2 SAMUEL 3 - BAIBEL KANGTHIR (BSI)

¹ Sol ahemtun aphan kerai asong lapen David aphan kerai asong angbong penang an ajirkeding ron chedan bomlang. David abang ingtangbom ahut la abe kethur atum ajakong nang avebomlo.

David Asomar Atum

² David aphan aso bang throk amahang thekpilo, Hebron along kedo ahut: Amnon, apei ke Ahinoam la Jezreel pen;

³ Chileab, apei ke Abigail, la Nabal ahemepi, Karmel pen; Absalom apei Maakah, la Geshur arecho Talmai asopilo;

⁴ Adonijah, apei ke Haggith; Shephatiah, apei ke Abital;

⁵ Ithream, apei ke Eglah. La kedo-an asomar Hebron alongsi mahang thek-lo.

David Along Abner Kejelangdun

⁶ David asong lapen Sol ahemtun aphan kekroibom atum angbong ron chedam bom un ahut, Sol asangho atum angbong Abner ajakong nangthebomlo.

⁷ Arnisi Sol asopo Ishbosheth Abner aphan Sol enpangtar apiso Rizpah, la Aiah asopi pen ke-i rap-rap apot lam bok-lo.

⁸ Laso alam Abner aphan aningpathihak-lo. “Neli Sol aphan pachobeidetpo putong nangli kemathama? Neli Judah aphantong ingduk-rong-lo pu nangli matha-binong-loma?” Alangli pulo. “Kecheng arni pen nanglipo aphan, akorte atum aphan lapen ajirpo atum aphan neli ingduk pamelo, lapen neli David arideng keremdet pen nangliphan pajok-lo; seta pini inut a-arloso pen neliphan nangli kechokche thek-long-lo!

⁹ David aphan Hemphu chechak-lo, alangli Sol lapen aso-asu pen recho arat endet-po lapen David aphan Israel lapen Judah aputhak det kejut angchun pen ha akaprek angchun an recho pachopo.

¹⁰ Non labangso alam jongsi chekok ke pulote, Arnam nelipran pa-endet-lonang!”

¹¹ Abner aphan Ishbosheth phere-ongsi la etheta lam ningje haihedet-lo.

¹² David along Abner pherangke atum toilo, la halaso ahut Hebron alongsi do, lapen paputoilo, “Komatsi labangso adet pangripoma? Neli pen isi kechejok aloh chetok-lote Israel kedo-an aphuthak kehaiji lapen nanglinat kevung ponji aphan neli nangrap unji.”

¹³ David thak-lo, “Mesenlo! Neli nangli pen ethe alam pen kechejok aloh nangchetok dunji: Nangli nelilong kevang ahut Sol asopi Mikal nangli van nangji.”

¹⁴ Lapen Ishbosheth aphan kepapujisi David pherangke atum aphan toilo, “Nelipiso Mikal neliphan nevoithunon. La aphan ke-en longji aphan neli bang 100 Philistia a-ok-kangduk pen anampilo.”

¹⁵ Lasi la aphan apenan Laish asopo Paltiel pen Ishbosheth pondet-lo.

¹⁶ La aphi phi Bahurim arong atovar anta Paltiel chirudunkongsi dunbomlo. Bonta Abner “Hem chedamnon,” pu kepu ahut la chedamjuilo.

¹⁷ Israel ajalin atum along Abner damsi halatum aphan pulo, “David aphan nanglitum arecho kepamanji nanglitum aningkehang ajirding-olo.

¹⁸ Non helo nanglitum aphan avarsai kemelo. Hemphu kepu alam nanglitum ning chematha damtha, ‘Israel arat Philistia lapen halatum akaprek ahotur pen kepajokji aphan Neban David aphansi Ne rimpo.’”

¹⁹ Benjamin akhei arat aphanta Abner lam thanlo, ansi Benjamin lapen Israel arat atum kekroidun alam David aphan kethan damjisi Hebron damlo.

²⁰ Hebron along David aphan Abner, kechetong dam ahut bang 20 amonit aphan pen pen David kecho kejun amei sikpilo.

