2 SAMUEL 4 - BAIBEL KANGTHIR (BSI)

Ishbosheth Aphan Kepathi

¹ Abner aphan Hebron along pathilot-lo pu Sol asopo arjulong-lok pen alangli pherelo, lapen kedo-an Israel atum anta pherelo.

² Ishbosheth banghini achakri do, banghinita mar kethipon asongjalinlo, latum ke Baanah lapen Rekab, latum Rimmon asomarlo, Beeroth pensi kevang, Benjamin akheilo. (Beeroth ta Benjamin arlo pusi lakhaponlo.

³ La kedo barim atum ke Gittaim, anatsi kat et-lo, lapen hadaksi doverlo.)

⁴ Sol akaprek aso ke Jonathon asopo Mephibosheth. Sol lapen Jonathon kethi ahut ke la arta ningkan pho vet-lang. Jezreel pen halatum kethi abirta long-lok pen laphan a-obok humpondetsi kat-linjuilo, bangpi ketong amat laphan otphlutsi longle paklodup-lo, amat akeng tekokjok-lo.

⁵ Rekab lapen Baanah atum, Ishbosheth ahem kedamji chesik-lo, lapen anerlo kesang ahut halatum nanglelo.

⁶ Inghap along kedo a-arlosota soktipli keroi kelak pen amek kemek-i-si amek jang-lot-lo, lasi Rekab lapen Baanah arlo vangjoilo.

⁷ Ephong latum Ishbosheth ke-i angdeng lut damlo, hadaksi la amekjang pamelo, lapen laphan pathilot-lo. Anke latum la aphu ingthanpet-lo, halatum la pondet-lo, lapen jopangthang Jordan Arlok angbong damlo.

⁸ Halatum David Recho angno Hebron along aphu hodailo lapen la aphan pulo, “Lahelo nangli hotur nangliphan kepathiji kebor-i Sol asopo, Ishbosheth aphulo. Pini nangliphan Sol lapen aso-asu aphuthak alar kehuiji aphan Hemphu paklemtoilo.”

⁹ Halatum aphan David thak-lo, Kereng-et a-Hemphu kesung pen nephan kepajok abang angno ne semetang-lo!

¹⁰ Ziklag along nelilong kevang apherangke Sol kethi alam neliphan nethanlo, la mathalo birta kemesi vanpilo. Ne laphan phlungdunsi laphan pathilot-lo. La helo la birta keme kevan anam ne laphan anong-e pilo!

¹¹ Amethang ahem amek kejangjoi adai kave abangphan kepathi abang ko-an kehingno amonit plang poma! Nangtum la aphan kepathi apot ne nangtum aphuthak alar huipo lapen pirthe adang pen nangpavir-etpo!

¹² David hukum pilo lapen la aron-aso atum Rekab lapen Baanah aphan pathilot-lo lapen ari, akeng bengsi Hebron adung alangteng along halatum aphan var-lo. Halatum Ishbosheth aphu ponsi Hebron along Abner athiri arlo pipdunlo.