1 SAMUEL 20 - BAIBEL KANGTHIR (BSI)

David Aphan Jonathon Kerap

¹ Anke Ramah along Naioth pen David katsi Jonathon along damlo, “Neli kopilo keklem?” La arjulo, “Kopi pran karmut akamsi neli klemloma? Nanglipo neliphan kepathiji pu kopi akechokche akamsi neli klemtang-loma?”

² Jonathon thak-lo, “Nangli kethinangji pen Arnam paklemkle nang. Neli po kopima keklem neliphan than-et-lo. Lamkethe, lamso tame lapen la nelipen patu un-e. La ahok kalima!”

³ Bonta David thak-lo, “Nangli neliphan chinghon-o pu alam nanglipo chinipame, lapen la kopisi keklemji mang-loma nangliphan pachininelo pu chesik et-lo, pima nangliphan la ning aduk pipo. Kereng-et Hemphu amen pen neli nangliphan semetang-lo, neli kethi pen kengkam isinatsi helochot-lo!”

⁴ Jonathon pulo, “Nanglining kehang aling neli klempo.”

⁵ “Penap ke chiklo kemi achojun,” David thak-lo, “Lapen neli recho pen chorap-rap nangjilo. Bonta jongsi la nangliphan mesen pulote, neli damsi hidi ajo penapdik arnikangsam anta chepatudam-joipo.

⁶ Nanglipo jongsi kecho atebul along neli ave pu chinilote, alangliphan thannon, nelihem Bethlehemsi kechevur damjisi choningrilo punon, athe neli hemtun isi aphan ningkan esek hadak kethokji aporlo.

⁷ Alangli thak-lo, ‘mesenlo’ pulote, neli jokpo; bonta jongsi alangli ningthilo pulote, nangli chininangpo, neliphan kepasodakjisi alangli mathathip-lo.

⁸ Kanghon pen la, neliphan klem iktha, lapen nangli neliphan kechechak alam kangthir chebi vetnon. Bonta neli jongsi adai do, pulote nangli methangle neliphan pathinon! Kopisi nanglipo along ponsi neliphan pathi nangjilangma?”

⁹ “Lason matha ajat mathari!” Jonathon thak-lo, “Jongsi nelipo nangliphan kepathiji kemathathip alam neli chini pulote nangliphan neli thanthedetji apot-loma?”

¹⁰ Ansi David arjulo, “Nangliphan nanglipo aningkethi pen nangthak lote komatsi neliphan birta nelipipo.?”

¹¹ “Eli hidi ajo damlonang,” Jonathon thak-lo. Lasi halatum damlo.

¹² Lapen David aphan Jonathon thak-lo, “Israel Arnam Hemphu etum ahaki paplang-lonang! Non apor penap lapen aphi arni anta neli nelipo aphan arjupo. Jongsi la aning nangliphan mesen pulote, neli nangliphan lamthe nangtoipo.

¹³ Jongsi nangliphan kepasodakji aninghang lapen laso alam nangliphan neli nangthanthe lapen pajokvanve pulote, Hemphu-le neliphan parburop-lonang. Nelipo along la aphrang kedo asonthot-le nanglilong Hemphu padolonang!

¹⁴ Lapen jongsi reng-et-lang pulote, kanghon pen nangli kechechak kangthir chebi pamenon, lapen nelilam kroinon; bonta neli thi-lo pulote,

¹⁵ lason isinat akangjinso nelihemtun aphan kaike paklangtha. Nangli hotur kedo-an aphan Hemphu pavir-et-lo pulote,

¹⁶ nangli pen neli kechechak ason pachephriphre nang. La jongsi chephridak pulote, Hemphu nangliphan aduk pipo.”

¹⁷ Puthot aphongta David aphan Jonathon chinghonji pu chechak-lo. Pima amethang apar Jonathon David aphan chinghonlo.

¹⁸ Anke la aphan Jonathon pulo, “Penap ke chiklo Kemi achojun apot kecho amei along nangli ave pulote, nangliphan mathavekji.

¹⁹ Penapdik abang nangliphan mathamuchotpo, lasi aphrang kechepatu adimthot damra chepatu non lapen longbui anungle chepatumon.

²⁰ La along batai kethom thai aso ap-po la isi kejong adim asonpo.

