁵ Lasonsi la lapen Israel kedo-an atum Kechejok Asinduk Jerusalem anat ning arong akehangjo lapen pong-ut arki pen pen arlu damlo.

¹⁶ Rongsopi along Sinduk kevan ahut Sol asopi Mikal inghapso pen ardik dunlo, lapen bangpi la aphan thek-long-lo lapen bangpi la aphan aning so-uilo.

¹⁷ Halatum Sinduk vansi la kebi adim la David kekimtang apehem along bilo.

¹⁸ Ansi la athok-heihei lapen Hemphu aphan kejelang athok-heihei kepi pajutdetsi Kangtangnei Hemphu amen pen rat aphan ahirjume pilo,

¹⁹ lapen kedo-an halatum aphan an ronlo. Israel aso abangphutin pinso arlo aphan la him eplang ok karnutang ethan, lapen ajehak drakha athekreng pidunrep-lo. Anke abangphutin hem chedamrep-lo.

²⁰ Paduke ahem asor aphan ahirjume kepijisi David hem kechedam ahut alangliphan kechetongjisi Mikal nangbarlo. “Hemphu arecho pini anong chepathepik-lo!” Bangpi pulo, “La amethang kelu asonsi abanpi lapen la abanpo atum angno reng-angjang si dolo!”

²¹ David thak-lo, “Ne Hemphu aphan aman kepijisi kanlo, Alangli nangpo lapen la ahemtun aphan ingvaivesi nephan Israel arat ajalin ne ingvailo. Lapen Hemphu aphan man kepijisi ne kanbomjilang,

²² lapen ne apar ne nemethang chepalang-meme jilang. Nang matha tahai ne thangta kali pu, bonta halahei a-arloso atum nephan man pilo!”

²³ Sol asopi Mikal akai isi osomar avedet-lo.