1 SAMUEL 7 - BAIBEL KANGTHIR (BSI)

¹ Lasi Kiriath Jearim arat atum Hemphu Kechejok Asinduk endamdet-lo lapen Abinadab pu inut amonit ahem la pondet-lo, la inglong aphuchongsi kedo. La asopo Eleazar aphan la pache-hemphujisi panong-lo.

Israel Aphan Samuel Kepangri

² Penang an arni, ningkan ingkoi anbak Hemphu kechejok Asinduk Kiriath Jearim along dolo. Halaso ahut Israel aso kedo-an kerap kelongjisi Hemphu aphan kechiru pen hang-lo.

³ Israel arat aphan Samuel pulo, “Nangtum jongsi nangning aklong pen Hemphu anat pangnolo pulote kedo-an bang adet arnam-heihei lapen Astarte a-arnampi akumlin-heihei chevar-etnon. Nang methang Hemphu aphan chehodaira la aphanle archochotnon, lapen la Philistia ajakong pen nangtum aphan nangpajokpo.”

⁴ Lasi Israel atum halatum Baal lapen Astarte akumlin-heihei chevar-etsi Hemphu aphan archochot-lo.

⁵ Anke Israel kedo-an aphan Mizpah along Samuel pachingrum-toilo, lapen pulo, “Nangtum aphan hadak ne Arnam nang ardompipo.”

⁶ Lasi halatum kedo-anta Mizpah along chingrumpet-lo. Halatum Hemphu aphan isi athok asonsi ajehak alang sok si la dung-lo lapen halaso arni kangthim halatum an humlo. Halatum pulo, “Netum Hemphu aphan langropsi pap klemtang-lo.” (La Mizpah alongsi Israel atum kechedansai alam Samuel pangsamlo.)

⁷ Mizpah along Israel atum chingrumtang-lo pu Philistia atum arjulongsi bangpho Philistia arecho halatum aphan ketengkhengjisi amonit cheponpak-lo. Laso alam Israel atum arjulong-lo lapen pherepik-lo,

⁸ lapen Samuel aphan pulo, “Philistia atum pen kejokjile etum Arnam Hemphu aphan ardomvertha.”

⁹ Biresak aloso Samuel thusi la arpum amat Hemphu aphan kethokjisi phrindut-lo. Anke la Israel aphan Hemphu keparapjisi ardomlo, lapen la akardom Hemphu thak-lo.

¹⁰ Samuel athok kepi un ahut Philistia atum ketengkhengjisi vang-lo, bonta halaso ahut amat halatum aphan Hemphu sining pen cheter paklolo. Halatum manghusi keso pen kat-lo.

¹¹ Israel atum Mizpah pen nangbarsi Philistia atum aphi phi hungdunlo ha Bethkar pu adim an, lapen tovarsoding halatum aphan un an pathilo.

¹² Anke Samuel arlong isi ensi Mizpah lapen Shen angbong la elo lapen pulo, “Tovarsoding anta Hemphu-si ephan erap-lo,” lapen la “Kerap Arlong” pusi amen irlo.

¹³ Lasonsi Philistia atum aphan paremdet-lo, lapen Samuel achethe dotik an Israel alongri ketengkhengji pen Hemphu halatum aphan khamkhelo.

¹⁴ Philistia atum kecherai Ekron pen Gath angbong Israel arong kedo-an Israel aphan voi nang-et-lo, lapen Israel atum la longri kedo-an chelong-et-lo. Lapen Israel pen Kanaan atum angbong ningkangsam dolo.

¹⁵ Samuel rengtik an Israel aputhak pangrilo.

¹⁶ Aningkanvang ta Bethel, Gilgal lapen Mizpah anat ephong vurdamverlo, halahei adim la kechedansai alam pangsamlo.

¹⁷ Anke la amethang ahem Ramah along chedampo, hadak kangsai-abang akam klemlo. Ramah along Hemphu aphan isi adovan la kimlo.