1 SAMUEL 31 - BAIBEL KANGTHIR (BSI)

Sol Lapen La Asomar Kethi

¹ Gilboa anglong along Philistia atum Israel pen isi aron chedanlo. Hadak ongdung a-Israel atum thinang-lo, lapen ahin halatum Sol recho lapen la asomar anta katnang-lo.

² Bonta Philistia atum halatum aphan kehungdun paphodunsi Sol asomar bangkethom, Jonathon, Abinadab lapen Malkishua aphan pathilot-lo.

³ Sol adung arei ron kechedan sikpik-lo, lapen la amethang amat ta hotur athai aso alanglibang apchok-si areng pasodak-lo.

⁴ Alangli ron arisim kepon ariso abangphan pulo, “Nang nokjir chesat-ra nepathilotnon, anke arnam kechinine a-Philistia atum neborsi nephan nepathi longledetpo.” Bonta riso abang la keklemji phereduk-lo. Lasi Sol amethang anokjir chesansi laso athak krepsi chetarplut-lo.

⁵ Riso abang Sol kethitang thek-longsi la ta amethang anokjir athak krepsi chetarplut-lo lapen Sol along thidunlot-lo.

⁶ Lasonsi Sol, lapen la asomar bangkethom lapen riso abangta thilo; halaso arni Sol amonit atum an thi-et-lo.

⁷ Jezreel Arlok lapen Jordan Aroi parai anihang anat kedo a-Israel atum aron-armu kekat alam lapen Sol, la asomar atum kethi alam arjulongsi halatum amethang arong che-otekangsi kat-lo. Anke Philistia atum vangsi halahei adim cherailo.

⁸ Ron kechedan puthot arni Philistia atum hidi ketiki asai inghudamlo, lapen Sol lapen la asomar bangkethom kethitang abang arpum thek-long-lo.

⁹ Halatum Sol aphu ingthanpet-lo lapen ron arisim an phlok-et-si halatum akumlin-heihei aphan lapen rat aphan kehai abirta-keme alam kethan pachinijisi Philistia adang kedo-an pherangke toilo.

¹⁰ Lapen la arisim Astarte arnampi akardomhem along latum bilo, lapen la abang arpum Beth Shan arongsopi apai arpong along tarlok-lo.

¹¹ Gilead along kedo Jabesh arat Philistia atum Sol aphan keklemtang alam arjulongsi,

¹² angthin kethenei amonit atum barlo lapen Beth Shan anat jopangthang damlo. Halatum Sol lapen asomar abang arpum pai arpong pen pasunsi Jabesh along halatum vanlo, lapen hadak halatum me phlong-lo.

¹³ Anke latum arrepi-heihei ponsi lahei rong along kedo tantuli arong arum pip-lo lapen nithroksi an humlo.