1 SAMUEL 6 - BAIBEL KANGTHIR (BSI)

Kechejok Asinduk Kevoithu

¹ Philistia atum along Hemphu Kechejok Asinduk chiklo jon 7 an kedo aphi,

² rat atum, kurusar lapen mekbin keklem atum aphan hangpetsi arjulo, “Hemphu Kechejok Asinduk aphan eli kopi inghoi nangji? Eli jongsi la kedo adimthot thondun pulote eli kopi pensi thondun poma?”

³ Halatum thak-lo, “Nangtum Israel a-Arnam Hemphu Kechejok Asinduk voithuji pulote nangtum apap apharman la aphan dan pen thondun nangji, Kechejok Asinduk dan ponpipe pinpen voithu nangne. Lasonsi nangtum keso mepo lapen kopi athesi la nangtum aphan aduk kepima nangtum chinipo.”

⁴ La aphan kopi adan pensi thondun nangji? Rat atum arjulo. Halatum thak-lo, “Ingthum asonthot ser angkleng pho lapen jukingso asonthot aser angklengpho, la asitinta abangphutin Philistia arecho apharmanlo. La isinat avur nangtum kedo-an aphan lapen recho bangpho apharman nangtoilo.

⁵ Ingthum lapen jukingso asonthot nangtum selam nangji lapen la nangtum adet pavirlo lapen nangtum Israel a-Arnam aphan man pinangji. Lalote nangtum, nang arnam atum, nangdet aputhak la aduk-kepi hamji mene.

⁶ Nangtum kopisi Ijip arecho lapen Ijip asor ason ning chepabuklui bomlangma? Israel atum aphan Ijip pa-otoite halatum aphan Arnam chongthuilo, pu nangtum tengnedet-loma?

⁷ Lasi hemkonglong ahum kemi siknon, lapen arthangthepin achainong api jonni siknon; lahei hemkonglong parthangnon lapen aso ke aroi toiphitnon.

⁸ Hemphu kechejok Asinduk ponnon, lapen hemkonglong athak batnon, lapen nangtum apap apharman la aphan dan kepidunjile ser adum-heihei Asindukso Sinduk adungle bidunnon. Hemkonglong la atovar padamra la amethang padamtoinon.

⁹ Anke la langdunkrinon. La jongsi Beth Shemesh arong anat damlote la Israel a-Arnamsi laso kepherememe akevir etum aphan etoilo. Bonta jongsi la kali pulote, la le avur nangketoi kali pu chinipo, la ke lapu amatsi keplang-lo.”

¹⁰ Latum aphan kopisi kethan loma halatum la klemlo; Halatum chainong api jonni ponsi hemkonglong parthang-lo lapen aroi along aso aphan beng-lo.

¹¹ Halatum kechejok Asinduk lapen jukingso asonthot aser angkleng lapen ingthum asonthot aser angkleng Asinduk penpen hemkonglong athak batdunlo.

¹² Chainong api tovar kedam pangcheng-lo ha Beth Shemesh anat lapen la anatsi kedam pakengsonlo, la pu pu atovar suisepinlo. Halatum dambom ahut halatum langcharidunlo. Bangpho Philistia arecho atum anta latum aphi phi Beth Shemesh ahoi anta dunlo.

¹³ Beth Shemesh arat atum arlok along soktipli kerotbom ahut halatum men men angsong cholang-railo, lapen Kechejok Asinduk thek-long-lo. thek-lok pen halatum aning arongpik-lo.

¹⁴ Hemkonglong vangsi Beth- Shemesh along kedo Joshua pu amonit ahidi along arlongpi adung nangsakok-lo. Rat atum Thengpi ahemkonglong pu et-lo lapen chainong api thusi halahei Hemphu aphan kephrin athok pinchong-lo.

¹⁵ Levi atum Hemphu kechejok Asinduk lapen ser amar Asindukso rungsi arlongpi athak halatum batdamlo. Ansi Beth Shemesh arat atum Hemphu aphan kephrin athok lapen kaprek athok pajirlo.

¹⁶ Philistia arecho bangpho lahei keklem achar pen langdunlo halaso arni amat Ekron chedamjuilo.

¹⁷ Philistia atum ingthum ason ser angkleng dumpho Hemphu aphan dan halatum apap apharman pilo. Asitin rongsopi arong tin la Ashdod. Gaza, Ashkelon, Gath lapen Ekron aphanlo.

¹⁸ Halatum jukingso ason ser angkleng ta arongsopitin along keparecho a-Philistia paisong arongsopi lapen paikave arong arecho apharman lodunlo. Beth Shemesh along kedo Joshua ahidi a-arlongpi alongsi halatum Hemphu kechejok Asinduk bat-lo. La hadak kopi plang-loma isi ahakilo.

¹⁹ Beth Shemesh asor aphan Hemphu bang 70 amonit pathilo, pima latum kechejok Asinduk arlo langdet-lo, lapen rat atum ningduk-lo pima Hemphu halatum angbong ongdung aphan pathilo.

Kiriath Jearim Along Kechejok Asinduk

²⁰ Lasi Beth Shemesh amonit atum pulo, “Komatsi laso Kangthir Arnam Hemphu angno karjap un poma? Etum pen la aphan kepahelojile konatsi ketoi apot-loma?”

²¹ Kiriath Jearim arat aphan kepapujisi halatum pherangke toilo, “Philistia atum Hemphu Kechejok Asinduk nangvoitang-lo. Vang-ra la nang-ingthumnon.”