1 SAMUEL 29 - BAIBEL KANGTHIR (BSI)

David Aphan Philistia Atum Kedengmo

¹ Israel atum Jezreel Arlok alangmek along mukam kechekim ahut Philistia atum kedo-an asong Aphek along pangrum et-lo.

² Bangpho Philistia arecho atum halatum amethang methang pharo asong, suri asong amonit pen bar rep-lo. David lapen la amonit atum Akish recho aphi phi dunlo.

³ Philistia atum ron ahemphu halatum aphan thek-longsi arjulo, “Lahei a-Ibri atum dak kopi akamlo kedo?” Akish thak-lo, “Lake David, Israel arecho Sol achakrilo. La nelong kedo penang ajirding-lo. La nelong kevang arni pen ne la aphan thangnat adai thek-longle.”

⁴ Bonta Philistia aronhemphu Akish aphan aningthisi pulo, “La aphan nangli kepi aron-aso arat toithunon. Elitum along laso amonit ron nangpadun nangnelo; ron kechedan ahut la etum abe thur-rong tahai. Etum amonit mute ahemphu aphan aningkepadok helo la aphan atovar kemenei la kopi dolang?

⁵ Jat seta lake David, laso abang aphansi arloso atum lunlo, la halatum kekan ahut, ‘Sol ke suri isinatsi pathichot, bonta David ke surikep an sosesi pathilo.’”

⁶ David aphan Akish hangsi laphan pulo, “Israel kereng-et a-Arnam amen pensi neli semetang-lo, nangli neliphan kroipamelo; lapen ron along nelilong nangkedunji aphan nelining dok-olo. Nelilong nangli kevang arni pen nangliphan neli thangnat adai thek-longle. Bonta akaprek arecho atum nangliphan dengmolo,

⁷ lasi ingsamjin penle hemdam iknon, lapen latum aphan aning kedokde akam klemrinon.”

⁸ David thak-lo, “Neli kopi akechok-che klemloma, akehai? Jongsi nangli kepu ateng, nangliphan kangduk arni pen nelidai thangnatta thek-longle pulote, kopi athesi neli nanglilong nangli hotur pen ron chedandun longledet-loma, hemphu lapen recho?”

⁹ “Neli kroilo, “ Akish thak-lo, “Neli nangliphan Arnam apherangke ason kekroi lo pusi thek long-lo. Bonta akaprek arecho atum pulo, nangli nelitum along dun longle pu.

¹⁰ Lasi, David, penap adapprang nanglitum Sol aphan ke-o atum nelilong kevang atum an adapprang thursi kethe-ang pen damnangpo.”

¹¹ Lasi David lapen la amonit atum adapprang barsi Philistia adet anat chedamlo, lapen Philistia atum Jezreel anat dambomlo.