1 TIMOTHI 4 - BAIBEL KANGTHIR (BSI)

Ahok-he Alam Kethan Atum

¹ Karjong pudak-lo, mo aphi akai ahut manene atum kekroi che-oji, halatum kechobei akarjong lapen hi-i atum kethan alam kroiji.

² Kepamang-huthek akepachobei atumsi ahok-he alam hei hei than-pachethang-lo. Ha-latum aning-angthin ke me kepaso pame angchin pen kepasektang asonthak thaksi akethitang-lo.

³ Piso enri, penan dori, lapen ason pen ason akecho amar chori pusi latum thanlo. Bonta kekroi atum, lapen ahok aphan kechini atum kero akardom kepi pen kechoji aphansi Arnam lahei hei akecho amar pinchong-lo.

⁴ Pima Arnam kepinchong amar an mesen, esonnat amarta khinde nangne, bonta kero akardom kepi pensi kadokave amarta deng nangji,

⁵ pima Arnam alam lapen kero akardom kepi pen ajok labangso amar pangthirtang-lo.

Jisu Khristo Aban Keme

⁶ Nangli jongsi labangso akethan pare alam hei hei korte atum aphan than lote, nangli inut Khristo Jisu aban keme plangpo, lapen nangli kedengtang akekroi alam hei hei pen lapen mesen akethan alam pen nangli the-ding-lo pu klangpo.

⁷ Bonta dhoromime lapen thangta kalidet, hako ahut atomo hei hei pen nangli chepahelonon. Nangli dhoromi abang keplangjile charlinon.

⁸ Ok kecheseke akam asapso ale do, bonta dhoromi akam kecheseke ke kadokave anatta ale do, pima lake non lapen mo aphi aphanta chethe kechak do.

⁹ Lake kedeng pame lapen kekroi pame nangji ahok alamlo.

¹⁰ Lasi nelitum klem chepaduksi bor-ibomlo, pima, kerengver Arnam aphansi nelitum ning chethelo. Kadokave amonit aphan, jasemet ke kekroi atum aphan kepajok abang alangli helo.

¹¹ Nangli halatum aphan labangso akethan alam lapen akepare alam hei hei thannon.

¹² Nangli arta kekomchot apot badu amonit setta nangliphan nangpalangret longri, bonta nangli lam keningje tame, nangli ot tame, kanghon tame, kekroi tame, lapen kangthir anat settame, nangli kekroi atum angno arjan cheplangnon.

¹³ Neli vangvetik an rat atum angno Hastro porhera halatum aphan parjubomnon, pachethang bomnon lapen than bom-non.

¹⁴ Nangli kelongtang karjong adan alam mathakrangri; kemontri alam pen lapen mondoli akesar atum ari batsi nangliphan labangso adan pilo.

¹⁵ Kadokave atum nangli keklem kepaphrang ponbom kethek-longji aphan nangli lahei hei akam klemra matha-enon.

¹⁶ Nangli methang akedo kethak a-ot lapen nangli kethan cherenon. Nangli lahei hei akam klembomnon, pima nangli jongsi klembomlo tangte, nangli nangli methang aphan lapen nangli kethan alam karju atum aphanta pajokpo.