1 SAMUEL 11 - BAIBEL KANGTHIR (BSI)

Ammon Atum Aphan Sol Keparem

¹ Chiklo ejon aphi, Ammon arecho Nahash, la amethang aron-aso aphan jasi Gilead alongri Jabesh arong tengkhengsi la cheraidet-lo. Jabesh amonit atum Nahash aphan pulo, “Nelitum pen chepamenon lapen nelitum aphan kepangri abang-lo pu dengpo.”

² Nahash thak-lo, “Eson alamthe pen ne nanglitum pen chepame aloh chetokji: Nanglitum amek ar-e nanghor-etpo lapen lasonsi Israel kedo-an aphuthak kelangrem vanpo.”

³ Jabesh ajalin atum pulo, “Israel adet adang an pherangke ketoiji aphan ni throksi apor nelipi nangji. Jongsi baduta nelitum aphan kerap abang avelo pulote, nangliphan nelitum chehodai-etpo.”

⁴ Pherangke atum Sol kedo adim nanglelo, lapen halatum birta arjulong-lok pen rat atum aningdukpik-si chiru pangcheng-lo.

⁵ Sol ke achainong penpen ha hidi pen nangchevoichit anchot-lang, lapen la arjulo, “Kopi cheplang-lo? Kopisi anut-tinta kechiru nang-loma?” Jabesh pen kevang apherangke atum pen karjulong atum la aphan than-et-lo.

⁶ Sol la arjulong-lok pen Arnam akarjong la aphan jalo.

⁷ La chainong ponsi halahei aphan kethu pachet-ilo, lapen ithe nang kepachere alam pen athan tin Israel adet adang an pherangke atum aphan papontoilo. Sol lapen Samuel aphi ron kedunde abangphan halatum achainong aputhak lasonthotsi klempo. Israel arat atum Hemphu kopisi keklempoma phereparlo, lapen halatum batbe pin pen nangbarpet-lo.

⁸ Bezek along Sol halatum aphan pangrumlo. Israel pen bang suri 300 lapen Judah pen bang suri 30 vang-lo.

⁹ Jabesh pen kevang apherangke atum aphan latum pulo, “Nangrat atum aphan punon, penap anerlo chittim aphrang halatum jok-longpo.” Jabesh arat atum laso abirta arjulongsi aning arongpik-lo.

¹⁰ Lapen Nahash aphan pulo, “Penap nanglipen nelitum chedanpo; lapen nanglining kehang alingle nelitum aphan klemnon.”

¹¹ Halaso aningve Sol amonit aphan songthom thak-lo lapen adapprang halatum hotur amukam dam paprapsi Ammon atum aphan tengkheng-lo. Anerlo chitim apor halatum kedo-an aphan latum pathilo. Kerenglang atum pratjamsi amethang kechepajokji aphan kat-lo.

¹² Anke Israel arat atum Samuel aphan pulo, “Sol recho chonangnepu kepu atum konat-lo? Nelitum arideng nehodainon, lapen halatum aphan nelitum pathi-etpo!”

¹³ Bonta Sol pulo, “Pini badu aphanta pathilongle, pima pini arni ke Israel atum aphan Hemphu kepajok arnilo.”

¹⁴ Samuel halatum aphan pulo, “Elitum kedo-an ta Gilgal anat damlonang lapen non ephong Sol helo elitum arecholo pu pachethang-lonang.”

¹⁵ Lasi halatum kedo-anta Gilgal dam-et-lo, lapen hadak kangthir-et adim along Sol helo recholo pu pachethang-lo. Halatum kejelang athok-heihei pilo, Sol lapen Israel arat anta laso arni talonlo.