2 SAMUEL 18 - BAIBEL KANGTHIR (BSI)

Absalom Aphan Keparem Lapen Kepathi

¹ David Recho amonit kedo-an vangsi chepangrumpet-lo, bangsuri isi asong, bangpharo isi asong, lason thaksi halatum aphuthak inut hukum kepi abang bat-lo.

² Ansi la halatum aphan songthom thaksi toilo, Joab lapen Joab amu Abishai lapen Ittai, la Gath pen, abangphutin isi asong pachehemphutoilo. Lapen amonit atum aphan recho pulo, “Nangtum along nemethangta nangdunpo.”

³ Nangli nelitum along nangdun nangnelo, pusi halatum thak-lo. “Nelitum kat seta hotur atum nelitum aphan thangnatta mathathelo. Jongsi nelitum kedo-an chirui-et seta lapen kat seta mate achitim anbak nelitum thi-et seta; nanglike nelitum bangsuri kep an sose adorkeso abang-lo. Nangli ladak rongsopi dokok pen nelitum aphan nekerap abang nangtoidun bomsi akemeneilo.”

⁴ Nanglitum kopima akeme kematha lasi neli klempo, pusi recho thak-lo. Ansi la amonit atum suri isi asong, pharo isi asong, dambomsi la inghap adung arjapdunding-lo.

⁵ La Joab, Abishai lapen Ittai aphan hukum pilo: “Neliphan ajok Absalom riso aphan paphori!” Lapen achakri atum aphan David hukum kepi alam kedo-anta arjulongpet-lo.

⁶ Rong anat David aron-armu lapen Israel aso atum pen ron chedanlo ha Ephraim a-ingnam ajo.

⁷ David amonit atum Israel aso aphan paremdet-lo; la isi kepherememe akeremlo, halaso arni bangsuri 20 amonit thilo.

⁸ Ron kechedan rong ajo anta prat-lo, ron ahidi along kethi mute ingnam ajo kethisi ke-ong.

⁹ Absalom men men amat ajehak David amonit atum pen chetong mamlo. Absalom losei alososi kardon, lapen lason dambomsi phongrong arongpi arum kedam amat Absalom aphu thengpi aro hini adak chingkep-lok-lo. Losei aloso katsi Absalom aphan otekangsi pajangling-lo.

¹⁰ David amonit inut abang thek-longsi la Joab aphan thanlo, “Akehai, phongrong athengpi aro hini adak Absalom kechingthangling neli thek-long-lo!”

¹¹ Joab thak-lo, “Nang jongsi thek-long lote kopisi nang hadak amat la aphan pathilot-ledet-lo? Ne nangphan rup adum kep lapen vamchekok epak nangpi longpopji apot-lo.”

¹² Bonta halaso amonit thak-lo, “Nangli jongsi rup adum suri isi nepi seta neli recho asopo aphan rimunjong ehongta chirung-re. Nangli Abishai lapen Ittai elitum kadokave Recho ahukum alam arjulong-lo, ‘Neliphan ajok, Absalom riso aphan paphori.’

¹³ Bonta jongsi recho aphan kroikrera Absalom aphan pathilote, lapen recho la arjulong-lote, la asontin nangli neliphan neraidun un-edetji.”

¹⁴ Ne nangpen apor kepadamji nening hanghe, Joab pulo. La chir pakthom ponsi Absalom thengpi arong along kechevek-ling kereng-et-lang ahut aning along lahei jorplut-lo.

¹⁵ Anke Joab bangkep amonit Absalom adung pateboksi la aphan kepathi patangdet-lo.

¹⁶ Ron kechedan kepangtonjisi Joab pong-ut pabut-lo, lapen la asong atum Israel aphi kehungdun pen nangchiruilo.

¹⁷ Halatum Absalom, abang arpum ponsi ingnam ajo ahilik karnuk ajo varchorlo, lapen la amangho arlong thepi pen dipthip-lo. Abangphutin a-Israel atum kat-etsi amethang ahem chedamlo.

¹⁸ Recho Arlok along la kereng-etlang ahut Absalom angthek ehum ahem amethang aphan kimlo, pima la amen keparengji aphan la asopo ave. Lasi la amethang amen che-irlo, lapen pini anta la Absalom angthek ahem pusi chinipet-lo.

Absalom Kethi Alam David Aphan Kethan

¹⁹ Anke Joab aphan Zadok asopo Ahimaaz pulo, “Birta keme recho aphan kethan damjile neliphan recho along pakat longtha, pima la aphan hotur atum arideng pen Hemphu pajoktang-lo.”

²⁰ Lapukali, Joab thak-lo, “Pini nangli thangnat abirta keme pon nangnelo. Mo nonphi klemtame, bonta pini kali, athe recho asopo thitang-lo.”

²¹ Anke la Sudan asor aban aphan pulo, “Damra nang kethek-long ason an recho aphan thandamnon.” Aban abang angphun patongkisi laso aphi la kat-lo.

²² Ahimaaz choningrithulo, “Kopi plangjima neli pherere; kanghon pen neliphanta birta nepapon longtha.” Sopo nang kopisi la keklemji nangning hang-loma? Joab thak-lo. “Labangso aputhak nang thangnat anong-e longle.”

²³ Jat plang seta, Ahimaaz ningjethulo, “Neli kedamji nelining hang-lo.” Tangte damnon! Joab thak-lo. Lasi Ahimaaz katsi birta ha Jordan Arlok atovar anat lapen ban aphan mute la lit phlot-lo.

²⁴ David ke arlo lapen ingtan rongsopi anghap adaksi kechongni. Honbang paisong athak arlusi tovar anghap sarnung athak arjap-lo; la langbomsi inut ariso nangkekat thek-long-lo.

²⁵ La arum asor aphan hang-lo, lapen recho aphan thanlo, lapen recho pulo, “La jongsi inutpet pulote la birta kemesi vanlo.” Kekat abang adung nanglebomlo.

²⁶ Honbang puthot anut kaprek amonit nangkekat thek-long-lo, “Langtha! Anut kaprek amonitta nangkat bomlang!” Recho thak-lo, “La ta birta kemesi kevanlo.”

²⁷ Honbang pulo, “Neli kethek-long aphrang amonit ke Ahimaaz nangnak.”

²⁸ Recho aphan Ahimaaz ardomsi la angno i-parlipbak-lo, lapen pulo, “Nangli Arnam Hemphu anong pathenang, pima Recho abe kethur amonit atum aphuthak pahailong-lo!”

²⁹ Absalom riso mesenlangma? Pusi recho arjulo. Ahimaaz thak-lo, “Akehai, Joab neliphan nangketoi ahut anke monit atum hangjo, la kopi apot lone neli nangthan thekthe.”

³⁰ Hadak arjapthertha, recho pulo; lapen la hadak damsi arjaptherlo.

³¹ Anke Sudan aso aban nanglesi recho aphan pulo, “Neli nangliphan birta keme do Recho! Pini nanglibe kethur atum kedo-an aphuthak Hemphu nanglipahailo!”

³² Absalom riso mesenlangma? pusi recho arjulo. Ban abang thak-lo, “Neli kematha ke nangli hotur atum kepho asonthotsi la ta pholo, akehai, lapen nanglibe kethur atum antalo.”

³³ Ningke-oi pensi recho aning plengset-lo. La angsong angdeng arludamsi anghap along chirulo. La kedam ahut ta chirulo, “O po! Po Absalom! Po Absalom! Nesi nangdim thinangji apot-lo, po! Po Absalom!”