2 SAMUEL 16 - BAIBEL KANGTHIR (BSI)

David Lapen Ziba

¹ David inglong aphuchong alum damchot aphi alangli men men Mephibosheth aban Ziba aphan chetong-lo. La along ajehak agadha dolo him dum pharohini, drakha athe akreng abitung 100, thesere abitung 100, ok-reng ajarong plengset drakha ahorlang gadha athak arthang-lo.

² La aphan David Recho arjulo, “Lahei nangli kopi aphanlo?” Ziba thak-lo, “Gadha ke Recho ahemtun asor kardonji aphan, him lapen thesere ke pinso atum kechoji aphan lapen drakha ahorlang ke kejejangtang ajo halatum ainiti ahut kejunji aphanlo.”

³ Nangli hemphu Sol asupo, Mephibosheth ke konat-lo? Halaphan recho arjulo. Alangli ke Jerusalem alongsi do, Ziba thak-lo, “Pima la chechinilo, aphu recho arat Israel atum non la aphansi hodaipo.”

⁴ Ziba aphan recho pulo, “Mephibosheth amar an nangli cheraipetnon.” Neli ke nangli banchot, Ziba thak-lo, “Recho aphan ne aning padok-vernang!”

David Lapen Shimei

⁵ David Recho Bahurim along nangkele ahut, Sol adon angbong inut Gera asopo Shimei la aphan kechetongjisi nangbarlo, la vangsi David aphan ingthokdunlo.

⁶ David lapen achakri atum aphan Shimei arlong kevar pangcheng-dunlo, David aphan la amonit atum lapen angphun kerai atum kompet seta varlo.

⁷ Alangliphan Shimei ahirjuno pilo, lapen pulo, “Damnon! Chetar seraknon! Kethu abang! Kepathi abang!

⁸ Nang Sol arecho-arat thidet-lo, la apotsi Hemphu nangphan non aduk nangkepilo, pima Sol ahemtun ongdung aphan nang pathilo. Hemphu ke nang recho-arat Absalom, nangsopo aridengsi pidet-lo, lapen nangke virtang-lo, O kepathi abang!”

⁹ Abishai, la apei Zeruiah, recho aphan pulo, “Recho, kopisi labangso amethan nangliphan pahirjunolongma? Neliphan hadak padam longra labangso aphu pavanlongpet non!”

¹⁰ La nangkam kali, Recho ke Abishai lapen la a-ik Joab aphan pulo. “Hemphu jongsi laphan paningjetoilo pulote paningjenang, la kopisi keklemlo pu karjuji komat?”

¹¹ Abishai lapen la achakri kedo-an aphan David pulo, “Nelimethang aso neliphan kepathiji bor-ilo; tangte kopi athesi la Benjamin aso aphan nanglitum kemanghu nangji? Hemphu-si pahirjunoji aphan papulongtoilo; lasi la aphan langledetnon lapen la paklemlonang.

¹² Hemphu neli kesung chinisi la ahirjuno adim ajehak ahirjume nelipiji mene.”

¹³ Lasi David lapen la amonit atum tovar-soding dambomlo. Shimeita halatum along dunbomlo, inglong akung kung dunbomsi ingtondunbomlo, arlong lapen longle angkleng-heihei la kedambom ahut halatum aphan vardunbomlo.

¹⁴ Jordan along kele ahut anke Recho lapen la amonit kedo-anta ainiti-ta lo, kelak-ong latum hadak sang-lo.

Jerusalem Along Absalom

¹⁵ Absalom lapen la along Israel arat atum kedo-an ta Jerusalem arlo lutdamlo, lapen Ahithophel ta halatum along do dunlo.

¹⁶ Absalom aphan David kechikinei ajirpo Hushai kechetong ahut la asepathesi hang-lo, “Recho achethe padingnang! Recho achethe padingnang!”

¹⁷ Nangjirpo David aphan akekroi kopi cheplang-lo? pusi la aphan Absalom arjulo. “Kopisi nangli halalong kedundedet-loma?”

¹⁸ Hushai thak-lo, “Neli kopusonsi kedunpo? Neli ke Hemphu lapen laso arat kangvaitang abang anatsi kedunji. Neli nanglilongsi doji.

¹⁹ Jat seta nelihemphu asopo aphan kalite akaprek komat aphansi neli ingdukthekpoma? Nanglipo aphan kangduk asonthotsi non neli nangliphan ingdukpo.”

²⁰ Ansi Ahithophel anat pangnosi pulo, Non elitum ladak dolo, nangli nelitum aphan kopisi thanpare poma?

²¹ Ahithophel thak-lo, “Damra rechohem kepangtangjile ke-otekang nanglipo ke-enpangtar a-arloso atum pen irap-rapnon. Ansi Israel abangphutin ta nangli nanglipo aphan nangli hotur asonsi chekamlo pu chinipo lapen nanglibe kedun atum anta aning rungphompo.”

²² Lasi halatum isi apehem Absalom aphan rechohem asarnung athak kimpilo, lapen rat angno Absalom pehem arlo lutdamsi apo ke-enpangtar a-arloso atum pen pen irapsi che-enlo.

²³ Halaso ahut Ahithophel kepare alam an Arnam alam asonsi la dengpet-lo; David lapen Absalom ta la kroilo.