2 SAMUEL 14 - BAIBEL KANGTHIR (BSI)

Absalom Kepachevoiji Aphan Joab Kesik

¹ Absalom aphan David recho chingtung-olo pu Joab chinilo.

² Lasi Tekoa along kedo inut kereset abangpi aphan la hang-lo. Bangpi nanglesi bangpi aphan la pulo, “Nangli ningdukpik ason chekrong non; nanglining keduk ape ari chingthangnon lapen nanglichu chingsok-rinon. Inut ajirkeding aningkeduk a-arloso asonle cheplangnon.

³ Anke recho along damnon lapen la aphan neli nangkethan asonthot-le punon.” Anke bangpi kopi punangjima la Joab thanlo.

⁴ Arloso abang recho along damlo, aman pisi angphun longle patongkilo, lapen pulo, “Recho, neliphan nerap iktha!”

⁵ Nang kopisi kenangji? Bangpi aphan la arjulo. Akehai, neli ke keduk ahemepi, pusi bangpi thak-lo. “Neli penan thi-et-lo.

⁶ Akehai, nelisopo banghini do, arnisi halatum aphan kepachekak dunji abang avepin adim latum latum rit along chebohong-lo, lapen inut abangphan anut kaprek abang pathilot-lo.

⁷ Akehai, non kedo-an nedon-nerap atum nelibe thurlo, lapen nelisopo halatum arideng pinangji pusi neliphan hang-lo, ansi akorte aphan kepathi apot halatum la aphan pathi unpo. Halatum jongsi la klemlote, nelisomar avepinpo. Halatum ke nelining kechethe ajutsi aphan pavirpo lapen neli penan apoton pavepinsi amen pavirpo.”

⁸ Hem chedamnon, Laso abaha ne langpo, pusi Recho thak-lo.

⁹ Bangpi pulo, “Recho, Nangli keklem aling seta nelihemtun lapen neliphanle adai patinlonang, nangli lapen recho ahemtun ke adai pavenang,”

¹⁰ Recho thak-lo, “Nangphan jongsi mane paphere pulote la aphan nelong vandet-non lapen la mononphi nangphan kaita pasung un-edetpo.”

¹¹ Bangpi pulo, “Recho kanghon pen nangli Arnam Hemphu aphan neli ardom pitha, anke neli kedo-an akam neliso kethi aphuthak alar kehuijira akaprek nelisopo aphan kepathi pen akethe akehingno akam klemkledetpo.” “Kereng-et a-Hemphu amen pen ne chechak-lo,” David thak-lo. “Asapta nangso sungsedetpo.”

¹² Kanghon pen, Recho, neliphan eson alam nelipathan longtha, pusi bangpi choningrilo. “Punon” pusi la thak-lo.

¹³ La aphan bangpi pulo, “Arnam arat aphan nangli kopisi laso kechokche akam klemloma? Nangli nanglisopo bang adet pen pavang longlelang, lapen nangli non kepu asonthot nangli methang aphan kehingno pusi hok-lo.

¹⁴ Elitum kedo-an ta thinangji; la kepangrumno alongle athak kebu alang ason. Arnam seta kethi abangphan parengthuthelo, bonta rechoke inut amonit aphan anke bang adet ban kedo pen kevanji atovar long unlang.

¹⁵ Non, Recho nangliphan neli kepuji kevang athe ke rat atum neli papherelo, lapen neli methang chepulo, neli kehang ason nangli klemji pu ning chethesi neli nangliphan pupo.

¹⁶ Neli mathalo, nangli nelilam arjupo, lapen nelisopo aphan lapen neliphan kepathiji pu kebor-i atum arideng pen pajokpo lapen nelitum aphan Arnam amethang amonit aphan thiri alongle pen neli pajoktha.

¹⁷ Neli methang aphansi neli chepulo, akehai nangli kechak asonsi neliphan pajokpo, pima rechoke Arnam apherangke ason lapen me-hingno pharthek. Arnam Hemphu nanglilong padonang!”

¹⁸ Recho thak-lo, “Nangphan ne eson alam nang arjulang, lapen nang nephan ahok alam nethanvek nangji!” “Ajat ason ta neli arju tame, Recho,” bangpi thak-lo.

¹⁹ Joab tong nangphan lahei paklemtoiloma? bangpi aphan la arjulo. Bangpi thak-lo, “Recho, neli seme-tang-lo, la kepatu alam an nangli karju kethaktheji un-e. Ahok-lo, nangli chakri Joabsi lahei keklem nangji lapen kopisi keningje nangjima neliphann thanlo.

²⁰ Bonta alangli la keklem ke kechethantang alam aputhak kepangtangji aphan. Recho nangli ke Arnam apherangke asonsi reset lapen kopi plangtang-loma la chini.”

²¹ Aphi Joab aphan recho pulo, “Nangli ningkehang ason keklemjisi nelita chesik-lo. Damra Absalom riso aphan chetongdamnon, lapen la aphan ladak vandet-non.”

²² David aphan aman kepijisi Joab ke David angno longle athak angphun patongkilo, lapen pulo, “Arnam nangliphan pahirjumenang, Recho! Non neli chinilo, nangli neliphan ningdok-lo, pima neli kechoningri ason nangli thak-lo.”

²³ Anke la thursi Geshur damlo lapen Jerusalem along Absalom aphan vandet-lo.

²⁴ Tebonseta, recho hukum pilo, “Absalom ke rechohem dolongle. Ne laphan lang ingtungte,” pusi recho pulo. Lasi Absalom amethang ahemsi dolo, lapen recho angno cheklangkledet-lo.

David Lapen Absalom Kecheme

²⁵ Israel angbong Absalom asonthot athok kedo amonit avelang; la aphu pen akeng an thang akelangno ave.

²⁶ La achu inglum-o, lapen la dinglen lapen arthat-o, lapen la ningkan isi pen ephong si chingtip chot. Rechohem alin pen lin lote, la linni an sosechot do.

²⁷ Absalom asopo bangkethom do lapen asopi inut do, amen Tamar pu,

²⁸ Recho aphan cheklangklepin pen Absalom Jerusalem along ningkan hini dolo.

²⁹ Ansi la Joab aphan hang-lo; la apharman recho along kepadamji aphan arjulo, bonta Joab vangpipedet-lo. Puthot la aphan Absalom hang-lo, lapen puthot ta Joab kevangji molo.

³⁰ Lasi amethang aban atum aphan Absalom pulo, “Langtha, Joab ahidi ke ne hidi adung-lo, lapen la along soktipliso arong menlo. Damra la me keidamchoknon.” Lasonsi latum damlo lapen hidi me kei damchok-lo.

³¹ Absalom ahem Joab damsi hang-lo, “Kopisi nangban atum nehidi me kekeichok-lo?”

³² Absalom thak-lo, “Pima ne nangkehang ahut nang vangvedet ke. Recho along nepharman nepadam pitoijisi nening hang-lo: Ne kopisi Geshur keche-onang-lo, lapen ladak kevang nang-loma? Nephan hadak kedokoksi akemeji apot-lo,” lapen Absalom ningjebomlang, “Recho pen ne kechetongji aphan kepasikjisi ne nangphan ninghang-lo, lapen jongsi nedo do pulote alangli nephan nepathilot-nang.”

³³ Lasonsi David Recho along Joab damlo lapen la aphan Absalom kepu alam an than-et-lo. Absalom aphan Recho pavangtoilo, la damsi angno longle athak angphun patongkilo, la aphan recho kangjup pen deng-lo.