2 SAMUEL 5 - BAIBEL KANGTHIR (BSI)

Israel Lapen Judah Aputhak David Recho Keplang

¹ Anke kedo-an Israel akhei atum David along Hebron vangpetsi la aphan pulo, “Nelitum nangli-ok nanglivi asonthot-lo.

² Kedamtang Sol nelitum arecho kechobom ahut seta nanglisi Israel arat aphan ron japonlo, lapen Hemphu nangliphan chechak-lo, nanglisi Alangli halatum aphan pangripo.”

³ Lasi kedo-an ajalin atum David Recho along Hebron vang-lo. Halatum pen alangli isi kangthir-et aloh chetok-lo, halatum alangliphan jangthu patip-lo lapen la Israel arecho plang-lo.

⁴ David recho kecho ahut arta ningkan thomkep anlo lapen alangli ningkan 40 recho cholong-lo.

⁵ Judah aputhak la ningkan 7 ra ebeng an rat pangrilo, lapen Israel lapen Judah aputhak Jerusalem along ningkan 33 an rat pangrilo.

⁶ David recho lapen la amonit atum Jerusalem ketengkhengji apor nanglelo. Jebusi atum hadak dolo lapen mathalo, David laso arongsopi aphan kechedan pen hai un-e, lasi latum la aphan pulo, “Nang ladak jonghe seta nanglut longle, amek keselok lapen akeng ketekok atum jokta nangphan ingtan nangbiver un.”

⁷ (Bonta David chepahaidetsi halatum Zaion araikom cheraidet-lo, lapen la “David Arongsopi” pu chethang-lo.)

⁸ Halabangso arni amethang amonit aphan David chepulo, “Ne sonthot ladak kedo Jebusi atum aphan kehijim abang doma? Latum aphan pathi dorphlup doma? Pulote arludamra lang ahor keng keng dunnon lapen hala amek kave lapen akeng ketekok an aphan tengkheng damnon.” (La apotsi la putang-lo, “Amek keselok lapen akeng ketekok atum Hemphu ahem arlo lutdam longle.”)

⁹ Pairaikom cheraidet aphi David ladak dolo lapen “David Arongsopi” pusi amen irlo. La adung arei la rongsopi kimlo, lapen nihang anglong longle keplengset anat pen pangcheng-lo.

¹⁰ Kaiketa la ingtang ponbomlo, pima Jakong kethenei Arnam Hemphu alanglilong dolo.

¹¹ Tair arecho Hiram kekim kerang akam David anat pherangke toilo; la kedar athengpi lapen kimbang atum rechohem aphan Rok-kimbang atum sikpilo.

¹² Lasi David chechinilo, Hemphu-si Israel aputhak recho pachoji aphan pathirtang-lo lapen la arat aphan det pangthirlo.

¹³ Hebron pen Jerusalem damdet aphi, David ongdung enpangtar arloso lapen piso enlo, lapen ongdung asomar lapen asopimar dolo.

¹⁴ Lahei asomar aphan la Jerusalem along amahang thekpilo: Shammua, Shobap, Nathan, Solomon,

¹⁵ Ibhar, Elishua, Nepheg, Japhia,

¹⁶ Elishama, Eliada lapen Eliphelet.

Philistia Atum Aphuthak Kehai

¹⁷ Philistia atum aphan thanlo, Israel aputhak David aphan recho battang-lo pu, lasi halatum aron-armu la aphan kenepjisi damlo. David la arjulongsi keraikom adim hir damlo.

¹⁸ Philistia atum Rephaim Arlok nanglesi la cheraidet-lo.

¹⁹ Hemphu aphan David arjulo, “Ne Philistia atum aphan tengkheng nonma? Nang nephan pahaijima?” Hemphu athak-lo, Ne nangphan nang pahaipo!

²⁰ Lasi David Baal Perazim anat damlo lapen hadak Philistia atum aphan la paremdet-lo. La pulo, “Isi alangthepi ason nehotur atum aphan Hemphu ing-lok-lo.” Lasi laso adim Baal Perizim pulo.

²¹ Philistia atum kat-et aphi, halatum akumlin-heihei otekang-lo, lapen David lapen la amonit atum halahei pon-et-lo.

²² Anke Philistia atum Rephaim Arlok chevoithusi la cheraithudet-lo.

²³ Puthot aphong David Hemphu aphan arjuthulo, lapen la thak-lo, “Ladak pen halatum aphan tengkheng-ri bonta dam kongvaira akaprek ahin, ha Nuni athengpi arong adung penle tengkhengnon.

²⁴ Thengpi arong angsong kedam arki nang arjulong lote anle tengkhengnon pima Philistia aron-armu keparemji aphan Ne nangtum aphrang dampo.”

²⁵ Hemphu kepu atengsi David klemlo, lapen Geba pen Gezer atovar soding Philistia atum aphan phlung undet-lo.