2 SAMUEL 11 - BAIBEL KANGTHIR (BSI)

David Lapen Bathsheba

¹ Recho atum ron kechedanver asek apor, David amethang achakri atum lapen Israel ron-armu pen pen Joab aphan toilo, halatum Ammon atum aphan paremdet-lo, lapen Rabbah arongsopi cheraidet-lo. Bonta David amethang ke Jerusalem alongsi dokok-lo.

² Arnisi, penang an arnikangsam ahut David anerlo kesang pen thurlo lapen recho ahem asarnung angsong arludamlo. La angsong karlu un ahut, la inut a-arloso lang kechinglu thek-lok-lo. Bangpi langmepik.

³ Lasi bangpi komat-loma la kechinijisi pherangke aphan toilo, lapen bangpi Bathsheba pu chinilo, la Eliam asopi lapen Hitti asor Uriah apiso.

⁴ Bangpi aphan kepavandetjisi David pherangke atum aphan toilo; halatum labangpi aphan alanglilong vandet-lo. (Bangpi achiklo chepangthir jutchit anchot-lang.) Ansi bangpi hem chedamlo.

⁵ Aphi bangpi chechinilo la aso kedolo, lasi David aphan laso alam kepathanjisi la aphan birta pilo.

⁶ Anke Joab aphan David birta lolo: “Hitti aso Uriah aphan nelong nangtoitha!” Lasi Joab la aphan David along toilo.

⁷ Uriah nanglelo, lapen David la aphan Joab lapen asong-heihei alam mesenlangma pu lapen ron kechedan kosonloma lahei arjulo.

⁸ Ansi Uriah aphan la arjulo, “Hem chedam non lapen malomso sangdamtha.” Uriah hadak pen damjuilo lapen la ahem asor nong-e lodunlo.

⁹ Bonta Uriah ahem chedamdedet-lo; la rechohem anghap kehon atum alongsi amekjang dunlo.

¹⁰ Uriah ahem chedamdedet-lo pu alam David arjulongsi la aphan alangli arjulo, “Ajirdingklui aphi si nang hem kechevangle kopisi nang hem kechedamdedet-loma?”

¹¹ Uriah thak-lo, “Israel amonit atum lapen Judah amonit atum ron kechedanjisi dam-et-lo; lapen kechejok Asindukta halatum pondet-lo. Neli nokbe Joab lapen la achakri atum anta aklam ajo kechedanjisi chesik-lo. Neli kopusonsi hem chedam pen cho, jun lapen nelipiso pen mekkejang thekpoma? Neli la kedo-an pen seme kangthir tang-lo, lason akam neli kai seta klem un-elo.”

¹² Lasi David pulo, “Tangte dak pini sakoknon, lapen penapsi ne nangphan nangtoithupo.” Lasi halaso arni Uriah Jerusalem along sakok-lo, lapen puthot arnita salo.

¹³ La aphan David ajo kecho hang-lo lapen la aphan hor pangrilo. Bonta puthot halaso ajota Uriah ahem chedamdedet-lo; la lesi amethang keche-um ape athak Rechohem honbang angdeng alongsi amekjang-lo.

¹⁴ Puthot arni Joab aphan David isi aloh toksi Uriah arideng la lodunlo.

¹⁵ La tok-lo, “Ron kechedan kesiknei adimle Uriah aphan aphrang aren binon anke chiruira la aphan pathitoi lonang.”

¹⁶ Lasi Joab rongsopi kecheraiji ahut Uriah aphan hotur atum kangtangnei pu kechini adim toilo.

¹⁷ Hotur asong rongsopi pen nangbarlo lapen Joab asong pen chedanlo; ajehak David achakri atum lapen Uriah amatta thinang-lot-lo.

¹⁸ Ansi David aphan ron kechedan abaha Joab kelong alam pathantoilo,

¹⁹ lapen la pherangke aphan pinkhat-lo, “Ron alam nang recho aphan thandet aphi,

²⁰ la aning thisi nangphan nang arjutahai, ‘kopisi nangtum halatum pen kechedanji aphan rongsopi adung pu-an patebok-loma? Halatum paisong pen thai aso nang ap tahai pu nangtum chechininema?

²¹ Nangtum matha damdema kopusonsi Gideon asopo Abimelek kethinang-lo? La Thebez along inut a-arloso paisong pen arlong arum paklosi la aphan pathilo. La apotsi nangtum kopi athesi paisong adung kedamloma?’ Lason jongsi recho nangphan nang arjulote, la aphan thannon, ‘Nangli chakri Uriahta thinang-lot-lo.’”

²² Lasi pherangke abang David along damsi la aphan Joab kepinkhat ateng thanlo,

²³ la pulo, “Netum ahotur nelitum aphan mute halatum ingtang muchot lapen nelitum pen kechedanjisi rongsopi pen nangbarlo, ha aklam along an, bonta halatum aphan ha rongsopi anghap an nelitum phlungdunlo.

²⁴ Anke latum paisong pen nelitum anat thai aso nang ap dunlo, lapen recho nangli chakri Uriah ta thidunlot-lo.”

²⁵ Pherangke aphan David pulo, “Joab aphan aning parungnon lapen la aphan ning chepa-oi nangnelo pu ra thannon, pima nang chinine komattong ron along kethipone! Isi akangtangnei aketengkheng kedamjile lapen la kecheraidetjile la aphan thannon.”

²⁶ Apenan aphan pathitang-lo pu Bathsheba arjulong-lok pen, bangpi la aphan chiru charnap-lo.

²⁷ Kechiru apor jutdet aphi, bangpi aphan David Recho ahem along pavangtoilo; bangpi la apiso plang-lo lapen la aphan sopo inut mahang pathekpilo, Bonta David keklem aputhak Hemphu aning ingsamse det-lo.