2 SAMUEL 20 - BAIBEL KANGTHIR (BSI)

Sheba Akehingno Kethur

¹ Gilgal along amokevangve amonit Sheba pu Bikri asopo, la Benjamin akhei inut dolo. La pong-ut but-lo, lapen hang-lo, “David paremnang! Netum la aphi dunde! Israel amonit atum hem dam-et-lonang!”

² Lasi David aphan Israel atum otekangsi Sheba along dunlo, bonta Judah amonit atum David aphan kroisi Jordan pen Jerusalem an aphi aphi dunlo.

³ David amethang rechohem nangkechele ahut, rechohem kepalangjisi ke-otekang ke-enpangtar apiso bangkep aphan enlo lapen halatum aphan honbang arideng hodailo. Halatum kenangji ason an alangli pilo, bonta halatum pen la irap-rap-redet-lo. Hemepi atum asonsi halatum akai arjon lapusi donang-lo.

⁴ Amosa aphan recho pulo, “Judah amonit an pangrumra penapdik halatum pen dak vang rap-petnon.”

⁵ Halatum aphan kehangjisi Amosa damlo, bonta recho kesik apar ateng pen la nangle un-edet-lo.

⁶ Lasi Abishai aphan recho pulo, “Absalom apar Sheba ephan epasung-oji. Ne monit ponra la aphi hungdunnon, kalite pairaikom arong-heihei la cheraidet tahai lapen eli pen katjui tahai.”

⁷ Lasi Joab amonit recho angphun kerai abang, lapen akaprek aron-aso atum Sheba aphan kehungdunjisi Abishai pen pen Jerusalem olo.

⁸ Halatum Arlongpi Gibeon along lesi Amosa halatum aphan chetong-lo. Joab ke ron aphansi chingthangkoilo. La anokjir isi ahom along chesek pamelo. La kevanbom ahut la anokjir pen pen nangchonphlut-lo.

⁹ Amosa aphan Joab pulo, “Mesenlangma jirpo?” La aphan kangjupjisi ari ar-e pen angmum tumchomlo.

¹⁰ Ari ahong kaprek pen ke-otdong Joab anokjir aphan Amosa langlepin, lapen Joab la aphan apok chutplut-lo, lapen la avi longle athak lidung-lo. La men men thilot-lo, lapen Joab laphan arbujokphlot-lo. Ansi Joab lapen la amu Abishai, Sheba aphi hungdunbomlo.

¹¹ Amosa abang arpum adung Joab amonit inut arjapthersi hang-lo, “Abangphutin Joab lapen David aphi kedun abang Joab aphile dunnon!”

¹² Amosa abang arpum avi aphik pen tovar angbong chitimsi tilailo. Joab amonit kethek-long abangphutin kedam atum laphan langtekangding titilo, lasi la bang arpum chethursi ha hidi anat ponlo lapen la athak pe-um harlup-lo.

¹³ Bang arpum tovar pen saidet aphi Sheba aphi kehungjisi abangphutin ta Joab aphi aphi dunlo.

¹⁴ Israel kedo-an akhei alongri Sheba damsi Abel Beth Maakah pu arongsopi nanglelo, lapen Bikri akur kedo-an abangphu chingrumsi la aphi aphi rongsopi arlo lutdamlo.

¹⁵ Hadak Sheba dolo pu Joab amonit atum arjulong-lo, lasi latum damsi rongsopi cheraidet-lo. Halatum paisong athak longle builo lapen la kepakrepjisi paisong aber alongle hut-lo.

¹⁶ Laso arongsopi along inut kereset a-arloso dolo, la paisongpen nanghang-lo, “Arjutha! Arjutha! Joab aphan dak pavangnon; alangli pen neli kechingkiji neninghang-lo.”

¹⁷ Joab damlo, lapen bangpi arjulo, “Nangli Joab ma?” “Kalang, neli helo,” la thak-lo. “Neliphan arju iktha, akehai,” bangpi pulo. “Neli arjuding-lo,” pusi la thak-lo.

¹⁸ Bangpi pulo, “Hako ahut halatum ekepu alamdo, ‘Abel arongsopi along damra nangli kethak longdampo’ lapen lasonthotsi halatum klemlo.

¹⁹ Nelitum arongsopi thepik, Israel angbong kangsamjinnei kekroinei arongsopilo. Nangli la kopisi kepavirji aphan kebor-iloma? Hemphu kechepahemphu amar nangli kepavirji nanglining hang-loma?”

²⁰ Kali! Joab thak-lo, “Neli nanglitum arongsopi phangnone mate pavirve!

²¹ La le nelitum kemang kali. Inut amonit amen Sheba pu Bikri asopo, la Ephraim anglong alongri pen David Recho abethurlo. La inut nehodaidetnon, lapen neli rongsopi pen dampo.” La aphu nanglinat paisong angsong pen nangpavarpo, pusi bangpi thak-lo.

²² Bangpi akemang pen rongsopi arat along bangpi damlo, lapen halatum Sheba aphu hevatpetsi Joab anat paisong angsong pen aphu varlo. Joab amonit atum rongsopi ke-ojisi la pong-ut but-lo, lapen halatum hem chedamlo. Lapen Jerusalem recho along Joab chevoilo.

David Achakri

²³ Joab ke Israel aron-armu aphuthak chepahemphulo; Benaiah ke Jehoiada asopo la David angphun kerai atum aphuthak chepahemphulo;

²⁴ Adoniram ke jakong akam keklem atum aphuthak chepahemphulo;

²⁵ Sheva ke kangsaihem achunbang-lo; Zadok lapen Abiathar atum ke kurusarlo,

²⁶ Jair arong pen Ira ta David akurusar atum angbong pen inut-lo.