1 SAMUEL 24 - BAIBEL KANGTHIR (BSI)

Sol Apran David Karmutme

¹ Philistia atum pen kechedan Sol nangchevoisi, David Engedi adung akejejangtang ajosi do pu Sol aphan thanlo.

² Israel angbong bang 3000 kethantang aron-aso Sol cheponsi karju alongbui anihang anat David lapen la amonit atum aphan ridunlo.

³ La biresak aroi-heihei tovar adung alongku vangsi sang-lo. La David lapen la amonit atum kechepatu alongku acharchot athengnosi donang-lo.

⁴ David aphan halatum pulo, “La nangliphan avarsai kemelo! Hemphu nanglirideng nang-hodaidetpo lapen la aphan nangli ning kehang aling klem unpo.” David karkum pen damlo, lapen Sol ape ade la pachininepin pen rotchet-lo.

⁵ Bonta David aning pachakchedet-lo,

⁶ lapen la amonit aphan la chepulo, “Nehemphu aphan kephangno akam pen Hemphu nepahelonang, pima la Hemphu kangvaitang arecholo! Ne la aphan asapta paphophedetpo!”

⁷ Lasi la amonit aphan David pakroilo lapen halatum Sol aphan tengkhengkhe-det-lo. Sol thursi longku olo, lapen atovar kedam pangcheng-lo.

⁸ Anke David la aphi phi dunsi laphan hang-lo, “Recho!” Sol chetevarlo, lapen David angphun patongkisi man pilo,

⁹ lapen pulo, “Nangliphan kephangnoji aphan neli kebor-ipu nangli bang alam kopisi karjulo?

¹⁰ Nangli methang chelangtha, non aphrangjong amat Hemphu nangliphan nelirideng nehodaitang-lo. Neli monit atum ajehak nangliphan pathitoilo, bonta neli nangliphan jinsolo lapen pulo, neli nangliphan phangnonelo pima nangliphan recho kepachojisi Hemphu ingvailo.

¹¹ Lang iktha, ong, la nanglipe achet nanglang iktha! Neli nangliphan pathilotjita long-lo, bonta la klemklesi la bengchot-lo. Lapen neli nangliphan pachinilo, neli nanglibe kethurji mathathe mate nangli phangnone. Neliphan kepathiji nangli neridunbom, neli nangliphan thangta kechokche ason klemkle seta

¹² elitum angbong komatsi kechokchema Hemphu-le epangsai lonang! Neliphan keklem apot nangliphan aduk nangpi tahai, pima neli nangliphan phangnonepin.

¹³ Sar-lar atum kepu alam nangli chini, ‘Kehingno akam ke kehingno amonit atumsi keklem.’ Lasi neli nangliphan phangnonelo.

¹⁴ Lang iktha! Israel arecho kosonsi kepathiji bor-iloma! Lang iktha! Kopi athesi aphi kehungbom langma! Kethitang amethan aphima, mate bitu ejon aphima!

¹⁵ Hemphu ingsaipo, lapen elitum angbong komatsi kechokchema alangli pharpamepo. Laso alam aputhak la langsi neliphan raitahai lapen neliphan nanglipen pajok tahai.”

¹⁶ David kepu pajutsi, Sol pulo, “La nanglima, Osa, David?” Lapen la kechiru pangcheng-lo.

¹⁷ Ansi David aphan la pulo, “Nangli kepu alam ahok-lo, lapen nelisi kechokchelo. Neli nangliphan pu-an kehingno klem seta nangli neliphan akemesi klemlo!

¹⁸ Nangli ko-an keme amonit lo pu pini paklangdak-lo, pima Hemphu neliphan nanglirideng hodaidet-lo seta, nangli neliphan pathithedet-lo.

¹⁹ Inut amonit ahotur aphan nep-long-lote, areng pasosepin pen padamlongjima? Nangli neliphan pini keklem apot Hemphu nangliphan pahirjumenang!

²⁰ Non neli chinipamelo, nanglisi Israel arecho manpo lapen nangli kepangri arum recho arat doverpo.

²¹ Bonta nelipoton atum aphan nangli pathithelo pu Hemphu amen pen semetangtha, lalote nelihemtun amen virvelo.”

²² David la chechak-lo. Ansi Sol ahem chedamlo, lapen David ta amonit atum pen halatum kechepatu adim chedamlo.