²¹ David aphan Abner pulo, “Non neli dampo lapen nanglinat Israel kedo-an aphan pakroi dampo. Halatum nangliphan recho pusi dengpo, lapen nangli kopisi nanglining kehang ma longpo lapen det adang an pangrilongpo.” Abner aphan David isi kejok longji alam chechak-lo, lapen padampamelo.

Abner Aphan Kepathi

²² Aphi Joab lapen David atum lapen akaprek aban atum pen pen mar kethidam pen nangchevoilo, halatum arideng ongdung amar vanlo. Hebron along David pen Abner dorapchomchelo, pima David laphan kedam kejok-longji alamchak pen toi-et-lo.

²³ Joab lapen la amonit atum nangkele ahut la aphan Abner ke David recho along kevang lapen isi kejok alamchak pen toitang-lo pu alam thanlo.

²⁴ Lasi Joab, recho along damsi alangliphan pulo, “Nangli kopisi keklemloma? Abner nanglilong vang-lo, nangli kopisi lapusonle laphan padamlongtoiloma?

²⁵ La dak kevangke nangliphan kepachobeiji lapen nangli kopi klemloma lapen konatsi kedampoma la kechinijisi vang-lo. La nangli chinipamelo!”

²⁶ David aphan osi Joab ke Abner aphan kepahangjisi pherangke toilo, lapen halatum Sirah alanghe pen vandet-lo; bonta David laso alam chininepin.

²⁷ Hebron along Abner nangkele ahut, Joab la aphan inghap ehin anat pondet-lo, pima kenangsot alam la pen kechingkiji kedo asonthotsi klemlo, lapen hadak la aphan apok arlo an chutbop-lo. Lasonsi Abner aphan pathilot-lo, pima alangli Joab amu Asahel aphan pathilo.

²⁸ David laso abirta arjulong-lok pen alangli pulo, “Hemphu chini, ne lapen nerat atum Abner kethi alam along netum adai ave.

²⁹ Laso aduk Joab lapen la ahemtun kedo-an aphuthak paklonang! A-ove tinta ajehak thirengjeng akeso mate arloso akamsi keklem a-ot kedochot, kalite kecho dorphlup-phle laso ahemtun aputhak padonang!”

³⁰ Lasi Joab lapen la akorte Abishai halatum amu Asahel aphan Gibeon aron along kepathi apotsi Abner aphuthak alar huilo.

Abner Aphan Kepip

³¹ Ansi Joab lapen la amonit atum ape pachingseksi pe thoila pache-umjisi David hukum pilo, lapen Abner aphuthak pachirutoilo. Lapen Kethi arpum kepon ahut David Recho amethang amat thengjon arep arep dunlo.

³² Hebron along Abner aphan pip-lo, lapen thiri along asepathesi recho chirulo, lapen lasonsi kedo-an arat atumta chiruhurlo.

³³ Abner aphan David lasonsi ningrilo: Inut akelu ason, Abner kopisi kethinang-loma?

³⁴ La ari anta ingnanghet-he. Lapen akeng ta ingnangne; Inut pran karmut arideng kethinang asonsi la thinang-lo! Lapen rat atum puthot chiruthuhurlo.

³⁵ Penang an arni rat atum David aphan an kepachoji bor-ilo, bonta alangli isi seme karsik deng-lo, “Arni chiche ako jongsi ne an chodet pulote, Arnam nephan pathengbop nang!”

³⁶ Halatum la ning chebilo, lapen aningdok-lo. ahokpet pen Recho keklem an ason rat aphan aningpadok-lo.

³⁷ David arat kedo-an lapen Israel arat kedo-an chinilo, “Abner kethi along recho thangnat kecherapdun ave.

³⁸ Aban atum aphan recho pulo, ‘Nanglitum chechinine langma, pini arni Israel akethenei ajalin thitang-lo pu?

³⁹ Ne recho aphan Arnamsi nekangvailo, seta pini ne jakong avelo. La Zeruiah asomar nephan aning ingtang-ong. Latum kepho nangji a-ot ateng Hemphu-le la kehingno pran-karmut atum aphan aduk papilonang!’”