1 SAMUEL 13 - BAIBEL KANGTHIR (BSI)

Philistia Atum Pen Ron Kechedan

¹ Sol arta ningkan 35 anbak dolo, la recho kecho ahut; lapen la recho cholo lapen Israel aputhak ningkan phlikep-ra hini pangrilo.

² Sol bangsuri kethom amonit ingvailo, bangsuri hini halatum Mikmash alongri lapen Bethel anglong alongri anat amethang along monit cheponlo lapen bangsuri isi ke asopo Jonathon, Gibeah anat Benjamin akhei alongri toilo. Sol ahin amonit anke hem toi-et-lo.

³ Geba along Philistia anokbe aphan Jonathon pathilot-lo, lapen laso alam Philistia kedo-an atum arjulong-et-lo. Anke Sol pherangke atum aphan toisi ron kechedanji aphan pong-ut kebut pen ajok Ibri adet kedo-an aphan hangpet-lo.

⁴ Sol si Philistia apinpo aphan pathilo, lapen Philistia atum halatum aphan hijimtang-lo pu Israel kedo-an aphan thanlo. Lasi Gilgal along Sol pen kejelangdunjisi rat atum dunpet-lo.

⁵ Philistia atumta Israel pen kechedanjisi chingrumpet-lo; halatum bangsuri 30 ron ahemkonglong do, bang suri throk losei kardon atum do, lapen talo asangti ajo sangti amu asonsi ongdung aron-aso dolo. Halatum Mikmash anat damlo, la Bethaven anihang anat, lapen hadak mukam chekimlo.

⁶ Anke halatum Israel aphuthak ketengkheng chepangtang-lo, lapen halatum aphan aning pabiremlo. Ajehak a-Israel atum longku ajo lapen angthor along chepatulo, lapen arlong-heihei along mate hilik arlo lapen langtuk-heihei arlo chepatulo.

⁷ Akaprek atum Jordan Aroi hatsi Gad lapen Gilead alongri damlo. Sol ke Gilgal alongri dobomlang. lapen la along kedo arat atum kepheresi a-ok klemhurlo.

⁸ La ni 7 Samuel aphan inghong-lo, la aphan keklem nangji Samuel kepinkhat ateng-lo; bonta Samuel ke Gilgal along nonpu anta nanglelelang. Rat atum Sol pen pratseilo.

⁹ La apotsi halatum aphan la pulo, “Nelong kephrin athok-heihei vannon lapen kejelang athok pilo,

¹⁰ lapen lahei la pajutsi Samuel nanglelo. La aphan kechetongjisi Sol damlo, lapen laphan ingthumlo,

¹¹ bonta Samuel pulo, ‘Nangli kopisi la keklemloma?’” Sol thak-lo, “Rat atum neliphan ne-obomlo; lapen nangli kevangji pu ateng nanglita nangleledet-lo ke, la aparta Philistia atum Mikmash along chingrumpet-lo.

¹² Lasi neli mathalo, ‘Philistia atum ladak Gilgal along neliphan tengkhengdetpo, lapen Hemphu pen ahirjume kelongji aphan neli thangta klemklelang, ‘Lasi neli mathalo, nelisi athok pidet nangpo.”

¹³ Samuel thak-lo, “La ke kelu akamsi keklemlo, Nangliphan nangkepi Hemphu Arnam ahukum nangli kroikredet-lo. Jongsi nangli kroilo pulote alangli Israel aputhak kaike aphan nangliphan recho pacholongverji apot-lo.

¹⁴ Bonta nonke nangli pangrilong-o-elo, pima nangli alangliphan kroikredet-lo. Hemphu aningkehang abang aphansi ingvaithurongpo lapen la arat aphuthak halabangso amonitsi pangripo.”

¹⁵ Samuel Gilgal olo, lapen amethang atovar chedamlo. Sol aron-aso along kejelangdunjisi damlo lapen ahin arat anta la aphi phi dunlo. Halatum Gilgal pen Gibeah, Benjamin alongri damlo, Sol amethang aron-aso aphan langcharilo, bang 600 anbak amonit dolang.

¹⁶ Sol, lapen la asopo Jonathon, lapen halatum amonit Geba Benjamin alongri alongsi mukam chekimlo. Philistia atum ke Mikmash alongsi mukam chekimlo.

¹⁷ Philistia aron-aso atum amethang amukam pen pasongthom kethidamjisi barlo: esong abang ke Ophrah, la Shual alongri anatsi damlo,

¹⁸ akaprek asong atum ke Beth-Horon anatsi damlo, lapen akaprek asong ke Zeboim arlok lapen kejejangtang ajo kechecharplot ahoi anatsi damlo.

¹⁹ Israel adet hemai atum ave, pima Ibri atum nokjir lapen chir keselam longledetjisi Philistia atum klemlo.

²⁰ (Israel atum amethang alangnoi aphal, ku, cho, lapen nokek-rangso karsoji aphan Philistia atum along damnang-lo.

²¹ Cho karso lapen sat karsoji aphan poisa adumso isi, phal lapen ku karsoji aphan poisa adumso hini anam pinang-lo.)

²² Lasi ron ahut anta Sol lapen la asopo Jonathon pen apar baduta nokjir lapen chir avedet-lo.

²³ Mikmash atovar keraijisi Philistia atum esong aron-aso toilo.