1 SAMUEL 26 - BAIBEL KANGTHIR (BSI)

Sol Aphan Puthot David Karmutme

¹ Ajehak amonit Ziph pen Sol along Gibeah vang-lo lapen David Hakilah anglong, Judia akejejangtang ajo angchun si chepa-tulo pu alam thanlo.

² Sol tongsekotsi Ziph kejejangtang ajo anat David aphan keridunjisi Israel anglong angbong akangtangnei aron-aso bang 3000 cheponsi damlo,

³ lapen Hakilah anglong atovar kejejangtang ajo si dolang, David ta hadaksi dolang lapen Sol vangsi la aphan keri alam chinisi

⁴ la kelangjoi atum aphan toilo lapen Sol hadak amatsi kedolang pu pangthek tekang-lo.

⁵ Tongsekot la damsi Sol lapen Ner asopo, Abner, Sol aron-armu ahemphu amek kejang adim ledamlo. Sol abang mukam arlosi amek kejang lapen la amonit atum la aphan kompetsi mukam chekimlo.

⁶ Hitti asor Ahimelek aphan lapen Joab akor Abishai (Latum apei Zeruiah) aphan David arjulo, “Sol amukam along nangtum banghini komatsi nelong nangdunpo?” Neli nangdunpo! Abishai thak-lo.

⁷ Lasi halaso aningve David lapen Abishai atum Sol amukam arlo lut damlo, lapen Sol abang mukam angbong chittimchit si amek kejang, achir ke phutang adung longle along somdong-lo. Abner lapen asong atum ke la adung kompetsi amekjang-lo.

⁸ David aphan Abishai pulo, “Paningve nangli hotur aphan Arnam nanglirideng hodaitang-lo. Non la achir pen la aphan toksi longle along krongplotpo, ephong anta chok ne bataihini klem nangnelo.!”

⁹ Bonta David thak-lo, “Nang la aphan papho nangne! Hemphu kangvaitang arecho aphan kepapho abangphan la aduk pivekji.

¹⁰ Kereng-et a-Hemphu pen ajok,” David ningjebomlo, “Ne chini, Hemphu amethangsi Sol aphan pathiji, kethi arni nanglelote mate ron along la thinangji.

¹¹ Hemphu kangvaitang arecho aphuthak neri kechirungji pu kebor-i Hemphu neliphan paklemklenang! Elitum la achir lapen alangbong ponra damlonang.”

¹² Lasi David la aphutang pen Sol achir lapen alangbong ponlo lapen Abishai damjuilo. Baduta la thekdun longledet-lo, mate kopi plang-loma chini dundedet-lo lapen amek prangpredet-lo, pima Hemphu halatum kedo-an aphan amek pajangthip-lo.

¹³ Anke David arlok kaprek ang-long anat kapsi chepahelolo lapen chepajokvanlo,

¹⁴ lapen Sol asong lapen Abner aphan hang-lo, “Abner! Nang nephan arjulong-loma?” Recho aphan amek kepaprangdak ase la komat ase lo? Abner arjulo.

¹⁵ David thak-lo, “Abner, nang Israel angbong kangtangnei amonit kalima? Tangte nang kopisi nanghemphu recho aphan cherai thekthe det-loma? Nonjong amat nanghemphu, recho aphan kepathijisi mane mukam lutchok-lo.

¹⁶ Nangkam nang cheklem thekthetang-lo, Abner! Ne kereng-et a-Hemphu amen pen semetang-lo, nangtum kedo-an kethinangji a-ot do, pima nanghemphu recho, Hemphu kangvaitang abang aphan rai thekthetang-lo. Chelangtha! Recho achir konat-lo? La aphutang along alangbong konat-lo?”

¹⁷ David aselo pu recho chinisi arjulo, “David nanglima sopo?” Kalang, Recho, David thak-lo.

¹⁸ Lapen la puthulo, “Kopilo, akehai, neli nangliban aphan nangli hungdunbom jilangma? Neli kopisi keklemloma? Kopi apransi neli karmut-loma?

¹⁹ Recho arju iktha, neli kepu alam asontin nangli nelibe kethur Hemphu pen pulote isi athok pen ajok la aning pakeng un; bonta monit si la keklemlo pulote, halatum aphuthak Hemphu ahirjuno paklonang, pima halatum neliphan Hemphu alongle pen ha bang adet a-arnam-heihei aphan kangduk un adetsi nephlung-lo.

²⁰ Hemphu pen pahelora neliphan bang adet alongle along nepathirinon. Kopisi Israel arecho vangsi chikli aso ason thakthak amonit nephan kepathiji hung-loma? Ingnam avo ason kopisi la nephan hung-loma?”

²¹ Sol thak-lo. “Nelisi kechokchelo. Sopo David vangtha! Neli nangliphan paphophelo, pima paningve nangli neliphan pathithedet-lo. Neli kelu abang-lo! Neli kepherememe akamsi klemtang-lo!”

²² David thak-lo, “Ladaksi nangli chir do Recho. Nangli monit pavang-ra la nangpa-ennon.

²³ Kekroithip lapen kekengset atum aphan Hemphu nong-e-heihei pi. Pini alangli nanglikai nelirideng nehodaitang-lo, bonta Hemphu kebat arecho aphan neliri chirung-relo.

²⁴ Neli nangliphan pran-karmutme asonthot-le Hemphu neliphanta paklemnang lapen kesung kedo-an pen pajoknang!”

²⁵ David aphan Sol pulo, “Arnam nang-pahirjumenang, osa! Nangli keklem aling asontin ta chunji!” Anke David amethang atovar che-damlo, lapen Sol ta ahem chevoilo.