1 TIMOTHI 3 - BAIBEL KANGTHIR (BSI)

Mondoli Keja Atum Alamjir

¹ Labangso kepu alam ahok: Mane abang jongsi mondoli keja abang keplangji aning hang-lote, alangli meparpik akamsi aning hang-lo.

² Bonta mondoli keja abang thang ado avedet nangji; alangli inutnat arloso apenan nangji, kematha pangchingthek, aning kecheberthek, kemathavetvetthek, alohi kechakthek, lam kethanthek abang nangji,

³ alangli hor kangri kalite jakong pen kethur abang kalidet nangji, bonta kechingkime, kechebohonghe amonit nangji; alangli tangka hunghedet nangji;

⁴ alangli amethang ahem cheja pame thek nangji, lapen amethang asomar atum aphan chenem pamesi kadokave asonta alangli lam pakroithek nangji.

⁵ Thangbakma inut amonit jongsi amethang ahem cheja thekthe tangte, alangli kopusonsi Arnam amondoli mate kroi-asong lang thekjima?

⁶ Alangli kekroimi abang kalidet nangji, lapu kalite alangli ane chepathesi, Hi-i Sarpo aphan kangsai ason thak-thaksi alangliphan ingsaisi ado padoji.

⁷ Alangliphan kepinrem thekthedetji lapen alangli Hi-i Sarpo apham kedandedetjile alangli Khristian kalidet atum angbongta anong jumesen nangji.

Mondoli Akam Kecherapdun Atum Alamjir

⁸ Lason thak-thaksi Dikon atumta a-ot-adur mesen nangji lapen aning eleppet nangji; alanglitum hor kangrire, lapen tangka ke-hunghe atum nangji;

⁹ bonta kekroi pen kepaklongtang ahok alam aning-angthin klarchen pen otthip nangji.

¹⁰ Aphrang halatum aphan asat lang nangji. Jongsi halatum aphan ado thek-longle tangte halatum Dikon akam paklemnang.

¹¹ Lasonthotsi apiso atumta a-ot adur mesen nangji. Halatum bang aphan kesorsarse atum nangji, kematha pangchingthek abang nangji, lapen kadokave alam setta ahokpet keningje abang nangji.

¹² Dikon abang apiso inutnat nangji, lapen amethang asomar lapen ahem chepangrithek pamenangji.

¹³ Amethang methang akam keklem pame adikon atum aman long, lapen alanglitum Jisu Khristo aphan akekroi kedo alam puthip un.

Thedung Akepatu Alam

¹⁴ Neli nangli long vangdap-prang unji pusi ning thelo setta neli nangli-phan labangso aloh tok-lo.

¹⁵ Jongsi neli nangli long vangdap-prang un-edet tangte, ili, atheke Arnam ahem asangho atum kopuson a-ot pen do nangjima, labangso alam nangliphan labangso alohsi nangpachinipo. Arnam ahem asangho atum ke kerengver Arnam amondoli mate kroi-asong, ahok alam anujok lapen a-archak-lo.

¹⁶ Ilitum adhorom akepatu alam ke arsik-o, lake baduta kroikre un-e. Alangli monit a-arje ensi nangcheklang-lo, alangli ke dhoromi pusi karjong paklang-lo, lapen sining apherangke atum alangliphan thekdunlong-lo. Akaprek kaprek akhei atum angbong alangli lamjir pachethangdet-lo. pirthe adang alangliphan kroilo, lapen alangliphan sining angsong pondet-lo.