2 SAMUEL 12 - BAIBEL KANGTHIR (BSI)

Nathan Abirta Lapen David Aning Kecherui

¹ Hemphu Nathan aphan David along toilo. Nathan la along damlo, lapen pulo, “Erong along banghini amonit dolo; inut abang plang-o lapen akaprek abang duk-o.

² Keplang-o abang chainong lapen biresak do-o,

³ seta ejonnat kenamchot abiresak aso do. Laso aphan la lanalo, lapen la ahem along asomar atum pen pen the dunbomlo. La abang amethang ajehak a-an pen la aphan phinlo, amethang aharlung pen lang tung-lo, lapen la aphan arbakpo. Biresak aso ke la aphan asopi asonlo.

⁴ Arnisi inut alohi keplang ahem vang-lo. Keplang amonit la aphan keru-kethaira an kepachoji aphan amethang api angbong ejonbak anta that pi ingtungte; la klemklesi, la keduk abang abiresak asosi ponpidet-lo lapen la ahem kevang alohi aphan esan tun pilo.”

⁵ Keplang amonit aphuthak David aningthisi pulo, “Kereng-et a-Hemphu amen pen ne semetang-lo, labangso keklem amonit kethinangji a-ot dolo!

⁶ Pima lason kangjinso kave akam keklem apot la kepon pen phanphli pachetu lonang”

⁷ David aphan Nathan pulo, “Halaso amonit ke nangli helo, Lapen La helo Israel a-Arnam Hemphu kepu alamlo: Ne nangphan Israel aputhak recho paplang-lo lapen Sol arideng pen pajok-lo.

⁸ La arecho anghoi lapen la apiso atum nangphansi nangpidet-lo, lapen nangphan Ne Israel lapen Judah aputhak recho nangbat-lo. La jongsi dorde pulote, Ne nangphan ansose phanni nangpidetji apot-lo.

⁹ Tangte kopi apotsi nang Ne hukum-heihei kekroikre det-loma? Nang kopisi la kehingno akam keklemloma? Ron along nang Uriah aphan pathitoilo. Ammon atum la aphan pathitoilo, lapen la apiso ta nang enpidet-lo!

¹⁰ Non nang Nephan nekroikredet apot ajehak nangso-nangsu atum ovetinta kechethu-kechethat pensi thinangpo.

¹¹ Ne nangphan semetang-lo, nang hemtun angbong pen inut aphan otsi nangputhak pasungpo. Nangpiso Ne nangpen ponsi halatum aphan anut kaprek amonit aphan kepi ahut nang la thek-longpo, lapen la halatum pen pen anerlo amat irap-rappo.

¹² Nang chopapjoilo, bonta kadokave Israel atum la pathek-longjisi Ne la anerlo amat paklempo.”

¹³ Ne Hemphu abethursi pap klem-tang-lo, pusi David pulo. Nathan pulo, “Hemphu nangphan diyalo, nang thithe.

¹⁴ Bonta nang la keklem pen Hemphu aphan langrop-lo apot nangso si thipo.”

¹⁵ Ansi Nathan hem chedamjuilo. Uriah apiso David aphan mahang kepathek a-oso aphan Hemphu aphu pasodet-lo.

David Asopo Kethi

¹⁶ Oso keso kemeji aphan David Arnam ardomlo, la ajatta kechoji molo, lapen aningvevangta la amethang angdeng arlo chedamlo lapen longle athak tilaisi ajo pangthang-lo.

¹⁷ La kangsai achakri atum alanglilong damsi kepathurji aphan bor-ilo, bonta alangli molo, lapen halatum pen alangli thangnatta cho dundedet-lo.

¹⁸ Erui aphi oso thilot-lo, lapen laso abirta David achakri atum la aphan than haihedet-lo. Halatum pulo, “Oso kerenglang ahut eli arju seta David ethakthe tangte kopusonsi alangli sopo kethi alam kethanpoma? La amethang a-ok chepasung det tahai!”

¹⁹ Halatum kechepalamso thek-longsi oso thitang-lo pu David chinilo. Lasi halatum aphan la arjulo, “Oso thitang-loma?” Kalang! La thitang-lo, pusi halatum thak-lo.

²⁰ David longle athak pen thursi lang chinglulo lapen la achu chingsok-lo, lapen ape-ari cheselelo. Ansi la Hemphu ahem arlo damsi archodamlo. Rechohem la nangchelesi la an hang-lo lapen la kepi pen amat la chophit-lo.

²¹ “Nelitum la chinine,” pusi la achakri atum alangliphan arjulo, “Oso kerenglang ahut la aphuthak nangli chirupik-lo lapen an ta chothekthedet-lo; bonta la kethi pen amat, nangli thursi an cholo!”

²² David thak-lo, “Kalang-lo, la kerenglang ahut neli an humlo lapen chirulo. Neli mathalo Hemphu neliphan ingjinsoji mene pu, lapen oso aphan pathilongledet tahai.

²³ Bonta nonke la thitang-lo, apotsi neli an kehumji akam avelo. Neli laso a-oso achethe vanthu-thek jilangma? Nelita arnisi laso a-oso kedo along damnangji, bonta la nelilong kaike seta vangthekthelo.”

Solomon Amahang Kethek

²⁴ Ansi apiso Bathsheba aphan David aning pangsamlo. Bangpi pen irap-rap-lo, lapen bangpi inut sopo amahang pathekpilo, la aphan David ke Solomon pusi amen irlo. Oso aphan Hemphu inghonpik-lo.

²⁵ Lapen Nathan montri aphan hukum pisi oso amen Jedidiah pu amen pa-irtoilo, pima la aphan Hemphu inghonlo.

David Rabbah Kecherai

²⁶ Halaso ahut Rabbah abethursi Joab ron chedanbomlo, la Ammon adet arongsopi kethelo lapen la kecherai longji dokdok-lo.

²⁷ Kepathanjisi la David along pherangke atum aphan toilo: “Neli Rabbah tengkhengsi la alang-keron adim cheraidet-lo.

²⁸ Non nangli ron asong ahin kedo-an pangrumra rongsopi tengkhengnon lapen la nanglimethang aphan cherainon. La cheraipen neli anong en-elo.”

²⁹ Lasi David la aron-asong pangrumsi Rabbah damlo, lapen la tengkheng-lo, lapen la haidet-lo.

³⁰ Ammon a-arnam Molek akumlin aphu pen David lin 35 aser aphutup lapen la along kaprek kechingthang alek-aroi-heihei vandet-lo. Kechingthang alek aroi vansi la amethang recho aphutup along bilo. La anchot kali, la ongdung kethipon amar rongsopi pen ponlo

³¹ lapen halaso arat aphan korot pen kephlak akam, ingchin aku-heihei akam, ingchin acho-heihei akam, lapen ita keselam akam-heihei jakong pen paklemtoilo. Ansi la lapen la amonit atum an Jerusalem chevoilo.