2 SAMUEL 2 - BAIBEL KANGTHIR (BSI)

David Aphan Judah Arecho Kepaplang

¹ Laso aphi Hemphu aphan David arjulo, “Ne dam pen Judah angbong isibak arong cherai nangjima?” “Damnon”! Hemphu thak-lo. “Koloso arong-lo?” David arjulo. “Hebron,” Pusi Hemphu thak-lo.

² Lasi David Hebron anat damlo, lapen apiso banghini cheponlo; Ahinoam, bangpi ke Jezreel pen lapen Abigail, la Nabal ahemepi, bangpi ke Karmel pen.

³ La amethang amonit, lapen ahem asor anta ponlo, lapen halatum Hebron adung arei arong-heihei dolo.

⁴ Anke Judah amonit atum Hebron vangsi David aphuthak jangthu patipsi Judah arecho bat-lo. Judah arat atum Gilead along Sol aphan piptang-lo pu David arjulongsi,

⁵ la hadak ajehak amonit toisi birta lolo: “Nangtum arecho aphan kepip pen ajok kangjinso kepaklang apot Hemphu nang pahirjume nang,

⁶ lapen Hemphu non nangtum aphan nang pajinso nang, lapen nangtum aphan ahok pen paklem nang. Neli amat ta nangtum aphan akemesi klempo. Pima nangtum keme akamsi klemlo.

⁷ Chepangtang ra nangthin chepathenon! Nangtum arecho Sol thitang-lo, lapen Judah arat atum ne phuthak jangthu patipsi halatum arecho nebat-lo.”

Ishbosheth Aphan Israel Arecho Kepaplang

⁸ Sol aron-armu apinpo Ner asopo, Abner, Sol asopo Ishbosheth aphan Jordan parai ha Mahanaim anat katponlo.

⁹ Abner hadak Ishbosheth aphan Gilead, Asher, Jezreel, Ephraim lapen Benjamin alongri aputhak recho paplang-lo lapen abinong ke kedo-an Israel aphuthak arecholo.

¹⁰ La aphan Israel aphuthak recho kepacho ahut arta ningkan 40 dotang-lo, lapen ningkan hini la recho cholo. Bonta Judah akhei atum David aphan kroipamelo,

¹¹ lapen la Judah aputhak Hebron along ningkan 7 ra ebeng pangrilo.

Israel Lapen Judah Angbong Aron Kethur

¹² Ishbosheth aban Abner, Mahanaim pen Gibeon arongsopi anat damlo.

¹³ Joab, Zeruiah lapen David aban atum an langteng along chetongpet-lo.

¹⁴ Joab aphan Abner pulo, Etum ajehak arisomar pu pu asong pen ingvaira isi kechemarkot pachepatelonang. Paklemnang! Joab thak-lo.

¹⁵ Lasi Ishbosheth lapen Benjamin akhei pen bang 12 amonit atum David amonit bang 12 pen chemarkot-lo.

¹⁶ Abangphutin ta ahotur aphan ot-repsi arep anokjir pen chechut-repsi halatum bang 24 amonit klipetsi thirappet-lo. Ansi Gibeon along laso adim “Nokjir Anglong” pusi irlo.

¹⁷ Anke isi aning-kecheso ason thurlo, lapen Abner lapen Israel aphan David amonit atum paremdet-lo.

¹⁸ Zeruiah asomar bang kethom Joab, Abishai lapen Asahel ta hadak dolo. Asahel ke ingnam athijokpi ason kekat chatpik abang-lo,

¹⁹ Abner aphi hungdunlo, lapen la angden kat-lo.

²⁰ Abner aphi chelangsi pulo, La Asahelma? Kalang! pusi la thak-lo.

²¹ Nephi kehung onon! Abner pulo. Ron-aso angbong inut aphan hungdunra la along kopi doma endunnon! Bonta Asahel la aphi hungdunbomlo.

²² Puthot la aphan Abner pulo, “Nephi kehung onon! Kopisi ne nangphan pathi nangjima? Ne kosonsi nang ik Joab angno cheklang poma?”

²³ Bonta Asahel o-esi Abner abang amethang achir che-otsi Asahel apok tok-plutsi anung anta achir paplat-lo. Asahel longle klibupsi thilot-lo, lapen la ketilai adim kele abangphutin hadak sakoksi arjapdingdang-lo.

²⁴ Bonta Joab lapen Abishai, Abner aphi phi hungdunlo lapen arnikangsam apor Ammah anglong along latum nanglelo, la Giah anihang lapen Gibeon akejejangtang ajo atovar anat-lo.

²⁵ Benjamin akhei amonit atum Abner aphan komchensi inglong angsong along halatum Abner abe arjapdingdang-lo.

²⁶ Joab aphan Abner hang-lo, “Etum kaiketa ron chedanverpoma? Kejut ke thangta longle, bonta ning kehosi longchotpo pu nang chininema? Netum ta nang korte murti atumlo. Nang monit atum netum aphi phi kehung dundedetji aphan hukum kepi aphrang la ko-ansi ajir padingjilangma?”

²⁷ Joab thak-lo, “Kereng-et Arnam amen pen ne semetang-lo, nang jongsi pupe tangte ne monit atum penap adap anta nangtum aphan nanghung dunbomjilang!”

²⁸ Ansi Joab pong-ut but-lo, Israel aso aphan aphi pahungdunde detjisi amonit aphan pachinilo; lapen ron hamlo.

²⁹ Abner lapen la amonit atum jopangthang Jordan Arlok angbong dam nang-lo; halatum Jordan Aroi hatpet-lo, lapen puthot adap anta halatum dambomsi Mahanaim along nanglelo.

³⁰ Joab, kehungdun osi la amonit an pamgrumlo, lapen halatum angbong bang 19 avedet-lo, la apar Asahel ta avedet-lo.

³¹ David amonit atum bang 360 Abner amonit Benjamin akhei aphan pathilo.

³² Joab lapen la amonit atum Asahel abang arpum ponsi Bethlehem along laso ahemtun athiri along pip-lo. Ansi halatum jopangthang damsi adap kangthang Hebron along nangchelelo.