²¹ Anke neliban aphan kepariji aphan neli thanpo. Jongsi la aphan neli, ‘Langtha, lapen nanglinatsi do, damra endamnon,’ pu thanlote, nangli jokvanlo pu chininon, nangli nangbar unpo. Neli kereng-et Hemphu amen pen nangliphan chechak-lo, nangli thangnatta sungselo.

²² Bonta jongsi neli la aphan, ‘thai aso nangli paraisi do’ pu thanlote, o non, pima Hemphu nangliphan kaprek kehelo adimsi ketoiji ninghang-lo.

²³ Elitum lahin lahin kechechaktang asonthot Hemphu-le la kaike epabilongver lonang.”

²⁴ Lasi hidi ajo David chepatujoilo. Chiklo Kemi achojun ahut Sol Recho an kecho aboha along vang-lo,

²⁵ lapen kai ason arpong kedaisi chongnilo. La adung Abner chongnilo, lapen Jonathon ke la angnosi chongnilo. David adim ke ingthaivang-lo,

²⁶ bonta Sol thangta pupe halaso arni ke, pima la mathalo, “Laphan pine cheplangtang-lo, lapen la aron ateng pen ingthirthe.”

²⁷ Puthot arni Chiklo-Kemi aphi, David adim puthot ingthaivang, lasi Jonathon aphan Sol arjulo, “Kopisi an kecho along David atum pinita vangvedet-loma?”

²⁸ Jonathon thak-lo, “Alangli Bethlehem kedamjisi nephan cho-ningrilo.

²⁹ ‘Kanghon pen neliphan padamlongtha pusi la pulo, pima neli hemtun isi rong along kethok kepajir ketalon ahut neli ik atum anta hadak dodun nangji pusi hukum nepilo. lasi nangli jongsi neli jirpo pulote, neliphan nelidonrap nepachelangdam longtha.’ La apotsi nangli kecho atebul along alangli avedet-lo.”

³⁰ Jonathon aphan Sol aningthisi pulo, “Nang kehingno asolo, nangpei ko-an nebethurlo lapen akekroi kave a-arlosolo! Non ne chini nang David anatsi do lapen nangmethangsi chepinremlo nangpei asonthot!

³¹ Nang chemathathema David rengtik ke laso adet recho cholonglelo pu? Non damra laphan dak vandet-non, la thivek nangji!”

³² Anke apo Sol aphan Jonathon thak-lo, “Kopisi alangliphan kepathi nangpo? Alang kopilo kechokche?”

³³ Laso ahut Jonathon aphan kepathijisi Sol achir pen jorlo, lapen Jonathon chinipamelo, apo ke David aphan kepathijisi mathathip-lopu.

³⁴ Jonathonta aningthisi tebul pen thurphlut-lo, lapen Chiklo-Kemi achojun adun arni thangta chochedet-lo. La David aphuthak aningdukpik-lo, pima la aphan Sol pinremlo.

³⁵ David aphan kechetong damjisi Jonathon hidi ajo puthot adap damlo, aphrang halatum kechechak ateng. La along inut ariso ponsi

³⁶ la aphan la pulo, “Kat ra thai aso ridamnon, ne appo, “ Riso kat-lo, la apar Jonathon thai aso ap-lo.

³⁷ Thai aso keklo adim, riso abang kele ahut, la aphan Jonathon hang-lo, “Thai aso ha aphrang an lang!

³⁸ Hadak arjapver nangnelo! Dam seraknon!” Riso abang thai aso humsi ahemphu along chevoilo,

³⁹ la kopi aphan loma chininepin, Jonathon pen Davidsi chinichot.

⁴⁰ Arisim an riso aphan Jonathon pisi lahei ha rong paponthutoilo.

⁴¹ Riso abang damjui aphi longbui anung pen David nangbarsi batai kethom akengphu patongruisi longle athak angphun patongkilo. Jonathon lapen David banghini lahin lahin kechingjup ahut banghinita chirulo; Jonathon aphan mute David aning aduk ong muchot-lo.

⁴² Ansi Jonathon pulo, “Arnam nanglilong padovernang. Elitum lahin lahin aseme kangthir eli lapen eso-esu atum an aphan Hemphu-le epabi longvernang.” Ansi David otekangsi Jonathon ta rong anat chedamjuilo.