1 SAMUEL 9 - BAIBEL KANGTHIR (BSI)

Samuel Aphan Sol Kechetong

¹ Benjamin akhei keplang lapen anong kedo inut amonit dolo, alangli men Kish; la Abiel asopo lapen Zeror asupo, Bekorath akur, la Aphiah aro abeng.

² Alangli sopo inut do, amen Sol, la ke athok dojot amonit-lo. La kethe-keding lapen athok kedo Israel angbong lason inutnat ta avelang.

³ Kish agadha ajehak ingbodet, lasi la Sol aphan pulo, “Inut aban nangri cheponra gadha ridamtha.”

⁴ Latum Ephraim anglong alongri damput-lo lapen Shalishah alongri anta damlo, bonta lahei longledet-lo, lasi halatum Shalim alongri ajo damthulo, seta gadha thek-longledet-lo. Anke Benjamin alongri damlo, tebonseta halatum thek-longledet-lo.

⁵ Halatum Zuph alongri nangkelut ahut, Sol amethang aban aphan pulo, “Etum hem chedam lonang, nepo gadha alam bikoksi etum aphan mathathu var-ret tahailo.”

⁶ Ban abang thak-lo, “Thalang! Laso arong along inut montri kangthir do lapen la aphan man pi-o pima la kepu aling chekok-lo. La along elitum damlonang, lapen gadha kodaksi kelongdamjima alangli etum aphan ethan thek tahaimene.”

⁷ “Jongsi la along ilidamlote. ili kopi la aphan kepinangji?” Sol arjulo. “Etum abor along ta thangnat a-anta ave, etum kepiji aphan thangnat ta avelo, kalima?”

⁸ Aban abang thak-lo, “Nelilong rup adumso dolang. La neli la aphan pidetpo, lapen anke kodaksi halahei kelongjima ephan la ethanthekpo.”

⁹ Sol thak-lo, “Kemesen alamlo! Etum damlonang.” Lasi latum kangthir amonit kedo arong damlo.

¹⁰ Latum rong anglong karlu ahut, lang kesok ajehak a-okarjang chetong-lo.

¹¹ Okarjang atum aphan latum arjulo, “Sangkelang abang rong doma? (Halaso ahut montri aphan sangkelang abang pusi kehang, lasi mane jongsi pine alam Arnam pen karjuji aninghang pulote, la pupo, ‘Sangkelang along damnang.’)”

¹² La abang do, pusi okarjang atum thak-lo. “Alangli nanglitum aphrang nonjonglang kedam. Nanglitum dam paprap lote alangliphan nanglitum chephodunji. alangli pini rong vang-lo, pima inglong angsong rat atum dovan athak kethokji do.

¹³ La aphan kepha atum la hadak-le letik ke rat atum kecho cheng-longle, pima athok aputhak la pahirjume paphrangvek nangji. Nanglitum jongsi non amat damlote, la inglong angsong kecho damji aphan arlule aphrang chetongdun unji.”

¹⁴ Lasi Sol lapen la aban rong anat dambomlo lapen latum arlo kelutdam ahut Samuel karcho anat kedamjisi latum anat vang-lo.

¹⁵ Non arnisi aphrang Samuel aphan Hemphu pulo,

¹⁶ “Penap laso apor Ne Benjamin akhei pen inut amonit nanglong nangtoipo, la nerat aso Israel aphan kepangrijile aphuthak jangthu patipnon, lapen la halatum aphan Philistia atum pen pajokpo. Nerat aso atum akesung Ne thek-long-lo, lapen halatum kerap kelongjile kehangjo Ne arjulong-lo.”

¹⁷ Sol aphan Samuel thek-longsi la aphan Hemphu pulo, “Ne nangkepu amonit la helo. La Nerat aphuthak pangripo.”

¹⁸ Anke Samuel along Sol damlo, la inghap adung lelo lapen arjulo, “Neliphan neli-thantha, kodaksi sangkelang abang kedoma?”

¹⁹ Samuel thak-lo, Neli helo sangkelang abang, karcho adim neliphrang dambomnon. Nanglitum banghinita pini neli pen chorap-rap-lonang. Penap adap nangli karju alam neli thakpo, lapen nanglitum aphan padamlongpo.

²⁰ Nithom aphrang kangbo agadha aphan mathari, halahei long-et-tang-lo. Bonta komat aphansi Israel arat atum la pu-an aning kehangma? La ke nangli helo lapen nanglipo ahemtun helo.

²¹ Sol thak-lo, neli ke Benjamin akhei, Israel angbong akebineilo, lapen nelikhei angbong neli hemtun helo anong kavenei lo. Tangte nangli kopisi lapuson neli kepuloma?

²² Ansi Sol lapen la aban aphan angdengthepi along Samuel japonlo, lapen alohi atum kedo-an bang 30 anbak kangni un atebulthepo along latum aphan adim pilo.

²³ Tundang abangphu aphan Samuel pulo, “Ne nangliphan salajong kepabitoi a-ok vannon.”

²⁴ Lasi tundang-abang kangvaitang a-ok-keng vanpisi Sol angno la bipilo. Samuel pulo, “Langtha! La nangliphan kebipitang a-ok-lo. La cho-iknon. Neli kephatang arat atum kechorap-rapjisi neli la nangliphan panongsi bivet-lo.” Lasi Sol ta Samuel penpen halaso arni chorap-rap-lo.

²⁵ Karcho adim pen ha rong anat latum nanghirlo lapen Sol aphan isi ahongplang sarnung (aklam asarnung) angsong sikpilo,

²⁶ lapen alangli hadak amekjang-lo. Adapprang Sol aphan Samuel ingthurlo, “Thurnon, lapen nangliphan neli nanglitovar nangtoipo” Sol thursi la lapen Samuel tovarpi anat dam rap-rap-lo.

Sol Aphan Samuel Jangthu Kepatip

²⁷ Halatum rong akung nanglesi Sol aphan Samuel pulo, “Nangliban aphan eliphrang padamtoinon.” Ban abang damjuilo lapen Samuel ningjebomlo, “Ladak malomso do iktha lapen Arnam keputang alam neli nangliphan nangthanpo.”