1 SAMUEL 4 - BAIBEL KANGTHIR (BSI)

Kechejok Aloh Asinduk Kecherai

¹ Halaso ahut Philistia atum chingrumpetsi Israel pen ron kechedanjisi damlo, lasi Israel atum halatum pen kechedanjisi barlo. Israel atum Ebenezer pu adimsi mukam chekimlo, lapen Philistia atum ke Aphek pu adimsi chekimlo.

² Philistia atum tengkheng-lo lapen ron chedan-o aphi halatum Israel aphan paremdet-lo, lapen ron aklam along bang suriphli amonit pathilo.

³ Ahin kerenglang atum mukam chevangsi Israel ajalin atum pulo, “Pini Hemphu etum aphuthak kopisi Philistia atum pahailongdet-loma? Etum damra Hemphu kechejok Asinduk Shiloh pen vandet-lonang, anke la etum along nangdunpo lapen ehotur pen epajokpo.”

⁴ Lasi halatum Shiloh along pherangke toilo, lapen Jakongkethe Hemphu Kechejok Asinduk, arveng kedo api athak kepangniver, la pondet-lo, lapen Eli asomar banghini Hophni lapen Phinehas ta Kechejok Asinduk along dunlo.

⁵ Kechejok Asinduk lesi, Israel atum pu-an asekethe pen hang-lo lapen pulo,

⁶ “Ibri amukam along kehang ase arjutha! La kopi aphanlo?” Hemphu Kechejok Asinduk Ibri amukam along nangletang-lo pu Philistia atum chinisi,

⁷ halatum pherelo, lapen pulo, “Inut Arnam halatum along vangtang-lo! Etum kevirlo! Lason etum aphan aphrang plangple-pinlang!

⁸ Komatsi la Jakong-kethenei a-Arnam atum pen epajok unpoma? Halahei arnam atum helo kejejangtang ajo Ijip atum aphan kepathi abang-lo!

⁹ Nangthin chepathenon Philistia atum! Pinso ason chedannon, kalite latum etum aban keplang ason etum Ibri atum aban plang nangpo; pinso ason chedannon.”

¹⁰ Philistia atum kechedan pasikpik-lo, lapen Israel atum aphan paremdetsi ahem pachekat-et-lo. Halaso arni thipik-lo: Bangsuri 30 Israel aron-aso atum thinang-lo.

¹¹ Arnam kechejok Asinduk ta cheraidet-lo, lapen Eli asomar Hophni lapen Phinehasta thilot-lo.

Eli Kethi

¹² Benjamin akhei pen inut amonit ron aklam pen tovarsoding Shiloh anat nangkat-lo, lapen halabangso arni amat nanglerok-lo. Aningke-oi kechepaklangjisi la ape chingsek-lo lapen aphu athak longle chebat-lo.

¹³ Eli, Kechejok Asinduk alam kechiniji ingtung-olo, la tovar akung ingnisi cholangding-lo. Bangso amonit rong adang an birta pachethang-lo, lapen abangphutinta pheresi chirulo.

¹⁴ Kehangjo ase Eli arjulong-lo, lapen arjulo, “Lahei kehangjo athe kopilo?” Bangpo amonit Eli aphan birta kethanjisi la along kat paprap-lo.

¹⁵ (Eli arta non ningkan 98 tang-lo lapen amek checharchepin asonlo.)

¹⁶ Bangso amonit pulo, “Ron pen chepajoksi ne ladak an pini tovarsoding nangkat-lo.” La aphan Eli pulo, “Kopi cheplang-lo asopo!”

¹⁷ Pherangke thak-lo, “Philistia atum pen Israel atum kat-et-lo; la etum aphan kepherememe akeremlo! La aparta nanglisomar Hophni lapen Phinehasta thidunlot-lo, lapen Arnam kechejok Asinduk ta pondet-lo!”

¹⁸ Pherangke abang Kechejok Asinduk alam kethan ahut eli inghap adung inghoi pen aphi chiruilo. La pu an sarlo lapen akromthelo la klibup-lo lapen achethok ching-loksi thilot-lo. La ningkan 40 Israel atum aphan jalo.

Phinehas Apiso Kethi

¹⁹ Eli amunpi, Phinehas apiso ke aso aphili-lo, lapen oso amahang pathekji dokdok-lo. Arnam kechejok Asinduk pontang-lo lapen bangpi alok-hei lapen apenanta thitang-lo pu arjulong-lok pen bangpi damsi menmen oso amahang pathek-phlot-lo.

²⁰ Bangpi kethipo pu ahut bangpi aphan kerapdun a-arloso atum bangpi aphan pulo, “Nangthin chepathenon! Sopinso inut long-lo!” Bonta bangpi thangta arjudun long-ledet-lo, lapen thakthedet-lo.

²¹ Bangpi oso aphan “Ikabod” pusi amen irlo, lake “Arnam ahir-asang Israel aphan otang-lo.” La kechejok Asinduk kepapon-long lapen alok-hei lapen bangpi apenan kethi aphansi kepudamlo.

²² “Arnam ahir-asang Israel aphan otang-lo, “ Bangpi pulo, “pima Arnam kechejok Asinduk pontang-lo.”