1 SAMUEL 30 - BAIBEL KANGTHIR (BSI)

Amalek Atum Pen Ron

¹ Ni ni aphi David lapen la amonit atum Ziklag nangchelelo. Amalek atum Judah anitur anat mar thiponlo, lapen Ziklag aphanta tengkheng-lo. Halatum rong me keisi

² arloso kedo-an aphan neppon-et-lo; lapen badu aphanta halatum pathithe, bonta abangphutin halatum along dunnang-lo lapen adim otekang-lo.

³ David lapen la amonit atum nangkechele ahut ke rong me kecho halatum thek-long-lo, lapen halatum apiso aso anta ponpi-et-lo.

⁴ David lapen la amonit atum kechiru pangcheng-lo, lapen latum ainilak-letik kechiru hamhedet-lo.

⁵ David apiso banghini, Ahinoam lapen Abigail aphanta pondet-lo.

⁶ David non sungpik-lo, pima la amonit atum, asomar chepangbo nang-etsi aning hodak-lo lapen la aphan arlong pen varbopji pusi papherelo; bonta la a-Arnam la aphan aningparung-lo.

⁷ Ahimelek asopo Abiathar, kurusar aphan David pulo, “Sangkelang a-arlong nelong vantha,” lapen la alanglilong vanpilo.

⁸ Hemphu aphan David arjulo, “Hala kethiparohum atum aphi ne duntame ma? Lapen halatum aphan ne nep-unjima?” La thak-lo, “Halatum aphi dunnon, halatum aphan nang nepdun unji lapen ban kepontang atum aphan nang pajok unji.”

⁹ Lasi David lapen la amonit atum bang 600 barlo lapen halatum Besor alangjeng along nanglelo lapen ajehak atum ke hadaksi padolo.

¹⁰ David la amonit bang 400 atum pen dambomlo; akaprek bang 200 atum ke aini-ong amat langroi kap un-esi langkung sakok-lo.

¹¹ David along kedun amonit atum inut Ijip asor a-oso rong along chetong-lo lapen la aphan David along vandet-lo. Halatum la aphan ajehak lang lapen an pilo,

¹² lapen ajehak thebo akreng, drakha athekreng bitung hini la chodet aphi, la jakong chevangthulo, nithom akangthim la cholongle-jun longle pinlo.

¹³ La aphan David arjulo, “Nang hemphu komat-lo, lapen nang konat penlo?” “Neli inut Ijip asor, lapen Amalek inut abanlo,” la thak-lo. “Nithom aphrang neli hemphu ladak ne-otekang-lo pima neli sodet.

¹⁴ Chereth alongri lapen Ziklag ta me keilo.”

¹⁵ “Hala kethiparohum atum along nephan nejapon thekjima?” pusi David la aphan arjulo. La thak-lo, “Nangli jongsi Arnam amen pen nepathithe lapen nelihemphu arideng hodaidelo pu semetang-lote nangthanji.”

¹⁶ Anke halatum along la David aphan japonlo. Kethiparohum atum bithe-bitha chehijikjam si cholo junlo lapen talonlo, pima Philistia lapen Judah atum pen ongdung amar latum thipon long-lo.

¹⁷ Adapprang halatum aphan David tengkheng-lo, lapen arnikangsam an chedanlo. Bang 400 arisomar atum ka-ut ardon pen kekat atum apar baduta jokjedet-lo.

¹⁸ Amalek atum kepon abangphutin lapen asontin amar, lapen apiso banghini aphanta pajok-et-lo.

¹⁹ Thangnatta kangbo ason avedet-lo. David amonit atum asomar lapen Amalek atum kepontang kedo-an amar chelong-et-lo.

²⁰ Kepangreng api lapen vo kedo-anta la chelong-et-lo; halatum angno la amonit atum kepangreng api kedo-anta phlung pilo, lapen pulo, “Lahei David amar.”

²¹ Anke Besor alangjeng akung kedo bang 200 ke-ainipik David along kedun un-e atum along alangli chedamthulo. David lapen la amonit atum aphan halatum kechetongjisi nangbarlo, lapen David halatum along arludamsi halatum aphan ning aklong pen kardom pilo.

²² Bonta David along kedun ajehak amo-kevangve amonit atum pulo, “Latum etum along nangdundedet apot eli kelong amar latum aphan pinangne. Latum apiso aso cheponsi damnangpo.”

²³ Bonta David thak-lo, “Korte atum, Hemphu etum aphan ekepitang amar pen nangtum lason klem nangne! Alangli elitum aphan erailo lapen kethiparohum atum aphuthak epahailo.

²⁴ Nangtum keningje alam along baduta nangchedondun thekthe! Abangphutinta apharman chelongrep nangji! Kecho amar kehon atum seta ron kedun atum seta apharman isinatpo.”

²⁵ La isi aron David pathik-lo, lapen la Israel angbong halaso ahut pen nonputa nangdobomlo.

²⁶ Ziklag anat David kechevoithu ahut, la ajehak kelong amar ajirpo atum Judah ajalin atum aphan birta pen lolo, “Hemphu ahotur atum pen netum kethidun amar lahei nangtum aphan isi adanlo.”

²⁷ Bethel arat aphan, Judah anitur ahin kedo Ramah arat aphan, lapen Jattir arong arat aphan,

²⁸ Aroer, Siphmath, Eshtemoa,

²⁹ lapen Rakal; Jerahmeel aro aphan, Ken aro,

³⁰ lapen Hormah, Borashan, Athak, lapen

³¹ Hebron arong arat aphan lahei alangli lolo. La lapen la amonit atum kejui adim alongtin anta la lopet-lo.