1 SAMUEL 16 - BAIBEL KANGTHIR (BSI)

David Aphan Recho Kebat

¹ Samuel Aphan Hemphu pulo, “Nang ni ko-ansi Sol aphuthak ningripoma? La aphan Israel arecho pu Ne dengdetang-lo. Bonta non ajehak jit ajangthu rinon lapen Bethlehem damra hadak Jesse pu inut amonit do, pima la asomar angbong inut abangphan Ne, recho ingvailo.”

² “Ne la kopusonsi klemthekpo?” Samuel arjulo, “Jongsi la arjulong lote, la neliphan pathilotpo!” Hemphu thak-lo, “Ejon achainong aso nanglong cheponnon lapen punon, nangli hadak Hemphu aphan thok nangji.

³ Jesse aphan ta phanon, lapen nang kopima keklemnangji Ne nangthanpo. Nangphan Ne kepachiniji abang aphanle nang recho kebat ajangthu hi non.”

⁴ Hemphu keputang atengsi Samuel klemlo lapen Bethlehem anat damlo, hadak jalin atum a-ok klemhur pen la aphan kechetongji vang-lo lapen arjulo, “Sangkelang abang, la non abatai ningkangsam pensi nangkevurloma?”

⁵ “Kalang.” La thak-lo. “Neli Hemphu aphan karklijisi kevang-lo. Nangtum chepangthirra nelong nangdunnon.” La Jesse lapen asomar aphan ta pachepangthir-toilo, lapen halatum aphan la karkli along phalo.

⁶ Halatum nanglesi, Jesse asopo Eliab aphan Samuel thek-lok-lo, lapen amethang chepulo, “Labangso amonit ladak Hemphu angno karjapthor abang helo alangli kangvaitang abangvekpo.”

⁷ Bonta la aphan Hemphu pulo, “Ajonkeding lapen arjekelangme abang aphan langri. La la aphanta Ne dengdelo, pima Ne monit atum kangsai ason ingsaise. Monit atum athak amahangsi langji, bonta Ne ke aningsi kelang.”

⁸ Ansi Jesse asopo Abinadab aphan hangsi la Samuel angno vanlo. Bonta Samuel pulo, “Kali Hemphu la aphanta ingvaive.”

⁹ Jesse anke Shammah aphan vanlo, “Kali, la aphanta Hemphu ingvaive, “ Samuel pulo.

¹⁰ Lasonsi Jesse asomar bang throksi Samuel angno vanlo. Lapen Samuel laphan pulo, “Kali, latum angbong pen Hemphu ingvaivelang.”

¹¹ Ansi la aphan alangli arjulo, “Nanglisopo dolangma?” Jesse thak-lo, “Akebisi abang dolang, bonta la biresak kelangjisi damjui.” “La aphan ladak pavangtha,” Samuel pulo, “La vangvetik-ke Etum athok pajirjelo.”

¹² Lasi Jesse la aphan pahangdamlo. La kelang athok do-o, a-ok-mesen ariso, lapen amek langmesen. Samuel aphan Hemphu pulo, “Labang helo, la aphan jangthu patipnon!”

¹³ Samuel jit ajangthu ponsi la a-ik atum angno David aphan jangthu patip-lo. La amat Hemphu akarjong David aphuthak plengset-lo, lapen halaso arni pen doverlo. Ansi Samuel Ramah anat chevoithulo.

Sol Kangsai Ahem Along David

¹⁴ Sol aphan Hemphu akarjong obup-lo, lapen Hemphu ketoi karjonglangno laphan chenek-lo.

¹⁵ La aphan aban pulo, “Nelitum chinilo, Hemphu pen ketoi akarjong-langno nangliphan chenek-lo.

¹⁶ Lasi nelitum aphan hukum pinon, akehai, lapen nelitum inut amonit kumbeleng kerotthek abang ripo. Karjong-langno nangli phuthak kevang ahut laso amonit akumbeleng rotpo, lapen nangli methudetpo.”

¹⁷ Halatum aphan Sol hukum pilo, “Inut kerot theknei amonit rinon lapen la aphan nelong vannon.”

¹⁸ La aphan kangduk angbong inut abang pulo, “Jesse, la Bethlehem asor inut asopo do la inut thekser aduhuidilo, la angthin the-o lapen athok kedo amonit, inut mesen aron-aso, lapen inut lamthan-thekpo. La along Hemphu do.”

¹⁹ Lasi Sol, pherangke atum aphan toisi Jesse aphan laso alam paputoilo, “Nelong nanglisopo David, biresak kevi abang nangtoitha.”

²⁰ Jesse, David aphan Sol along toilo, bi ejon paponlo, gadha ejon athak him lapen ok-reng ajarong isithup drakha ahorlang panghorponlo.

²¹ Sol along David vang-lo, lapen la along kam keklemjisi lutdamlo. La aphan Sol aning dok-o, lapen la ron-arisim kepon abangphu ingvailo.

²² Anke Jesse aphan Sol isi abirta lolo: “Neli David aphan ning dok-olo, ladak nelong-le kam paklem lonang.”

²³ Halaso arni pen Sol aphuthak karjong-langno Hemphu pen nangtoilote, David amethang akumbeleng ensi la ardengpo. Karjong-langno osi, Sol rengme muchotpo, lapen methusenpo.