1 SAMUEL 2 - BAIBEL KANGTHIR (BSI)

Hannah Akardom

¹ Hannah ardomlo: Ning arong pen Hemphu nepaplengset-lo; la keklem apot ne ko-an rengme! Ne hotur atum aphan ne ingnekchoilo, Arnam nekerap apot ko-an ne nening arong!

² Baduta Hemphu ason ingthirthe; La ason baduta ave, netum a-Arnam ason keraithek abang ave.

³ Nang kechepindak ingtonnon, nangtum kecheparoka alamtang padojoinon. Pima Hemphu ke inut kechinithek a-Arnam, lapen rat atum keklem an kangsai Abang-lo.

⁴ Nokbe kangtang athai ching-loktang-lo, bonta komane atum nang ingtangbomlo.

⁵ Kecholongpame atum, non an kecholongji aphan kechorek nang-lok-lo! Bonta kangchir atum ingchir nangnelo. Aso kave abang bang throksi asomar dolo, bonta aso ke-ong abang inut-ta sa pipe det-lo.

⁶ Hemphu chethe enlo lapen chethe pilo; kethi apirthe anat la rat toilo lapen halatum aphan vanthulo.

⁷ La ajehak amonit aphan paduk-lo lapen kaprek aphan paplang-lo; la ajehak aphan pabilo, lapen akaprek aphan pathelo.

⁸ La keduk aphan longle aduk pen rung-lo, lapen keboi atum aphan halatum akesung pen ingthurlo. Latum aphan rechoso asangho paplang-lo lapen halatum aphan anong anghoi bilo. Pirthe ahemthur ke Hemphu arideng, laso athak-si Alangli pirthe kimlo.

⁹ Alangliphan kekroithip arat achethe rai bonta kehingno atum kangting ajo vir-et, inut amonit amethang ajakong pen hai un-e.

¹⁰ Hemphu ahotur an pavir-etpo, halatum aphan la sining pen cheter paklopo. Hemphu-si pirthe adang ingsaipo; la arecho aphan la ajakong pipo, la kangvaitang recho aphan la pahaipo.

¹¹ Anke Elkanah ahem Ramah anat chevoithulo, bonta oso Samuel ke Shiloh alongsi sa kok-lo, lapen Eli, kurusar aber Hemphu aphan ingduk-lo.

Eli Asomar

¹² Eli asomar atum ajat langno-o. Latum Hemphu aphanta arjuje

¹³ lapen rat atum kurusar atum pen keri aron-heihei ta ano chevarve. Lasi, kethokji aphan inut amonit vang-lote, kurusar aban abang tok-phrok chevanpo. Ok ketun bom ahut,

¹⁴ phule arlo ok athak tokpo lapen tok-phrok along nangkedun an ke kurusar apharmanlo. Israel atum Shiloh along kethokji ra kevang atum an aphan lasonsi klemlo.

¹⁵ La aparta athu kedo a-ok kephrinji aphan ponpe aphrang kurusar aban abang vangsi, pupo, “Kurusar aphan karnupijile ajehak a-ok nepitha; la ok ke-up nangtum pen chodengde, ok kevaisi dengchot.”

¹⁶ Monit abang jongsi “Kopima akeme ne paklem longtha lapen athu kedo abang kechengsi nepaphrin longtha; anle nangning kehang aling ponnon,” pu thak-lote, kurusar aban abang pupo, “Lason kali, nonle nephan nangpidunnon! Nang jongsi nangpipe pulote ne jakong pen pon bor-idetji!”

¹⁷ Eli asomar laso apap apot Hemphu angno adai thepik-lo, pima Hemphu aphan kethok-heihei aputhak halatum lapuson kelangrem akam klemlo.

Samuel Shiloh Along Kedo

¹⁸ Halaso ahut oso Samuel, Hemphu aphan ingduk-bomlang, athak ape kanglit akangthir chingchoilo,

¹⁹ aningkanvangta la apei choiso epak thak pipo lapen bangpi apenan pen ningkan esek athok kepidam ahut la aphan ponpipo.

