1 SAMUEL 5 - BAIBEL KANGTHIR (BSI)

Philistia Angbongsi Kechejok Asinduk Kedo

¹ Kechejok Asinduk Philistia atum cheraidet aphi, latum Ebenezer pen halatum arongsopi Ashdod anat la pondet-lo,

² lapen halatum a-arnam Dagon ahem arlo pondet-lo, lapen la akumlin arei si la pangnilo.

³ Puthot adap Ashdod arat atum Hemphu kechejok Asinduk angno Dagon akumlin krepthor thek-long-lo. Lasi la ingthurlo lapen la adimthot bat-thulo.

⁴ Puthot adap ta kechejok Asinduk angno laso akumlin kekrepthor thek-long-lo. Non aphong abang ke aphu lapen la ari hongnita ching-lokpet-lo lapen jakan alongsi tilailo; abangsi dochot-lo.

⁵ (Lasi nonputa Dagon akurusar atum lapen la karcho atum Ashdod along la athok athak arkanverlo, lapen laso adim dongdelo.)

⁶ Ashdod arat aphan Hemphu adukpipik-lo, lapen halatum aphan papherephrat-lo. La halatum aphan aduk pilo lapen adung arei along kedo arat aphan ingthum avur pen pasung-lo.

⁷ Lahei keplangbom thek-longsi halatum pulo, “Israel atum a-Arnam etum aphan lapen etum a-arnam Dagon aphan adukpilo. Kechejok Asinduk ladak etum along padobom nangnelo.”

⁸ Lasi halatum pherangke atum aphan toisi Philistia arecho bangpho pachingrumlo lapen halatum aphan arjulo, “Israel a-Arnam Kechejok Asinduk aphan eli kopi klemnangjima?” La Gath along pondet-non, pusi halatum thak-lo; lasi halatum la Gath along pondet-lo, la Philistia atum akaprek arongsopilo.

⁹ Bonta la hadak lerok pen rongsopi asor aphan Hemphu keso pahangjolo. La halatum aphan ingthum akeso rongsopi arat kedo-an, oso pen akesar atum an aphanta adukpilo.

¹⁰ Lasi halatum Ekron along kechejok Asinduk thon-damkok-lo, lata Philistia arongsopilo, bonta la hadak lerok pen amat rat atum kechiru hangjolo. “Netum kedo-an aphan kepathijisi latum Israel a-Arnam kechejok Asinduk ladak vanlilo!”

¹¹ Lasi puthot Philistia arecho kedo-an aphan pahangdamtoisi pulo, “Israel akechejok Asinduk la adimthot voithunon, anke la etum aphan lapen ehemtun aphan epathithelo.” Rongsopi adang an keso hangjolo pima halatum aphan Hemphu adukpipik-lo.

¹² Lapen kethithe atum seta ingthum akeso long-lo lapen kerap kelongjisi halatum a-arnam aphan rat atum kechiru hangjolo.