1 SAMUEL 14 - BAIBEL KANGTHIR (BSI)

Jonathon Angthin Kethe Akam

¹ Arnisi Jonathon amethang arisim kepon ariso aphan pulo, “Ha Philistia amukam anat hatdamput lonang.” Bonta apo Sol aphan Jonathon chethanthedet-lo.

² Apo ke Migron along dalim arong arumsi mukam kimlo, la Gibeah pen helo-o-e; la along bang 600 amonit dolo.

³ (Kurusar arlo-achoi kepon abang ke Ahijah, la Ikabod a-ik Ahitub mate Phinehas asopo lapen Shiloh along Hemphu akurusar Eli asupolo.) la abang chinine Jonathon dam-et-lo pu.

⁴ Mikmash atovarsi Philistia amukam keleji aphan Jonathon damnangji, hadak longchongthepi hini do, asitin atovar akrong along la dolo: Isi abang ke Bozez lapen akaprek abang ke Seneh pulo.

⁵ Isi abang ke nirep ahin Mikmash anatsi pangnolo, lapen akaprek abang ke nitur ahin Geba anatsi pangnolo.

⁶ Riso amonit aphan Jonathon pulo, “Ha kekroikre a-Philistia atum amukam anat hatput lonang. Hemphu erapji mene: Jongsi erapji pulote la ephan epahai longvekji, etum hadak ong-edet seta.”

⁷ Riso abang thak-lo, “Nangli jat-le klem seta, nanglilong neli dolo.”

⁸ “Mesenlo.” Jonathon pulo, “Etum hatput lonang, lapen Philistia atum epalangdun lonang.

⁹ Etum along kevangji aphan halatum epanghongtoi lote, etum karjap adim along amat inghongkok lonang.

¹⁰ Bonta jongsi etum aphan halatum along damnangji pulote, etum damlonang pima lahelo etum aphan halatum aphuthak Hemphu epahaivekji pu angthek-lo.”

¹¹ Lasi latum aphan Philistia atum palangdunlo, lapen Philistia atum pulo, “Langtha! Ajehak a-Ibri atum kechepatu angthor pen nangbarlo,

¹² anke halatum Jonathon lapen riso amonit aphan hang-lo, ‘Ladak angsong an vangtha! Netum pen eson nangkethanji alam dolang!’” Riso amonit aphan Jonathon pulo, “Nephi phi nangdunnon, halatum aphuthak kehaiji aphan Hemphu epitang-lo.”

¹³ Tovar angsong Jonathon ari akeng patongruisi karkum pen arlulo, lapen riso amonit ta la aphi phi dunlo. Philistia atum aphan Jonathon tengkhengsi halatum aphan arum tengphit-phit lo, lapen riso abang halatum aphan pathilo.

¹⁴ Kechengsi kepathi ahut Jonathon lapen riso amonit chiri isi ra ebeng adang angbong bang 20 anbak amonit pathilo.

¹⁵ Rongkedo a-Philistia atum ke pherepik-lo; kethipon atum lapen ron-aso atum kepheresi a-ok klemhurlo; pirthe klemhurlo lapen hadak hangjoja lo.

Philistia Atum Kerem

¹⁶ Benjamin alongri Gibeah along Sol amonit kehon atum Philistia atum manghu mangram pen kekat thek-long-lo.

¹⁷ Lasi amethang amonit aphan Sol pulo, “Ron-aso lakhanon lapen komat abangsi kavema langnon.” Halatum la klemlo lapen Jonathon arisim kepon amonit pen Jonathon aphan thek-longledet-lo.

¹⁸ “Kurusar arlo-achoi ladak vannon, “ pusi Sol ke Ahijah kurusar aphan pulo. (Halaso arni Ahijah Israel arat angno la ponlo.)

¹⁹ Kurusar aphan Sol kepu ahut Philistia amukam along kehurisei litponbomlo, lasi la aphan Sol pulo, “Hemphu aphan karjuji apor avelo!”

²⁰ Anke la lapen amonit atum pen pen Philistia atum amethang hijan kechedan kehorisei anat dampaksi kechedanji aphan barlo.

²¹ Ajehak a-Ibri atum Philistia atum anatsi dolo lapen halatum pen pen mukam anat damsi abe kedun chelarsi Sol lapen Jonathon along chelangdunlo.

²² Ephraim anglong-heihei along kechepatu akaprek atum Philistia atum kattang-lo pu arjulong-lo, lasi halatum anta chelangdunpetsi Philistia atum aphan tengkheng-lo,

²³ lapen tovarsoding chedansi Bethaven apar anta hungdunlo. Halaso arni Hemphu-si Israel atum aphan pajok-lo.

Ron Aphi Keplang

²⁴ Halaso arni Israel atum an kangchir si aini-ainalo, pima Sol semetangsi pulo, lapen hukumpilo, “Ne hotur aphuthak alar kehuitangte aphrang mane abang jongsi pini arni an cholote ahirjuno paphonang.” Lasi baduta losini thangnatta chochedet-lo.

²⁵ Latum kedo-an thengpi ajo vang-lo lapen pijo alang alongtin ta thek-long-lo.

²⁶ Thengpi ajo pijo alangsi dothip, bonta baduta la junjedet-lo pima halatum Sol ahirjuno aphan pherelo.

²⁷ Bonta rat aphan kepi ahukum Jonathon arjulonglelang; lasi kepon achin pen pijo alangbong arlo an chut-lo lapen ajehak pijo alang junlo. La amat la rengme muchot-lo.

²⁸ Bonta inut abang pulo, “Nelitum kedo-anta kangchirsi thininalo, bonta nanglipo nelitum aphan papheresi pulo, ‘Badutame pini an kecho aling abang ahirjuno paphonangpu.’”