²⁰ Anke Elkanah lapen la apiso aphan pahirjumesi Elkanah aphan pupo, “Laso a-arloso aphan Hemphu akaprek asomarta papilonang, la kehodaitang a-oso adim anut kaprek padonang.” Anke latum hem chedampo.

²¹ Hannah aphan Hemphu pahirju-mesi pinso a-osomar bang kethom lapen arlosopimar banghini pilo. Hemphu akam keklem alongsi oso Samuel thebomlo.

Eli Lapen La Asomar

²² Eli non sarpik-lo, la asomar atum Israel atum aphan kopi pi klemloma la charjulongbomlo lapen Hemphu angno apehem anghap along kam keklem a-arloso atum pen irap-rap-lo pu ta arjulong-lo.

²³ Lasi halatum aphan la pupo, “Lahei nangtum kopisi keklemloma? Nangtum keklem akehingno alam kadokaveta nethan-prelo.

²⁴ La ington non, O po atum! Lake Hemphu arat atum kepherememe kechethanhur alamlo!

²⁵ Inut amonit jongsi anut kaprek abe thur pen pap klemlote Arnam la aphan cheraidun-un; bonta Hemphu aphan pap keklem abang aphan komatsi cheraidun-un poma?” Bonta latum apo alam arjujelo, pima latum aphan Hemphu kepathijisi chesiktang-lo.

²⁶ Oso Samuel thebomlo lapen Hemphu lapen monit penta akangjinso long-lo.

Eli Ahemtun Aphan Kemontri

²⁷ Arnam amonit along Hemphu pen birta vang-lo lapen Eli along damsi pulo, “Nangphusar Aaron lapen la ahemtun Ijip arecho aban keplang ahut Nemethangsi Aaron aphan cheklang-lo.

²⁸ Israel kedo-an pen Ne la ahemtun aphansi nekurusar keplangji aphan Ne ingvailo, dovan along Nephan kangdukji aphan, mephik kethorji aphan lapen Nephan karjujile arlo-achoi pachingthangji aphanlo. Ne halatum aphan dovan athak athok isi apharman ke-enji ajakong pilo.

²⁹ Tangte kopi athesi, nerat atum pen Ne ke-en athok ajir-heihei aputhak nang kecho ar-i-varret loma? Eli, kopisi nang nephan mute nangsomar aphan man kepivarret-langma? Halatum, nephan nerat aso atum nekethok akemenei angsi kepachotoi pen palenglim-lamlo?

³⁰ Israel lapen nangtum arosi Ne-kurusar plangsi Nephan kaiketa ingdukpo pusi Ne semetang-lo. Tebonseta, non Ne kepuji ke lahelo, nangphan la paplanglongdetpo, mo aphi seta, la alar, Nephan man nekepiji abangphansi Ne man pipo lapen Nephan kelangrop atum aphan Neta langrempo.

³¹ Arjutha, nanghemtun lapen nangtum aro ariso kedo-an aphan Ne jakong kepavedetji arni nangletang-lo, anke nanghemtun pen inutbakta sar longledetpo.

³² Nang kesung phopo, lapen kaprek Israel atum aphan Ne kepi ahirjume apot nang langdun un-epo, bonta nanghemtun angbong inutbakta sar-ru an sar longledetpo.

³³ Seta nangso-nangsu angbong inutbak aphan Ne parengji, lapen lasi nephan kurusar ason ingdukpo. Bonta la amek selokjokpo, lapen aningkethe an avedetpo, lapen akaprek nangso-nangsu atum ke kehingno akethi pensi thipo.

³⁴ Nangsomar banghini Hophni lapen Phinehas arnisi angbong thirappetpo, lapen nang chinipo, Ne kepu athetin alam ahok.

³⁵ Nephan kekroithirklong lapen la aphan Ne kepaklemtoi aling keklem abangphan Ne kurusar ingvaiji, la aphan Ne aso-asu piji lapen la Ne kangvaitang arecho angno ingdukpo.

³⁶ Nangso nangsu kereng-long abang halabangso akurusar along damsi tangka lapen an chohang nangkokpo, lapen kurusar aphan kerapdun longji aphan choningri nangsetpo, lake pine apok kechepangkrang longji aphan.”