1 SAMUEL 21 - BAIBEL KANGTHIR (BSI)

Sol Pen David Kekat

¹ Nob along kedo Ahimelek pu kurusar along David damlo. Ahimelek kephere a-ok chepaklemhursi la aphan kechetongjisi nangbarlo, lapen arjulo, “Nangli kopisi ladak an nangli methang vang nangjilangma?”

² “Neli ladak recho akamsi kevang,” David thak-lo. “Alangli neliphan kepaklemtoi alam badu aphanta pachini nangne pusi neliphan thanlo. Neli monit atum aphan along kapreksi neli halatum aphan pachetongtoilo.

³ Lasi non nangli kopi pi ason doloma? Neliphan him plangpho mate nangli kopima kedo aling nelipitha.”

⁴ Kurusar thak-lo, “Nelilong jung jung ahim ave, bonta him kangthirsi dochot; jongsi nangli monit atum nonjong arloso pen irap-relang pulote nangli la pontame.”

⁵ “Latum la klemklelang,” pusi David thak-lo. “Neli monit atum pine jung jung akam aphan kedam ahut seta halatum aron ateng pen chepangthir-et; non abatai ke isi kepanong akam aphansi kebar apot hala an soselo!”

⁶ Lasi David aphan kurusar him kangthir pilo, atheke la along kedo ke Arnam aphan kepitang ahim kangthir anchot-lo, la tebul kangthir pen ensi puthot him kemi bithulo.

⁷ (Sol api ahur ahemphu Doeg, la Edom pen, halaso arni hadak dolo, pima la dhorom akam chepachok nangji dolang.)

⁸ Ahimelek aphan David pulo, “Nangli chir mate nokjir doma? Recho neliphan lapusonsi hukum pi paprap-lo, neli nokjir mate kaprek arisim keche-en damji apor longlelo.”

⁹ Ahimelek thak-lo, “Nangli Elah Arlok along kepathi Philistia aso Goliath anokjir do; la sangkelang a-arlong anungsi do, pe pen phunghet. Nangli jongsi la nangji pulote la pon tame lahelo ladak kedo arisim puke.” “La neliphan nelipidetnon,” pusi David pulo. “Nahokta akemi anokjir long athai avelo!”

¹⁰ David osi Sol pen kat-lo, lapen Gath arecho Akish along damlo.

¹¹ Recho aban atum Akish aphan pulo, “La David, amethang adet arecho kalima? Laso amonit aphan arloso atum halatum kekan ahut lunlo, ‘Sol bangsuri pathilo, bonta David ke bangsuri kep pathilo.’ ”

¹² Halatum alam David aphan aning palutchok-lo, lapen Recho Akish aphan la pherelo.

¹³ Lasi halatum komjailo, lapen laphan latum nepponpo pulote David chepatersi ingcham ason cheplangpo; la rongsopi anghap-heihei along ketoktap lapen angmum an angkroi palilenpo.

¹⁴ Lasi aban aphan Akish pulo, “Langtha! Laso amonit pangchamlo! Lason amonit nelong kopisi kevanlangma?

¹⁵ Kopisi nephan pasiksakjile nemethang ahem ladak lason keklemtap amonit kaprek van nangjilangma?”