²⁹ Jonathon thak-lo, “Kopi akephere meme akamsi ne rat aphan nepo klemloma?” Langtha neli ko-an ingtang-lo, pima neli ajehak pijo alang junlo!

³⁰ Hotur aphan paremdet aphi nerat atum jongsi halatum kechepon a-an pini checholong asonte ko-an akemeji, mathatha, ko-an a-Philistia aphan latum pathi unjilang apot-lo!

³¹ Halaso arni Philistia aphan Israel atum paremlo, Mikmash pen Aijalon atovar soding an chedanlo. Halaso ahut an Israel atum an kangchir thininailo,

³² lapen halatum lasi hotur kepon kelongpon biresak, chainong-heihei hadak amat thusi avi dokok-lang seta, la chodet-lo.

³³ Laso alam Sol aphan thandet-lo. Langnon, avi kedolang a-ok kecho pen ajok Israel arat Hemphu aphan langplotsi pap klemtang-lo. Nangtum chobeichot abang! Pusi Sol hangcharbulo. Nedung an arlongpi pakong-long non.

³⁴ Ansi la akaprek ahukum pilo, “Nerat atum along damra lapen halatum aphan thandamnon, halatum kedo-an achainong lapen biresak an ladak pavanpetnon. Halatum lahei ladak thusi chonangji; avi kedo a-ok kecho halatum Hemphu aphan langplotsi pap klem nangnelo.” Lasi halaso ajo halatum kedo-an achainong chevansi halahei hadak thulo.

³⁵ Lapen Sol kekim cheng adovan Hemphu aphan kimpilo.

³⁶ Amethang amonit aphan pulo, “Eli hirdamlonang, lapen Philistia atum aphan ajo tengkheng-ra arni kevang an halatum amar thidam et-lonang lapen kedo-an aphan pathilonang.” Nanglining kehang akeme alingle klem iknon, pusi halatum thak-lo. Bonta kurusar pulo, Aphrangsi Hemphu aphan arju lonang.

³⁷ Lasi Arnam aphan Sol arjulo, “Philistia atum aphan ne tengkheng nangjima? Netum aphan nang-pahaijima?” Bonta halaso arni Arnam thakthedet-lo.

³⁸ Ansi rat ajalin atum aphan Sol pulo, “Vang-petnon lapen pini kopi apapsi klemtang-loma ri lonang.

³⁹ Israel atum aphan kepahai Hemphu kereng-et amen pen neli semetang-lo, ado kedo abangphan pathilotpo, laso abang nelisopo Jonathon setame.” Seta baduta ethenatta thak dundedet-lo.

⁴⁰ Lasi halatum aphan Sol pulo, “Nanglitum kedo-an ladak vangpet-ra arjapsarnon, Jonathon lapen nelita hadak arjappo.” “Nanglining kehang akeme alingle klem iknon, “ pusi halatum thak-lo.

⁴¹ Israel a-Arnam Hemphu aphan Sol pulo, “Hemphu pini nephan kopisi nethakthe det-lo? Israel a-Arnam Hemphu, kangthir a-arlong pen ajok nethaktha. Jongsi Jonathon mate ne si ado do pulote Urim pen nethaknon, bonta laso ado nangrat atum pulote Thummim pen ajok thaknon.” Kethak pen kelong ke Jonathon lapen Sol aphansi jong-lo lapen rat aphan ke pajokvanlo.

⁴² Ansi Sol pulo, “Nesopo Jonathon lapen ne angbong ingsaithunon,” lapen Jonathon amensi klang-lo.

⁴³ Anke Jonathon aphan Sol arjulo, “Nang kopisi keklemloma?” Jonathon thak-lo, “Ne ke-otdong achin pen asap-o pijo alang cholo. Ne daksi dolo ne kethiji aphanta chesikding-lo.”

⁴⁴ La aphan Sol thak-lo, “Nangphan jongsi nangpathithe pulote Arnam nephan nepathengbop-lonang!”

⁴⁵ Bonta Sol aphan rat atum pulo, “Israel aphan kepahaidet a-Jonathon aphan pathilot nangjima? Kali! Nelitum Hemphu kereng-et amen pen semetang-lo. Pini la kopi klemtang-loma la Arnam akerap pensi klemlo.” Lasi Jonathon aphan kepathiji pen rat atum pajok-lo.

⁴⁶ Lasi aphi Philistia atum aphan Sol kehungdun ingtonkok-lo, lapen halatum amethang alongri anat chevoithulo.

Sol Kepangri Lapen Ahemtun

⁴⁷ Sol, Israel arecho plangdet aphi la kedo-an ahotur atum pen adang bithe chedanlo. Moab atum pen, Ammon atum pen, lapen Edom atum pen, Zebah lapen Ammon atum pen lapen Philistia arecho atum pen chedanlo. Kechedan alongtin ta la haithorlo.

⁴⁸ Nokbe ason chedanlo lapen Amalek arat aphan anta paremlo, la Israel aphan kedo-an aketengkheng pen pajok-lo.

⁴⁹ Sol asomar ke Jonathon, Ishvi lapen Malki Shua. La asopi akleng amen ke Merab lapen akebi abang ke Mikal.

⁵⁰ La apiso ke Ahinoam, bangpi Ahimaaz asopilo; Alangli ron-armu apinpo ke Abner, la Sol a-punu Ner asopolo.

⁵¹ Sol apo ke Kish lapen Abner apo Nerke Abiel asopolo.

⁵² La rengtik an, Sol ke Philistia atum pen kethi-kerengpin an chedan nang-lo. Lasi kangtang-kangsak lapen angthin kethe amonit kelong an la aron-armu along amen thappon-lo.